Danak dak pabak ka bhap bini pasiam veik đô thị, hu bhap bini njauk hatai saong pachreih tui

Sang ong Nguyễn Văn Bằng daok dalam 2 baoh sang taphia gauk praong abih tih labaih 133m2 di Khu phố 5, phường Bửu Long, TP.Biên Hoà, tỉnh Đồng Nai. Bahrau ini taneh di sang ong Bằng njauk karja mek veik piah padang ngak jalan tapen kraong Đồng Nai. Yaom biyar jien taneh nan hu ban Biên Hoà kuhria tui yaom thun 2019. Dut saong yaom taneh urak ini ye glaong biar jang gauk biak praong. Oh njauk hatai haong yaom biyar jien ini, ong Bằng haong dom sang daok pak ini ngak harak pathau karja ban Biên Hòa tabiak tòa án. Ong Nguyễn Văn Bằng ndem lac: “Di pak ini kanja biyar jien ka drei 8tr sa m2, kanja pablei veik sa candaih taneh tái định cư lac 15tr/m2. Mek abih  paok jien di karja biyar jeng oh ginup piah padang baoh sang. Mayah ginup jien padang sang ye oh ginup jien biyar jien  taneh ka karja.”

Jeng deih yau nan, ong Trần Hùng Dũng, daok di xã Bình Tâm, ban Tân An, tỉnh Long An brei thau, sang ong 4 rai daok pak ini. Bahrau ini, karja mek veik 2.500m2 taneh piah peih praong jalan. Min yaom biyar jien biak bier ngak ka sang ong njauk khat lahik: “Biak di nyu yaom biyar jien ini lac oh lagaih, kayua 1m2 taneh bo oh samu haong yaom 1kg ralaow limo. Sang kak je tui yaom taneh daok, oh  lac taneh ngak padai. Jeng hu likau pasang iek veik sang dahlak, kayua sang dalak njauk karja mek veik abih taneh”

Bruk di ong Bằng daok di Đồng Nai saong ong Dũng daok Long An lac sa dalam biak rilo tavak tavaiy dalam bruk kuhria yaom, tabiak yaom biyar jien taneh njauk mek veik urak ini. Tui Paka 115 saong Paka 116 Hukum taneh riya 2013 hu ndem tal bruk tư vấn yaom taneh, min ka oh hu quy định khik kajap bruk tư vấn yaom taneh biak biai hu labik dang eng, bruk kaoh yaom taneh daok iek lap, daok kateik greik. Abih di nyu nan lac bruk ba tabiak brei thau dom harak gar di dom kapul taong yaom piah ka bhap bini saong dom jabat pambuak tal meda pasang iek.

Tui điểm C, khoản 1, Paka 112 Hukum taneh riya 2013, sa dalam dom adat taong yaom taneh lac brei lagaih haong yaom taneh di darak pasa. Yaok labik, yaok tinh, ban yaom taneh jeng karei di gauk, nan ye tuk ba tabiak ngak, tuk pandar yaom taneh tui quy định piah kaoh yaom taneh lac oh lagaih ba tal rilo kan kandah ka karja dom puk palei.

Tui ong Phan Minh Thành, Yam ndok Sở Tài Nguyên - Môi trường tỉnh Long An, bruk kak je taneh riya njauk tui yaom di darak pasa, oh iek tui yaom taneh lac hadom. Gam haong nan njauk klaak khung yaom taneh saong padang yaom taneh bahrau tui yaom di darak pasa.

Tui PGS-TS Phan Trung Hiền, Akaok Khoa Luật Đại học Cần Thơ, yaom taneh lac bruk hu ilamo. Kayua yau nan ye njauk ngak brei cambaih laih bruk taong yaom taneh haong bruk tabiak yaom taneh. Bruk taong yaom taneh njauk jao ka Akaok Hội đồng bhap bini atau Thường trực HĐ bhap bini saong  njauk brei ka bhap bini hu mbaok tame saong hu sap ndem panuac puac: “Gah hu makna praong di abih dalam bruk taong yaom taneh lac dom gah chức năng lang yah ka yaom taneh. Hadei di tuk hu brei ngak blaoh ye payua kết quả di Kapul taong yaom nan tapa dom jabat hành chính kanja yau ye UB bhap bini saong dom sở, dom gah piah ginum biai tabiak yaom taneh. Meng nan khik ka yaom taneh hu cambaih laih, samu gauk piah ka bhap bini meda taduan hu jien biyar njauk haong dom khat di drei.”

Kaoh yaom taneh tuk halei jeng lac bruk oh mbuan, kayua yau nan ye bruk pasiam jalan tabiak yaom taneh, abih di nyu nan lac bruk taong yaom brei hu jao quyền ka njauk labik. Plaih bruk yau Yuan lac “vừa đá bóng, vừa thổi còi” atau "thẩm quyền kép", meng nan khik kajap kein laba samu gauk di dom gah hu pambuak tal./.

Urang lang: Thu Thao – 19/10