Taneh pala pa-ok di Đồng Tháp urak ini labaih 14.000 ha. Dalam nan huyện Cao Lãnh saong ban sit Cao Lãnh hu tal 63% dom taneh pala di tỉnh.

Mboh hu bruk kham merat dalam pala ngak saong dak padang chất lượng di baoh pa-ok Cao Lãnh, thun 2019, Cục Sở hữu trí tuệ hu brei harak tut angan tacei pato địa lý "Cao Lãnh" ka pa-ok. Tui nan, hu pa-ok xoài cát chu saong xoài cát, brei mboh bruk biak karei di pa-ok pak ini haong pa-ok di dom labik karei.

Tuk hu tacei pato địa lí, pa-ok di dom doanh nghiệp jeng khang hatai angaok jalan pabak ka urang blei mbang. Ong Lê Quốc Trung, Yam ndok Cty TNHH Kaya nong hacih T&H – huyện Cao Lãnh ndom lac:

“Tuk hu tacei pato địa lí ye pa-ok pablei hu mbuan jang biak rilo. Kayua nan lac chứng nhận hu Cục Sở hữu trí tuệ pasang iek dom pandap dahlau di tuk ba tabiak darak pasar yau habar. Padang hu hatai jia di urang blei biak praong”.

Urak ini, huyện Cao Lãnh hu labaih 70 labik saong 4 doanh nghiệp daok blei saong chế biến pa-ok. Ini lac bruk biak siam, brei mboh yaom glaong di pa-ok tuk hu tacei pato địa lý “Cao Lãnh”. Phun pa-ok hu ba mai kein laba ka bhap bini saong daong ka tỉnh jhul tagok bruk ngak nong tui jalan bahrau.

Pa-ok Cao Lãnh yamen saong pahe bingi biak karei, karei jang dom baoh pa-ok di dom labik karei. Langiu di nan, pa-ok hu vitamin C saong saradang glaong, ia mbiah. Tiến sĩ Nguyễn Thành Tài, Phaok Yam ndok Sở Ilamu saong Kong nghe tỉnh Đồng Tháp brei thau:

“Kol dahlak pataom tame pambuak bruk haong gah chức năng piah cakrok pa-ok dalam tukvak anak tal. Dua tra lac padang bruk tạo lập, khik ramik, patagok dom tacei pato địa lý, dalam nan hu tacei pato địa lý ka pa-ok. Meng bruk ngak di drei, Sở ilamu kong nghe sangka roh duah jalan ngak meng dom viện, dom sang bac ka pajaih, quy hoạch, kong nghe hadei di tuk paik baoh, dui atah tukvak khik piah, ba brei dom DN, HTX, Hội quán”.

Urak ini, tỉnh Đồng Tháp hu jaik 34% taneh pala pa-ok ngak tui GAP saong daok tagok tapa yaok thun. Meng langik tasik taneh riya siam lagaih saong bruk kham merat paglaong chất lượng di po bein, pa-ok cát chu daok jeng sa janih phun hu pala rilo di tỉnh. Phun oh lac praong siam bo daok brei baoh siam jang duk haong pa-ok karei. Ong Võ Thanh Tuấn, Akaok kapul gah pa-ok tỉnh Đồng Tháp daok brei thau lac:

“Dahlau daih dom kapul nyaom meng hu pabak brei tacei pato “Cao Lãnh” ka baoh pa-ok. Min tukvak jaik ini, hu peih praong ka dom baoh sang, ka menuac urang. Anak tal, kol dahlak brei kham merat rilo jang. Dalam thun ini pataom tame pathau khan praong dalam ka urang nong, po bein tut angan pabak brei tacei pato địa lý ka baoh pa-ok”.

Bhap bini Đồng Tháp kham merat ba ilamu saong kong nghe tame pala, ngak saong khik piah pa-ok, khik kajap chất lượng piah ba tabiak darak pasar baoh pa-ok hacih, pabak dom bruk hacih sa-at salamat pandap mbang. Ngan saong pandap caga pablei tabiak negar langiu, tỉnh hu caga gah mã số bhum pala, dut iek jit ruak saong caga pandar kong nghe ngak la-an tui hatai caong di dom taneh ia blei tame. Meng bruk kham merat di abih hệ thống chính trị, caong lac baoh pa-ok hu tacei pato địa lí Cao Lãnh hu nao tal rilo darak pasar dalam saong langiu taneh ia./.