Jien mek tame bier, bruk ngak glaih glar saong mbuan gaok bala ngak ka rilo urang taong ap ikan klaak gilai tagok ar duah bruk ngak karei. Lưu Sơn, urang vak di rayo sap ndom Viet Nam daok di TP.HCM hu kadha vak ndem ka bruk ini:

Tui rilo po gilai di tỉnh Bà Ria -Vũng Tàu, makna ba tal bruk kurang urang ngak nao tasik lac jien mek tame di urang nao tasik dak harei dak trun, bruk ngak glaih glar, mbuan gaok bala, rilo meng ngak di tuk melam. Urang ngak klaak tasik tagok ar ngak phụ hồ, ngak kong nhan…gam hu jien mek tame tani tanat gam hu daok jaik gauk gar dalam sang. Saai Lê Văn Tám, lac sa urang ngak nao tasik di xã Phước Tỉnh, huyện Long Điền khan lac, yaok harei urang ngak di tasik hu biyar jien meng 150-200 ribau đồng, dalam tuk nan nao ngak phụ hồ duah hu meng 300- 400 ribau đồng:  "Nao gilai taong cap oh ginup jien ka raidiuk nan ye duah bruk karei ngak. Kayua yaom jien xăng manyek, pandap mbang yaok harei tagok glaong, nan ye yaok mbang nao tasik urang ngak tok hu biyar 2-3 triệu đồng. Lac urang ngak ikan, kol dahlak caong ngak habar ka yaom xăng manjek trun bier piah ka adei saai ngak bruk duah hu jien mbang cai, daok jien sahui glaong lo  oh ginup ka raidiuk".

Tui Sở Ngak nong saong patagok palei pala tỉnh Bà Rịa- Vũng Tàu, urak ini taong abih dom gilai ikan di tỉnh trun 20%, meng 5.812 sruh gam haong labaih 33.000 urang ngak di thun 2020 trun daok 4.671 sruh saong dom urang ngak jeng trun tui.

Langiu di nan, nao tasik lac bruk ngak meng kan mai, ame patoa veik ka anek. Dom thun jaik di ini, anek bhik di urang taong cap ikan hu bac magru rilo bruk ngak karei di gauk nan ye takik nao tasik. Tui yaok pataom tok daok labaih 10% urang ngak bruk nao tasik lac urang daok di palei, daok veik lac mai meng dom tinh, ban karei nan ye kan kandah jang. Urang ngak bruk nao tasik jeng urang ngak tui bilan, urang nao tasik oh daok kak kajap suai lavik haong po gilai bo salih tapa bruk ngak karei atau salih meng gilai ini tapa gilai deih.

Tui ong Lâm Văn Hồng, akaok UBND huyện Long Điền, bhian di nyu hadei di mbang nao tasik, po gilai kaoh abih phun jien, paok jien daok veik hu parabha ka dom urang nao gilai tui panuac sanya dahlau. Min jaik di ini, yaom xang menyek tagok glaong, kaya ikan takik nan ye urang nao tasik ieu biyar jien ngak tui bilan atau tui mbang nao saong jien mek tame jeng oh glaong.Ong Hồng daok brei thau lac: "Mboh lac urak ini po gilai ikan taong cap di tasik atah pagam pambak biak rilo tame urang ngak di gilai. Mikva urang taong cap ikan ka oh khang hatai nao tasik kayua yaom pandap glaong bo kaya ikan dak harei dak takik. Thun halei jeng kurang urang ngak, yaom lac mikva hu caga ginup ia patau, pandap mbang menyum min ka oh tabiak tasik kayua urang ngak di mangaok gilai ka oh ginup".

 Tui rilo chuyên gia, suai lavik, dom tinh, ban njauk kuhria tal bruk quy hoạch bhum taong cap, daong ka urang nao tasik cak rok patagok công nghệ taong cap ikan hu ilamo, bahrau. Ngak hu yau nan, urang taong ikan meda pilih ruah hu njauk janih kaya ikan taong cap, khik caga hu halau kaya ikan. Gah chức năng jeng brei hu jalan khik tani tanat yaom kaom saong blei tame, rik daong patagok jien mek tame ka urang ngak bruk nao tasik./.