Meng 80 thun umo, jaik 57 thun umo Đảng, 14 thun ngak Tổng Bí thư, labaih 2 thun ngak akaok negar, labaih 5 thun ngak akaok Quốc hội, ông Nguyễn Phú Trọng tuk halei jeng sahneng kuhria, abih hatung hatian ka bruk cách mạng di Đảng sang bangsa, gam haong Trung ương Đảng, Rajaei, pan akaok ba jalan ka abih urang Đảng, abih bol bhap rahra, abih bol bala drei mek hu rilo jak jeng praong hu yaom gah sajarah.

"Taneh ia drei oh ka tuk halei hu prein khang, labik dang saong angan je di angaok dunya yau harei ini, hu rilo jang dom jalan lagaih piah khang takai yam angaok jalan bo Đảng drei, bhap bini drei saong Wa Hồ praong uranam pilih ruah blaoh."

Ini lac panuac di Tổng Bí thư Nguyễn Phú Trọng di Nyaom biai mbang ka 1 mBan Chấp hành Trung ương Đảng mbang XIII saong di rilo nyaom biai praong tuk Tổng Bí thư mai hu mbaok saong hu dom panuac ndom puac, tacei pato praong. Oh lac saoh saoh bo Tổng Bí thư hu ndom tal kadha ini tuk anak meta brei mboh lac, hadei di jaik 40 thun peih bruk salih bharau, meng sa tanch ia kan kathaot, hu labik ngak saong ilamu ngak daok biar, tal urak ini, Việt Nam hu yam tagaok jeng sa taneh ia daok cakrok, hu jien mek tame mbiah, ilamu, xã hội daok cakrok, raidiuk mbang ngui daok dang di bhap bini hu siam tagok, bruk padang Đảng saong hệ thống chính trị hu salih bharau khang, bruk jum pataom bangsa oh padeih hu pakhang pakajap, chính trị, xã hội tani tanat, quốc phòng - an ninh, độc lập, chủ quyền hu khik kajap, labik dang saong angan je di taneh ia dak harei dak hu pok glaong angaok dunya:

"Drei lac anek taco wa Hồ, Đảng lạc Đảng Cộng sản Việt Nam, bangsa lac bangsa Việt Nam, taneh ia ini tantu cakrok nao tagok oh brei kadun likuk duk haong dom taneh ia karei, oh lah urang karei, kol drei brei thau yau nan saong brei hu hatai khang yau nan."

Piah ba taneh ia patui jalan cakrok yam takai nao samu haong dom taneh ia praong khang di dunya yau hatai caong di Wa Hồ, tui Tổng Bí thư, langiu di bruk njauk gauk, sa hatung hatian di abih hệ thống chính trị saong di abih bhap bini dalam taneh ia, jeng brei biak ick praong bruk urang jakar. Mai hu mbaok saong brei panuac tacei pato di mbang nyaom camereip di Rajaei vaktu 2021-2026, Tổng Bí thư Nguyễn Phú Trọng hu panuac ieu, ngak brei siam jang bruk urang jakar, abih di nyu lac bruk khik iek, brei panuac, taong yaom urang jakar piah pilih ruah, brei bruk njauk ka dom menuac naih, gheih; "cần, kiệm, liêm, chính", "chí công vô tư"; abih hatung hatian ka taneh ia, ka rahra, tame pan akaok ba jalan bộ máy rajaei saong karja dom pakat. Tổng Bí thư kakei lac:

"Jhui "maong menuk lac waok", "jhui mboh bhong lac tasak", jhui tui hatai hawa bo laik tame dom kein laba oh siam, dom bruk ngak jhak tal mbaok mata, angan je. Khang hatai mesruh pacang dom menuac khut, hu hatai sahneng oh siam gah chính trị, đạo đức, jalan diukrai, mesruh pacang bruk "chạy chức, chạy quyền, cục bộ", pilih ruah dahlau menuac di sang drei, gauk gar di drei oh ginup ilamu."

Daok di mbang peih mbaok Mbang nyaom ka 1, Quốc hội mbang XV di harei 20/7/2021, brei thau lac jabat lambaok glaong abih di bhap bini, jabat quyền lực karja glaong abih di taneh ia Cộng hoà xã hội chủ nghĩa Việt Nam, Tổng Bí thư Nguyễn Phú Trọng caong lạc, Quốc hội njauk patagok dom jak jeng saong ilamu di 75 thun tapa, patui bruk salih bharau, paglaong jang dom siam mekre saong kein laba di bruk ngak, piah pabak siam abih bruk chính trị di tanch ia dalam tukvak bahrau. Caong hu yau nan, Tổng Bí thư Nguyễn Phú Trọng jeng oh var kakei lac:

 "Taong abih dom urang Quốc hội kol drei khoá ini njauk paglaong trách nhiệm, abih hatai ka taneh ia, ka bhap bini, duh ka taneh ia, duh ka rahra, bhian pasram megru, khik ramik hatung hatian siam mekre, paglaong ilamu, nao jaik saong caik hatai tui pang hatai caong di bhap bini, ngak hu siam di abih bruk bo cử trì saong bhap bini jao brei."

Daok gah bruk đối ngoại, mai hu mbaok saong brei panuac di nyaom biai Đối ngoại pakat negar, Tổng Bí thư Nguyễn Phú Trọng hu ndom ka bruk dak padang, cakrok di Gah đối ngoại, ngoại giao "phun kreim Việt Nam: gha khang, rup kajap, phun lamin nao, megei mai, ndung bak suan yava, hatung hatian di bangsa Việt Nam" saong dak harei dak hu dunya pok meyaom:

"Tantu gah ngoại giao brei patui hu jalan sahneng jalan ngak di bruk Ngoại Giao saman Hồ Chí Minh saong patui ilamu đổi ngoại khang kadang min sron mbon siam mekre di bangsa Việt Nam, patui bruk salih bahrau, cakrok, ngak ka đối ngoại ngoại giao Việt Nam khang kadang abih gah ndung bak rup binguk phun kreim Việt Nam."

Sa dalam dom kadha caik veik dalam hatai ka bruk mesruh pacang tham nhũng, tiêu cực meng akaok nhiệm kỳ mbang 11 tal urak ini, lac bruk dak padang, ramik pasiam Đảng daok hu jhul khang pambuak pagam haong rilo panuac ndom biak hu makna di Tổng Bí thư Nguyễn Phú Trọng, Akaok mBan Tacei pato pakat negar ka pacang caga tham nhũng, tiêu cực. Tổng Bí thư ndom lac, meng bruk padang mBan Tacei pato pakat negar (di Bộ Chính trị) tal urak ini, bruk pacang caga tham nhũng, tiêu cực "hu jeng bruk praong, lac jalan oh salih karei hu". Nan ye, "yaok bruk huac hatai gauk, plaih nyaik, hữu khuynh, "kabum pabah mbang jien” atau cực đoan, mek bruk phê bình piah ndom jhak urang karei, ngak brei srau kadau nội bộ, jeng lac bruk oh njauk". Tui Tổng Bí thư, dak padang, ramik pasiam Đảng lac bruk dak padang tổ chức, dak padang anek menuac, lac bruk anek menuac, biak mbuan gaok tal mbaok meta, angan je, kein laba, talei rohim di anek menuac. Kayua yau nan ye, caik ka yaok urang kol drei brei eng drei phê bình, sahneng kuhria, blac raih dom bruk siam, dom bruk oh ka siam di rup drei, brei taong yaom ka urang karei. Meyah oh tự giác, oh tapak hatai, ye mbuan laik tame bruk lac tok mboh bruk siam mekre di drei rilo jang urang karei, dalam tuk tok mboh bruk oh siam di urang karei rilo jang:

 "Dahlak hu rilo mbang ndom blaoh, urak ini likau ndom veik lac dom urang halei hu hatai sahneng yau nan, njauk daok sa gah brei ka urang karei ngak, rai menuac tok hu sa mbang diuk, jhui caik ka harit harao, aih oh kayua dom bruk ngak jhak, oh sahneng hagait tal mbaok meta angan je, jien ndo rilo piah ngak hagait, metai meda ba tui hu halei. Mbaok meta angan je meng lac bruk praong di abih."

Dalam gah ilamu, tuk daok diuk di dunya, Tổng Bí thư Nguyễn Phú Trọng jeng hu ndom cambaih ka yaom glaong biak praong di ilamu lac prein khang cakrok di menuac sia. Meng hu sa ilamu ndung bak ilamu bangsa, bo bangsa drei yam tapa yaok kan kandah, oh padeih yam tagok tui jalan nao di sajarah. Kayua yau nan ye, Tổng Bí thư Nguyễn Phú Trọng hu panuac ieu abih hệ thống chính trị, abih urang Đảng, abih rahra, abih bol bala njauk patui jalan sahneng njauk ka yaom glaong di ilamu, kayua lac dalam tuk pan akaok ba jalan cach mạng, Đảng Cộng sản Việt Nam saong Chủ tịch Hồ Chí Minh tuk halei jeng paglaong bruk di ilamu, tuk halei jeng maong ilamu lac sa gah đấu tranh cách mạng, lac mbaik troy "pasang jalan ka bol bhap rahra nao". Di nyaom biai ilamu pakat negar di harei 24/11/2021, Tổng Bí thư Nguyễn Phú Trọng jeng hu caik veik sa panuac ndom biak hu yaom glong njom tame dalam hatung  hatain:

"Urang lac mbaok meta menuac hu ilamu, sa baoh sang hu ilamu, sa bangsa hu ilamu, blaoh jalan diukrai hu ilamu, jalan ndom puac hu ilamu ... daok dom hagaih kanjah jhak, bruk ngak suan adat hukum, biak jhak biak kanjah lac oh hu ilamu, haniem phul di anek menuac oh lac di labik hu rilo jien ndo, drap ar, pandap mbang bingi, ngui cuk mekre, bo daok lac bruk siam hatung hatai, hu daok dalam anit ranam saong hatai siam mekre, thau anit ka urang karei, thau bruk siam, bruk jhak".

Tuk daok diuk di dunya, tuk caong ndom brei thau ka hatung hatai di drei, Tổng Bí thư Nguyễn Phú Trọng bhian ndom veik sa ayat dalam baoh tapuk dane angan “Thép đã tôi thế đấy" di urang vak Liên Xô, lac Nikolai Ostrovsky:

 "Janih hu yaom glaong abih di anek menuac lac raidiuk saong mbaok meta angan je, kayua rai menuac tok diukrai hu di dunya ini sa mbang min.. Brei diukrai yau habar ka nyu plaih di harit harao, aih oh kayua dom thun bilan diukrai oh tabiak hagait, diukrai palai pajoa, piah plaih di melau mbaok meta kayua dom bruk ngak kanjah jhak, njauk manuac sia iek lap, piah tal tuk matai nao, kol drei meda dah mbaok meta mboh lac: Taong abih rai di drei, taong abih prein di drei, drei buh brei abih ka bruk siam mekre abih di dunya bruk mesuh peih paha bangsa, peih paha anek memuac, ba mai haniem phul ka bhap bini!"./.