Palei menyim khan bai hu pachreih tuai mai rivang thaot binguk 

Tal pato menyim khan bai Chăm Mỹ Nghiệp hu  20 urang bac, jeng lac dom urang di  HTX menyim khan bai  Chăm Mỹ Nghiệp. Nghệ nhân Vạn Thị Thản thun ni umo jiak  80 thun , jeng lac urang prong thun abih di palei menyim khan bai  Chăm Mỹ Nghiệp hu daa mai pato, piah tacei pato mik va pasiam veik dom bingu la klak lahik nao meng yaok pluh thun ni mai . 

“Hulin biak hadah mbaok meta tuk hu  HTX daa mai ni …

Jeng hu mbaok tame pato pakai di tal pato menyim khan bai Chăm Mỹ Nghiệp, dalam tuk vak  3 bilan, nghệ nhân Đạt Thị Nam hu tacei pato dom bingu la klak ka dom urang bac. Urak ni, dom nghệ nhân gheih bruk menyim di Mỹ Nghiệp dok biak takik, kayua yau nan ye, bruk pasiam veik gaok biak rilo kan kandah. Min, tui  nghệ nhân Đạt Thị Nam, tal bac ni lac jalan mbuan lagaih piah brei thau  labaih  20 bingu la klak  gheih mekre, dong ka palei ngak patagok khang kajap di anak tal. Nghệ nhân Đạt Thị Nam khan lac:

“HTX mbang ni peih hu sa tal bac . Hulin hu daa ngan haong bruk  nghệ nhân pato….

Lac  nghệ nhân ranaih umo di abih hu mbaok tame tal bac ni, saai La Thị Xuân brei thau: yaom lac thau menyim meng tuk  umo 13 thun,  min, tuk hu mbaok tame tal bac ni , mbang camereip abih, saai hu dom  nghệ nhân tacei pato  jalan ngak jeng bingu la klak, piah menyim jeng rilo pandap gheih mekre, pabak ka rai duik yaok harei  di mik va Chăm Ninh Thuận.

Kayua dom urang bac tui bac tal bac ni jeng ngak bruk dalam  HTX menyim khan bai  Chăm Mỹ Nghiệ, nan ye, langiu di bruk pasram menyim dom bingu la klak , urang dok hu tacei pato piah yaih khan brei tuai thau ka janih gheih mekre di khan bai  Chăm atau pasram menyim pak di labik ka dom tuai damuia khin vak angan atau sa panuac halei nan drei takre meng bingu la angaok khan bai meng kan  Chăm piah ngak pandap lưu niệm. Muk Thuận Thị Trào, urang bac di tal bac brei thau:

“Tal bac ni ye menyim rilo bingu la klaak … Taeng rup hulin ye …

Bruk tacei pato tapa dom tal bac hu HTX palei menyim khan bai  Chăm Mỹ Nghiệp peih ngak yau ni, rik dong biak siam tame bruk khik ramik song patoa veik bruk menyim khan bai di urang Chăm ka dom rai ranaih harei hadei. Meng dom kham merat di dom nghệ nhân dalam bruk pato pakai, brei thau dom bingu la klak angaok dom blah khan bai meng kan Chăm  hu dong ba dom pandap panda di palei menyim Mỹ Nghiệp dak harei dak hu tuai damuai thau tal rilo jang. Tapa nan, rik dong siam tame bruk khik ramik song patagok bruk menyim khan bai meng kan di urang Chăm Ninh Thuận./.

Urang lang: Hanipha- 12/3