Di bal sit Vĩnh Châu hu jaik 42 ribau baoh sang, dalam nan hu labaih 52% bol bhap lac urang bangsa Khmer, meng akaok bilan hajan, bruk pathau khan pacang caga ruak pandiak tabiak darah saong pametai anek jamok vằn, bọ gậy hu puk palei peih ngak biak khang. Ong Trần Trí Vân, Phaok akaok UBND ban sit Vĩnh Châu brei thau, kuhria tal akaok bilan 7, ban sit mboh hu 50 urang ruak pandiak tabiak darah, sruh jit saong urang njauk ruak mboh trun dut haong tukvak ini thun dahlau. Min langik daok tame bilan hajan, rilo labik ia kandaong,... nan ye mbuan ba tal ruak pandiak tabiak darah njaom mbak samar lac kan plaih hu.

UBND ban sit hu tacei pato gah Y tế peih ngak bruk pametai jamok  saong bọ gậy dua mbang di 10 xã, phường. Dom puk, palei hu padang dom tổ pacang caga ruak pandiak tabiak darah peih bruk pametai bọ gậy, pambuak haong pathau khan, tacei pato bhap bani bhian pametai bọ gậy, khik ramik sang danaok hacih sa-at, laneng lanoi.

Piah pacang caga urang njauk ruak, oh caik ka nyu jeng ruak di labik prong, saong oh hu bruk metai lahik mai meng ruak pandiak tabiak darah, puk palei hu jak ba taong abih kapul njaom nao pathau khan piah paglaong akaok saneng di bhap bani dalam bruk pacang caga ruak pandiak tabiak darah, pametai bọ gậy, jamok patrun bruk njaom mbak ruak.

Amuk Sơn Thị Hai (daok di puk Prey Chop, xã Lai Hòa) khan lac, dom thun dahlau tuk tame bilan hajan, ruak pandiak tabiak darah hu rilo di phum sóc, rilo meng lac di uranaih. Thun ini, urang jakar y tế nao tal yaok puk palei, yaok baoh sang piah tacei pato bhap bani jalan pacang caga ruak yau: puh ramik vin taom dhal sang danaok, bhian rao mein jeik ka nyu hacih, brei ka anek sit ndih dalam kamo melam jeng yau harei… Bhap bani bangsa Khmer labik ini thei jeng thau cambaih saong ngak tui panuac tacei pato di urang jakar y tế ngan haong hatai caong khin anek kamuan oh njauk ruak pandiak tabiak darah tuk bilan hajan  mai.

Di huyện Mỹ Xuyên, labik hu labaih 33% bol bhap lac bhap bani bangsa Khmer daok, piah pacang caga ruak pandiak tabiak darah, meng akaok bilan hajan, UBND huyện tacei pato Pasak Y tế peih ngak danak pacang caga ruak pandiak tabiak darah; pathau khan angaok loa papar sap, băng rôn, talei akhar… Dom kapul y tế nao tal yaok baoh sang brei harak gar pathau khan, jak ba mikva mboh tangin sanya pacang caga ruak pandiak tabiak darah...  

Meng akaok thun tal ini, tỉnh hu labaih 546 urang njauk ruak pandiak tabiak darah. Ong Phan Minh Luân, Phaok akaok Pasak Pasang iek ruak kik tỉnh Sóc Trăng brei thau, biến đổi khí hậu; hatai saneng pacang khik pren yava di sa binah mikva daok biar nan lac makna ngak ka jit njaom pambak prong, dalam tuk nan urang jakar y tế daok kurang… Urak ini Sóc Trăng daok yam tame bilan hajan, langik tasik biak laghaih ka jamok cak rok patagok; gam haong hatai caong khin pataom khik aia di bhap bani tagok glaong ngak ka jamaok hu labik piah daok. Nan ye, bruk patagok ruak pandiak tabiak darah dalam tukvak anak tal, lac kan plaih hu.  

Pasak Pasang iek ruak kik Sóc Trăng ieu dom puk palei hu rilo urang njauk ruak pandiak tabiak darah njauk taong yaom veik bruk ruak kik saong pasang iek bruk langyah jit di labik praong dalam palei, dalam xã tui njauk adat hukum; patagok bruk pasang iek saong langyah abih sruh jit, pacang cakak oh caik ka jit nyu pambak prong dalam bhap bani.

Taphia di nan, dom puk palei pambuak haong gah Pato megru peih pathau khan paglaong akaok saneng ka dom jalan pacang caga ruak pandiak tabiak darah, abih di nyu lac pathau khan tal bhap bani hu ranaih bac di dom sang bac mẫu giáo, sang khik ranaih, njaom ranaih, njaom ranaih di baoh sang./.