Tui jabat Công an ban ine Ha Noi, labik khuah di Khu B9 Kim Liên tok praong labaih 10met vuong, sumu 1/3 mblang sang  tal 1 di sang “ống” 3 tal. Dom pandap njauk apui khuah biak mbuan yau kayau, katak, radaih patuh…Min kayua sang hu padang ngak yau ống, tuk apui khuah  tal 1 ye sauk par tagok dom tal angaok, meyah oh thau nduac tabiak ye urang daok dalam sang biak mbuan metai. Min jeng njauk ndem lac, meyah thau nduac tabiak min sang oh hu jalan tathuak rup, mbuan njauk mblung thauk jru mek ba tal metai biak glong.  

Di rilo sang chung cư klak di Ha Noi daok hu bruk rilo urang pambuak tabiak ngak brei praong labik daok tui jalan yau Yuan lac “chuồng cọp”nan ye oh hu labik nduac tabiak tuk hu bala. Tui nan, po sang mek dom mbaik pasei pagam tame daning, blaoh mek kayau atau pasei praong tauk ala piah ngak brei praong laneing labik daok. Min dom labik peih praong nan nyu pacang abih labik tabiak tuk hu bala di yaok baoh sang chung cư. Kayua yau nan ye, tuk apui khuah, urang dalam sang kan nduac tabiak, daok gah padam khuah lahik abih rilo tukvak  piah yah “ var rimong”, tame sang daong dom urang daok gar dalam nan. Anak meta mboh lac, dom labik pambuak tabiak nan khang kajap du halei dak ngak brei kan kandah ka po sang du nan, ba mai rilo pandik harao dalam dom mbang apui khuah di Ha Noi tukvak tapa.  

Dahlau nan di quận Đống Đa, tukvak 12 tuk 45 minit harei 4/2, di sa bilik trọ labik canah 73, phố Tam Khương, phường Khương Thượng rah tabiak bruk apui khuah ngak brei 4 urang metai. Kayua sang oh hu jalan tathuak nan ye tuk apui khuah, 4 urang dalam sang oh nduac tabiak hu kayua pabah mbang sang trọ kareik  dahlau di nan, ba tal metai kayua mblung sauk apui saong khí độc.  

Bruk caga khuah tuk halei jeng brei ba tagok dang akok. Kayua lac tuk apui khuah, meyah patuah oh hu manuac metai ye drap ar jeng khut tayah trak. Nan ye, hatai sahaneng, jalan pacang apui khuah lac bruk njauk iek praong. Bruk pathau khan, pasang iek, tacei pato, langyah bruk ngak suan jalan pacang apui khuah jeng brei hu jhul khang, brei ngak gam gam saong ngak catang jang. Dalam tukvak tapa, dom asar kadha angaok nan hu Công an ban ine, gam haong rilo pakat peih ngak min oh ka hu yau hatai caong khin.  Rilo rahra jeng daok iek lap bruk pacang caga khuah, patuh. Nan ye, bruk khuah sang di labik  khu B9 Kim Liên meng blaoh yau sap preo khang ka bruk pacang khuah, padam khuah.    

Hadei meng bruk khuah di phường Kim Liên, quận hu tacei pato dom phường dalam quận hu sang chung cu klak, pathau khan jak ba bhap bini paglong hatai sahaneng pacang, caga khuah patuh di dom sang daok. Bhap bini brei sangka  tal dom labik pambuak talei điện mbuan khuah saong juai cuh vàng mã dalam dom sang daok, tahanek mbang huak di hành lang chung cư…Ngan saong dom labik ngak mbang pablei salih, abih di nyu nan lac  karaoke, quận hu jao ka gah Công an pasang iek veik bruk pacang caga khuah patuh. Meyah kurang dom harak gar pambuak tal, dom jabat chức năng khang hatai oh brei peih pabah mbang piah takik rah tabiak dom bruk pandik harao meng khuah patuh.

Taphia dom labik caik hatai sangka, jeng daok hu dom labik daok iek lap bruk pacang caga apui khuah. Tui nan, hu rilo quan karaoke, quán bar oh ka ginup dom bruk pacang, caga khuah patuh min daok peih ngak kayua hu jabat chức năng saong karja palei pambuan brei. Manuac sia mboh lac meyah iek lap bruk pacang caga khuah ye dom bruk pandik harao kayua apui khuah daok dui atah. 

Kayua yau nan ye dalam bruk pacang caga khuah patuh, meng tuk ini, yaok rahra, yaok baoh sang njauk salih jalan sahaneng, hu jalan pacang caga ka drei saong urang dalam sang. Langiu di nan, jabat chức năng njauk patagok bruk pasang iek, pacang cakak bruk ngak suan meng di tuk po đầu tư peih ngak he thong pacang khuah, padam khuah saong dalam luac tuk vak ngak bruk. Dom chung cư ngak suan bruk ba tabiak gah pacang khuah, padam khuah njauk hu pambuak trách nhiệm haong jabat, đơn vị, urang hu brei bruk tui iek labik nan. Plaih bruk tuh ka urang ini, urang daih oh cambaih laih,  juai caik ka khuah rah tabiak meng makna klak min caik veik pandik harao birau./.

Urang lang: Ai Nghiem -27/4/2022