Di labik pala njam dalam sang halăm di xã Vĩnh An, huyện Củ Chi

Mai rivang labik pala tamun ia hacih di kapul pala njam VietGAP Jum pataom (di ấp Trung Lập Thạnh, xã Trung lập Thượng, huyện Củ Chi) daok tame bilan paik pablei, ong Tô Văn Thành, urang dalam kapul pala njam khan lac: “salih meng ngak padai oh hu kein laba tapa pala njam patam tui jalan salamat yau urak ini hu daong ka mikva mek hu kein laba kinh tế glaong jang 4 tal 5 mbang dut saong ngak padai, bo oh daok duh hatai ka bruk duah labik pablei”.

Meng di tuk tame Kapul pambuak gauk salih tapa pala njam patam salamat, ong Tô Văn Thành saong mikva tok pataom prein tame ngak tui njauk jalan ba tabiak, daok ilamo saong bruk pablei tabiak hu Pasak roh duah ba brei ilamu ngak nong daong brei. Urak ini Kapul pala njam VietGAP Jum pataom hu 30 sang hu mbaok tame, dom baoh sang halain hatain pambuak gauk, salih taneh ngak padai tapa pala njam piah hu rilo njam pabak ginup tui caong khin di dom labik blei ba tame dom siêu thị CoopMart. Tui kuhria, dalam tuk Tết thun ini Kapul meda pablei tabiak darak pasa yaok piluh tấn njam patam, baoh kraoh dom janih.

Di labik pala njam dalam sang halăm di xã Vĩnh An, huyện Củ Chi, sang saai Trần Văn Sỹ, urang dalam HTX Hải Nông daok pala 7000 m2 njam tui jalan salamat saong pabak ka dom siêu thị. Saai Sỹ brei thau, meng di tuk bac hu ilamo pala njam salamat, sang saai khang hatai buh jien tame labaih 180 triệu đồng piah padang ngak sang halăm saong ngak jalan pruh ia sit sit piah pala njam mek hu chất lượng glaong ba mai kein laba jang.

Di dom labik pala njam salamat di huyện Củ Chi dom harei ini bruk pala njam biak jar var, mikva daok caga njam ka tuk Tết daok mai tal. Saai Mai Bá Nghĩa, urang jakar ilamo di Viện Khoa học Kỹ thuật ngak nong gah maraong pan angaok tangin dom baoh paya that bahrau paik di bein mai, brei thau: “ini biak lac dom bruk pala njam salamat, hu mikva urang nong ngak catang tui jalan ngak hu pato pasram. Kayua yau nan ye, njam patam tuk paik blaoh tuk halei jeng hu manuac sia biak takre saong hu pablei haong yaom tani tanat. Tui kuhria mboh dahlau, Tết thun ini mikva dalam dom kapul pambuak gauk meda mbang Tết aval kayua njam patam baoh karuac salamat hadei di tuk jit Covid -19 pablei biak hu”.     

Meng dom bruk pala baoh tamun ia saong baoh paya, mikva hu pandar ilamo mek hu siam lagaih, năng suất tagok meng 10 -15%, hu labik tagok 20% dut saong dahlau dieh. Abih di nyu nan lac, mikva salih hu jalan sahaneng ka bruk pala njam salamat, ngak njauk tui ilamo pato tacei pacang caga halak halin nan ye njam patam tamuh siam, mek hu năng suất glaong saong oh hu ruak kik.

Tui ong Ngô Xuân Chinh, Phaok Yam ndok Pasak roh duah ba brei ilamo ngak nong (Viện Khoa học Kỹ thuật ngak nong gah maraong), di dalam huyện Củ Chi, danak dak daong ka mikva urang ngak nong tapa dom janih njam patam, yau ye: njam sabei, cải cúc, njam lang, tamun ia, baoh paya… Tuk peih ngak danak dak, pasak jeng hu pilih ruah mblang taneh, pilih sang urang nong  hu mbaok tame, ini jeng lac dom sang daok gaok rilo kan kandah dalam pala ngak saong pablei tabiak. Mikva hu mbaok tame ngak jeng hu daong meng bruk pilih pajaih, pala ngak tal bruk pablei hu tani tanat. Meng hu yau nan, năng suất njam patam mek hu kein laba kinh tế glaong jang rilo dut saong dahlau daih, jien mek tame di urang pala njam jeng tagok jang biak rilo.

Meng dom bruk salih phun padai tapa bruk pala njam patam ba mai kein laba kinh tế biak glaong, karja palei jeng hu pachreih mikva urang nong dalam dom hợp tác xã, Kapul pambuak gauk brei peih praong bruk ngak ini, piah caga pabak njam patam salamat biak praong ka Ban raya saong daong ka mikva tani tanat bruk ngak mbang./.

Urang lang: Thu Thao – 21/01