Tui pathau khan di Mintri LĐTB&XH, vaktu 2015 - 2020, kuhria rah tapa yaok thun hu 2.000 uranaih matai kayua mblung ia. Yaom lac dom uranaih mblung ia trun meneing dalam dom thun jaik ini, min mblung ia jeng daok lac sa dalam dom makna dang akaok ba tal metai lahik di uranaih.

Njauk caik hatai lac, matai kayua mblung ia di uranaih hu tal meteh dom uranaih matai kayua bala, rah tabiak rilo di puk palei. Uranaih bhum palei pala mbuan njauk mblung ia glaong jang 2 mbang uranaih di ban sit ban praong saong 55% uranaih matai kayua mblung ia lac anek di dom sang kathaot di bhum palei pala.

Dom bruk mblung ia uranaih rah tabiak di dom bilan hè kayua langik pandiak, abih di nyu lac tuk anek saih yam tame mbang padeih hè. Thun ini, bahrau tame akaok bilan hè, bilan 4, bilan 5, min hu rilo bruk mblung ia pandik harao. Ini lac bruk pandik harao oh hu hagait pabak hu ka amaik ame, ka gauk gar di uraniah matai mblung ia, jeng lac bruk suh sah, duh hatai di dom amaik ame.

Dom chuyên gia tacei brei mboh lac hu rilo makna ba tal mblung ia. Việt Nam lac taneh ia hu rilo kraong ribaong, tapa yaok pataom mboh hu jaik 2.360 baoh kraong praong sit, di dom bhum palei pala, dom kraong ribaong, binek kavei jeng hu biak rilo, saong abih di nyu lac hu labaih 3.200 km takai tasik hu ba mbuan lagaih piah cakrok du lịch, kinh tế - xã hội. Min ini jeng lac makna ngak brei yaok rabau urang Việt Nam matai yaok thun kayua mblung ia, dalam nan rilo meng lac uranaih.

Gauk dar dalam sang, menuac sia puk palei oh ka khik kajap salamat, meda ba tal mblung ia uranaih. Rilo labik daok hu lubang ia oh gum pacang, rilo danak dak padang ngak oh hu paga pacang, kurang biển báo di dom lubang ia atau oh lam sre dom lubang ia hadei di salah bruk padang ngak; rilo bingun, danao ia pruh ka phun pala dalam dom hamu, puh, labik rahra daok oh khik hu salamat. Dom labik kraong, danao ia dalam, ia nduac khang jaik puk palei oh hu paga pacang, oh hu biển brei thau bruk mbuan ba tal bala, matai lahik

Dalam tuk nan, rilo uranaih kurang thau ilamu khik caga salamat dalam ia, ilamu daong ka menuac mblung ia, oh ka thau caluai ia. Meng nan, dom adei oh thau hu labik ia halei mbuan hu bala, nan ye trun caluai, oh thau ilamu daong menuac mblung ia bo tuk mboh ayut njauk mblung ia ye chat trun daong, ba tal metai rilo adei sa mbang haong gauk.

Mblung ia jeng kayua takik caik hatai, kayua var tanye di amaik ame, caik ka uraniah eng drei me-in bui sambai di dom labik mbuan hu bala yau ye: kraong, craoh, bingun, danao...

Tui dom chuyên gia, bruk pacang caga mblung ia uranaih brei hu ba tagok dang akaok. Dalam nan, bruk praong camereip lac brei pato ka uraniah thau caluai. Plaih mblung ia, megru caluai saoh lac oh ka ginup, njauk pato ilamu salamat ka uraniah. Nan lac pato ka dom adei thau dom ilamu salamat tuk trun ia saong thau labik ia halei mbuan hu bala piah plaih, nyaik. Tuk uranaih hu ilamu yau nan, dom amaik ame jeng trun hu dom duh hatai, dom suh sah.

Piah pacang caga mblung ia di uranaih, dom chuyên gia kakei lac, dom puk palei njauk pasang iek labik bhian hu bala mblung ia piah pacang caga, khik kajap salamat ka uranaih dalam tuk padeih hè, bilan hajan rabuk saong bilan ia ndik.

Meda ndom lac, bala mblung ia hu khan brei thau meng lavik mai, min nyu daok jeng bruk pandik harao, caik ka dom jabat karja, dom labik pato megru saong dalam yaok baoh sang, yaok menuac irang, brei patagok jang dom jalan pacang, plaih mblung ia piah khik caga uranaih. Tuk halei ngak hu samu gauk dom jalan ngak saong hu bruk ba tangin tame di amaik ame, di sang bac saong di menuac sia puk palei, bruk mblung ia di uranaih meng hu jhul kadun likuk./.