Rilo labik dalam tỉnh Ninh Thuận daok khik dom mô hình mblang hamu praong

Tapa ilamo meng bruk pala drak bilan Đông - Xuân 2021 - 2022, kayua dom mblang taneh trun pajaih suai nan ye njauk halak halin palai kaik ngak brei trun năng suất, hu 80 tạ sa ha min, dalam bilan Hè – Thu ini, huyện Ninh Phước hu pato tacei urang nong jhul samar bruk trun pajaih dom janih phun pala lagaih, njauk tukvak ba tabiak. Tui nan, hadei di tuk kuac ribaong kênh Nam bloh, urang nong Huyện Ninh Phước brei trun pajaih bilan Hè – Thu 2022. Dalam huyện kham marat ngak salah bruk trun pajaih dahlau di harei 20/6 ngan haong mblang taneh labaih 7.400 ha. Ong Trượng Văn Vũ, daok di Xã Phước Thái, huyện Ninh Phước, t. Ninh Thuận ndem lac: “Hamu sang drei hu 4 mẫu, tuk mboh ia mai biak rilo drei trun pajaih…”

Xã Phước Thái lac labik camriep abih di huyện Ninh Phước trun pajaih bilan Hè - Thu 2022 ngan haong mblang taneh praong 850 ha. Piah ngak padai hu kein laba, 76 sang urang nong daok di xã Phước Thái hu daong peih ngak bruk trun pajaih hu chất lượng glaong di mangaok mblang taneh praong 40 ha tui Sarak ka 62 di Rajaei. Hu mbaok tame ngak mô hình ini, urang nong hu daong mateh pajaih, mateh pandap panda ngak nong saong hu blei veik abih padai hadei di tuk yuak blaoh. Ong Nguyễn Ngọc Trường, Phó akaok UBND xã Phước Thái, huyện Ninh Phước brei thau:“Bruk daong pandap panda ngak nong piah ka mikva pala drak, UBND xã daong mateh dom pajaih bo mikva pala drak di mangaok 1 labik mblang taneh saong xã daong dom khak drak saong jru khik caga phun pala. Gam tui di nan, peih dom tal pato pasram di dom palei piah ka mikva thau cambaih bruk ngak ini lac ngak padai pajaih bahrau piah khol drei pandar tame bruk pala drak.”

Peih ngak sarak daong jien piah pala drak pajaih bahrau tui Sarak ka 62 di Rajaei, huyện Ninh Phước pandar dom janih pajaih padai xác nhận, hu prein pacang pandiak bhang saong halak halin, mek hu năng suất glaong piah ngak dalam bilan Hè – Thu 2022 yau ye: Đài Thơm 8, ML202, TH6, TH41. Gam haong nan, pachreih urang nong pandar ilamo kỹ thuật saong công nghệ bahrau, yau ye pandar bruk “1 njauk, 5 trun”, khik iek jit ruak, ngak tui pato tacei di Sở Ngak nong saong patagok palei pala ba tabiak.

Ong Nguyễn Đức Thuận-akaok jabat ngak nong saong patagok palei pala huyện Ninh Phước, tỉnh Ninh Thuận lac: “Thun ini, huyện brei salih saong luân canh labaih 20 ha ngan haong phun padai, huyện hu peih bruk pathau khan, jak ba mikva ngak siam bruk ngak taneh, li-ua, pametai dom janih halak halin, dom janih ngak jhak ka taneh. Abih di nyu nan lac, peih bruk daong jien tui Sarak 35 saong 62 nan ye dom puk palei daok peih dom mô hình pajaih padai. Peih dom tal pato pasram ka mikva thau dom ilamo saong dom jalan pala drak hu siam jang.”

Dalam bilan Hè - Thu 2022 ini, rilo labik dalam tỉnh Ninh Thuận daok khik dom mô hình mblang hamu praong saong mô hình ngak tapak mbaok taneh meng tia laser mangaok taneh padai. Jhul khang bruk salih janih phun pala di dom labik mbuan kurang ia, caga parabha ia pruh ka nyu lagaih, patak pataom, lagaih haong tukvak pala drak di yaok labik, khik ginup ia pruh ka bilan Hè-Thu 2022. Meng bruk trun pajaih njauk tukvak saong pandar dom ilamo khoa học – kỹ thuật tame bruk ngak padai, abih di nyu nan lac halau ia hu ginup, caong lac sản lượng bilan Hè - Thu thun ini hu glaong jang, daong ka urang nong hu jien mek tame hu tani tanat meng bruk ngak padai./.

Urang lang: Thu Thao – 07/06