Bình Phước hu brei angan lac “pasak pa-aok blait” praong abih di taneh ia haong taneh pala praong tal jaik 150.000 ha. Baoh pa-aok blait yaok thun hu jaik 200.000 tấn. Pa-aok blait Bình Phước hu angan lac siam, chat luong glaong, pahe bingi saong hu rilo urang takre di darak pasa dalam saong langiu taneh ia. Min, thun ini, kayua pandiak bhang tua riya dui atah, pa-aok blait Bình Phước trun biak khang. Tui kuhria, baoh pa-aok blait tok mek hu 10,5 tạ/ha, trun 1 tạ/ha dut saong thun blaoh, lac bier di abih kuhria dalam 4 thun tapa.

Amuk Trần Thị Lan, daok di palei 10, xã Đắk Ơ, huyện Bù Gia Mập khan lac: Sang amuk hu 3ha taneh pa-aok blait, thun ini yaok ha paik hu 5 tạ meteh min, trun jaik sa mateh dut saong thun blaoh. Baoh hu takik nan ye jien mek tame oh glaong, ngak ka raidiuk biak kan kandah. Rilo baoh sang laik tame bruk kurang phun jien piah sangka phun pa-aok. “Mayah sang halei hu jien ye buh tame blei khak bau, sang halei kathaot ye tal urak ini jeng ka oh hu jien blei khak bau buh ka phun. Urang hu ye oh ndem hagait, daok urang kathaot tok thau likau daong phun jien, daong masaiy jien laba lap piah pasiam veik, pala veik dom phun matai”.

Dreih yau pa-aok blait di Bình Phước, makhut – lac sa janih baoh kayau angan je di tỉnh Bình Dương jeng daok dang anak bruk takik  baoh kayua pandiak bhang tua riya. Tui panuac khan di dom sang bein, thun ini, baoh makhut pak Bình Dương trun labaih 70% dut saong thun blaoh. Rilo sang bein pala makhut kham marat pandar dom jalan pruh ia, min kayua langik pandiak dui atah ngak ka phun makhut oh ginup ia piah tamuh praong saong tabiak baoh. Ong Phan Văn Châu, urang daok di xã An Sơn, TP.Thuận An, tỉnh Bình Dương brei thau: “Langik thun blaoh pandiak lo, ia meng kraong jeng takik tame bein. Sang dahlak jeng hu pruh meng ia bingun, ia mac min oh ginup. Tal tuk hajan, makhut meng tabiak bingu ye jaruh jaik abih. Makhut gaok langik pandiak ye oh tabiak bingu, daok mayah tabiak bingu bo gaok hajan lac jaruh chip. Nan ye, thun ini mek hu meng 30-35% dut saong thun blaoh lac biak patuah ka po bein”.

Langik pandiak dui atah oh lac ngak brei takik baoh bo baoh baoh pa-aok blait, makhut jeng oh siam, ngak khat lahik biak trak damak ka dom sang bein. Rilo sang bein laik tame khat lahik kayua baoh paik hu takik, yaom pablei bier nan ye njauk njim masaiy jien blei khak, jru halak piah sangka veik ka bein phun.

Anak bruk ini, rahra caong kanja hu dom jalan ngak piah pacang caga langik pandiak hu siam lagaih jang piah khik ka bruk ngak nong. Langiu di nan, hu dom sarak daong brei masaiy jien laba lap piah pasiam veik bruk pala ngak.

Ong Nguyễn Thanh Giàu, Akaok Kapul  urang ngak nong ban Thuận An brei thau, urak ini dalam ban hu labaih 600 ha makhut. Dahlau deih, tui Sarak ka 63 di UBND tỉnh Bình Dương hu daong khak drak, phun jien sangka bein phun mbang baoh ka mikva urang ngak nong. Min, urak ini sarak ini abih tukvak nan ye tinh daok pasang iek piah hu sarak bahrau daong ka urang ngak nong khik veik bein pala. Daok bruk kan kandah anak mata di urang ngak nong kayau phun pala takik baoh, Kapul hu panuac likau dom gah hu jalan daong brei masaiy phun jien."Dalam dom mbang hop yao mban, Kapul jeng hu panuac likau pasang iek. Kayua gah daong urang ngak nong jeng biak rilo, nan ye njauk hu bruk pambuak gauk di dom gah, dom pakat meng ngak hu. Dalam tuk daok cang daong, Pasak jeng hu pambuak bruk haong Pasak pato bruk ngak di tinh pato pasram katut harei ka urang ngak nong ka bruk khik iek, sangka bein phun mbang baoh hadei di tuk paik blaoh”.

Ong Trần Văn Phương, Phaok Yam ndok So Ngak nong saong Patagok palei pala tỉnh Bình Phước brei thau: baoh pa-aok blait trun daok biak takik oh lac kayua langik pandiak bo daok kayua bein phun pa-aok blait taha, pala meng pajaih klaak. Piah langyah bruk ini, taphia di bruk buh jien tame padang ngak dom kraong ribaong, Bình Phước meda peih bruk pasang iek, pilih ruah saong cong nhan dom pajaih pa-aok blait lagaih haong langik tasik, taneh riya di bhum palei, piah salih ka dom mblang taneh pa-aok blait klak takik baoh.

Pandiak bhang daok lac sa bruk trak damak ngak jhak tal bruk ngak nong saong raidiuk di rahra daok di rilo bhum palei. Kayua yau nan ye, njauk hu bruk rik prein ba tangin tame di abih hệ thống chính trị saong rahra piah jhul khang bruk pacang caga pandiak bhang, tatua riya, khik ka bruk ngak nong saong paglaong raidiuk di rahra./.