Tui panuac di rilo amaik ame anek saih daok di Bà Rịa – Vũng Tàu, bruk HĐ bhap bini tỉnh patabiak 2 Sarak (10 saong 11/2023) tabiak yaom mek jien bac uranaih mầm non 5 thun, anek saih THCS saong daong jien bac ka uranaih mầm non 3, 4 thun, anek saih THPT saong urang bac di labik giáo dụci thường xuyên dalam ban lac biak njauk tukvak, pabak hatai caong di bhap bini. Kayua lac, yaom jien bac dom ratuh rabau đồng sa bilan, oh rilo min ngan saong urang ngak, nan lac sa yaom jien oh sit. Langiu di jien bac, amaik ame anek saih daok kuhria rilo janih jien karei yau ye jien blei pandap bac, blei khan ao nao bac, jien cơ sở vật chất, kadung jien tal bac, bac thêm…Tui kuhria oh ka ginup abih, dom janih jien nan di sa baoh sang urang ngak, hu 2 urang anek bac phổ thông jeng tagok tal jaik pluh triệu đồng. Amuk Cao Thị Minh Hải daok di phường Long Tâm, ban Bà Rịa khan lac: "Tapa tukvak jit ruak dui atah, kan kandah rilo gah, rilo amaik ame anek saih yau kol dahlak jeng ka oh tani tanat bruk ngak, hu urang ka oh duah hu veik bruk ngak. Nan ye jien bac lac biak kan kandah ka dom sang urang ngak yau kol dahlak". 

Daok tui panuac khan di HĐ bhap bini tỉnh Bà Rịa – Vũng Tàu, bruk daong jien bac piah ieu pataom uraniah nhà trẻ, uranaih mẫu giáo dalam umo nao bac, patui jalan ngak siam bruk an sinh xã hội, patrun naong trak di bhap bini ka dom janih jien tuk tame thun bac, khik siam mekre ka dom urang hu mbang tui sarak; padang jalan yam tal bruk pato pakai phổ thông oh mek jien di taong abih janih. UBND tỉnh Bà Rịa - Vũng Tàu hu tacei pato gah pato megru padang sarak daong piah pandar meng di thun bac 2023-2024.

Thun bac ini, dalam tỉnh hu 470 sang bac saong 262 kapul uranaih tư thục hu daong jien bac. Tui kuhria, yaom jien daong jien bac lac 327 tỷ đồng. Ong Mai Ngọc Thuận, Phaok akaok HĐ bhap bini tỉnh Bà Rịa - Vũng Tàu brei thau, tỉnh brei rami ramik, kuhri kuhria kadung jien karja tỉnh saong brei daong dalam thun bac 2023-2024: "Ini lac sarak praong, jeng brei kham merat ngak. Piah hu jien brei ka bruk ini, ye langiu di bruk tagok yaom jien mek tame, tinh brei cai pandar kali kalih veik piah peih bruk daong jien bac ka anek saih".

Amuk Trần Thị Ngọc Châu, Yam ndok Sở pato Megru tỉnh Bà Rịa – Vũng Tàu daok brei thau lac, ngan saong uranaih mầm non umo ala 5 thun, anek saih THPT saong giáo dục thường xuyên hu daong binah jien glaong jang di thun bac 2022-2023 duk haong yaom jien bac di thun bac 2021-2022: "Jien bac lac bruk klah rabha di karja ngan saong bhap bini. Nan ye bhap bini jeng daok buh jien, min buh samu yaom thun blaoh, nan lac Karja daong ndoa naong meneing piah daong ka amaik ame anek saih dalam tỉnh ngan saong anek saih công lập jeng yau langiu công lập di 2 thun bac"

Meda ndom menyai lac, daong oh mek jien atau trun meneing jien bac di dom pakat bac di Bà Rịa – Vũng Tàu lac sa Sarak siam lagaih, bak hatai anit ranam, rik daong khik kajap an sinh xã hội saong daong peih ngak hu bruk paglaong yaom raidiuk saong haniem phul di bhap bini daok dalam tỉnh. Tapa nan peih tabiak jalan ka yaok uranaih jeng hu nao bac, abih di nyu lac uranaih kan kathaot, uranaih sang kan kandah oh klaak meteh dhi bruk bac ta-a kayua oh nduac hu jien bac./.