Bein tanah tamekai di sang ong Huỳnh Hoàng Anh, daok di palei Sở Tại, xã Đông Thới, huyện Cái Nước, tỉnh Cà Mau daok tamuh hijao siam. Ong pala janih tamekai vil, baoh praong piah ka rahra di ini blei mai caik ieik tuk masa Tết. Phun tamakai tabiak baoh mada rabung siam, langik tasik siam lagaih, ong Hoàng Anh kuhria hu yaom tamekai meng 10 đồng/kg tagok ye bilan tamekai thun ini sang gait meda hu jien mek tame yaok piluh trieu dong piah mbang Tết: "Thun ini lagaih jang thun dahlau, daok tabiak baoh bo langik pandiak yau ini mboh njauk paje, mbuan tabiak baoh jang. Talei baoh meng 3 - 4 kg; siam veik ye baoh meng 5 - 6 kg jeng hu. Thun ini pala tantu njauk lagaih 5 tấn tamakai".
Bilan tamekai thun ini di sang ong Huỳnh Hoàng Anh lagaih jang thun dahlau. Thun ini, ong abih hatai pala ralo jang dua mbang mbang taneh pala tamekai, ralo labaih 2.000m2, kayua thun blaoh pala iek hu jak jeng jalan mek bai bạt đầm raong hadang pabak, khik piah ia piah pruh piah mboh kein laba glaong.
Jalan ngak di ong biak mbuan, kuhria yaok 3m ong kuac sa ribaong nduac rah tui jalan atah di taneh pala tamekai, praong 0,7m saong dalam 0,5m. Hadei di nan, ong pandar bai urang raong hadang oh daok pandar veik, tauk mala ribaong, blaoh njuk ia di bingun brei ka nyu kandaong blaoh meng mek pruh ia ka phun tamekai.
Oh lac yau nan, ong Hoàng Anh daok pandar khan bai ma-aom urang ngak nong bhian pandar lang di mangaok mbaok ro, salih ka pon nerang brei pala tamekai. Meng nan, daong pacang caga hareik hareim saong pacang caga langik kan kandah, hajan hangin oh lagaih.
Ong Hoàng Anh brei thau, ilamo pala tamekai oh kan. Kan kandah abih ngan haong urang pala di ini ieu lac bhum taneh raong hadang njauk njom ia mbak yau nan ye njauk ngak pasiam veik brei ka taneh saong caong hu ia taba piah pruh tuh ka phun tamakai, ka baoh tamekai meng praong siam. Bruk cuak maom khan bai piah khik ia ka tanah pala, jeng ye khik hu ia siam piah ka phun tamakai. Abih di nyu nan lac, sangka jeng hanjul jang biak rilo. Urang pala nao kreih ribaong dang pruh ia hu brei ka dua gah ro, njual sanang jang tui pruh ia meng kadung yau dahlau deih.
Saai Nguyễn Văn Quân urang di ini daok pandar jalan ngak yau ini piah pala tamekai taong yaom lac: "Samar jang, urang ngak jeng mboh njual jang biak rilo. Tamekai daok sit ye sa harei pruh sa mbang, tal tuk tabiak baoh ye harei njauk pruh 2 mbang lac biak glaih glar. Pala di bhum taneh ia mbak tal tuk tabiak baoh meda oh pruh meng kadung hu".
Di huyện Cái Nước, urang trun pajaih labaih 30ha pala tamekai piah raok raya Tết. Dalam nan, rilo abih urang di xã Đông Thới. Ngan haong dom jalan ngak bahrau yau nan, rahra daok hu sa bilan pala hu lagaih. Ong Lâm Hoàng Kiếm, Phaok akaok UBND xã Đông Thới, huyện Cái Nước, tỉnh Cà Mau brei thau: "Di xã Đông Thới, mikva jeng ngak pasiam veik bein pakak, ngak lubang pala tamekai ka darak pasa Tết. Dom baoh tamekai thun ini praong siam, ngan haong dom kein ini ye bruk paik baoh di mikva tui caong khin biak hu kein laba; paralo jien mek tame, daong ka mikva hu jien piah cai pandar, pablei salih uan raok Tết sak ine girai ginup jang".
Tỉnh Cà Mau hu 3 baoh mbaok taneh jaik taphia mabaok ia tasik, sa baoh tanah praong brei raong hadang, rilo di nyu njom ia mbak. Min tapi, urang ngak mbang di ini jeng hu dom jalan jak gheih, piah pala njam patam hu siam lagaih di taneh njom ia mbak. Jalan ngak pandar bạt raong hadang mai tauk, khik piah ia di ong Huỳnh Hoàng Anh yaom lac mbuan jang min ba mai kein lagaih glaong, gam daong patak pataom ia piah pruh, gam patakik prein sangka iek glang. Sang ong ngak nong daok biak caong khin tame bilan tamekai uan raok Raya Tet biak siam makre jak jeng, njauk hatai./.
Viết bình luận