Pachreih nong – talei pambuak di pala,  ngak saong darak pasa

Palei Thành Tín, xã Phước Hải, huyện Ninh Phước, tỉnh Ninh Thuận lac bhum taneh cuah kan kathaot, luac thun thu lagu. Palei Thành Tín hu labaih 90% lac urang Cam. Bruk salih bahrau dalam cak rok patagok bruk ngak mbang di urang Cam palei Thành Tín hu peih tabiak meng bruk bhap bini peih praong bruk pala phun măng tây hijao tui jalan mblang ngak praong. Hadei di tuk hu pasram ilamo pala phun măng tây tui jalan salamat, oh pruh jru khik caga phun pala kayua Pasak pachreih nong Ninh Thuận peih tabiak, nan ye meng di tuk peih bruk pala phun măng tây, taong abih tih bruk pala, mikva jeng pandar dom chế phẩm sinh học, oh pandar khak drak hóa học jeng yau oh pruh jru pacang caga halak halieng. Meng di tuk ngak taneh caga ka bruk pala, mikva njauk mek cam, khak limo, pambuak gam haong tabung men vi sinh, khak vi sinh hadei di nan drak trun taneh piah pala. Amuk Kiều Thị Mễ, daok di palei Thành Tín, xã Phước Hải, huyện Ninh Phước, Ninh Thuận khan brei thau lac: “Sang drei tuk hu pasram ilamo pachreih nong hu bac di HTX...”.

Di xã Phước Hậu, huyện Ninh Phước bruk urang nong khang hatai buh jien tame  ngak halăm me-om ka bein madar tui panuac pato tacei di Pasak pachreih nong Ninh Thuận hu ngak tabiak dom pandap panda kaya nong hacih, pabak hu hatai caong di urang blei. Bruk ngak ini daok hu daong patagok kein lagaih di kinh tế saong paglaong jien mek tame ka bhap bini, tui kuhria 1 ha bein madar me-om halam kein laba glaong jang 100 triệu đồng dut saong oh me-om. Ong Trượng Văn Tin, akaok kapul urang nong daok di xã Phước Hậu, huyện Ninh Phước, Ninh Thuận brei thau: “Dalam bruk cak rok patagok kinh te di pak ini. Khol dahlak mboh phun madar ba mai kein lagaih glaong jang ka mikva daok di Phước Hậu”

Dom pandap panda di Ninh Thuận yau ye: Nho, madar, măng tây, tỏi… kayua hu peih ngak tui jalan pambuak haong bruk duah jalan pablei tabiak nan ye tani tanat bruk pablei tabiak, plaih hu bruk pandap panda njauk urang blei kateik yaom. Ong Trương Khắc Trí, Phó yam ndok Sở ngak nong saong patagok palei pala Ninh Thuận brei thau, Sở daok pato tacei Pasak pachreih nong brei urang jakar bhian tui iek bruk pala drak, ba dom ilamo kỹ thuật bahrau tame piah ka urang nong jhul samar bruk pambuak gauk ngak tabiak pambuak haong darak pasa pablei tabiak pandap panda. Ong Trương Khắc Trí ndem lac:“Gah ngak nong hu pato tacei dom kapul pambuak haong pasak Pachreih nong jhul samar bruk pasang iek ba tabiak darak pasa. Taphia di di bruk ngak tabiak dom pandap panda hu chất lượng glaong, hu sản lượng. Khol dahlak jeng hu sangka tal bruk paglaong mayaih khan, padang ngak hu chỉ dẫn địa lý ka dom pandap panda biak karei di tỉnh, nhãn hiệu chứng nhận di pabe, pabo, baoh nho madar, tỏi, măng tây. Tapa bruk tiếp thị dom kênh, gah ngak nong pambuak haong dom sàn giao dịch, dom siêu thị, nhà hàng ba pandap panda biak karei di Ninh Thuận tame. Tal urak ini, dom pandap panda jeng mek hu hatai jia di urang blei, khik tani tanat pandap panda pablei tabiak njauk yaom, samu haong chất lượng, ba jien mek tame ka bhap bini”.

Urak ini, Pasak pachreih nong Ninh Thuận daok peih ngak siam bruk ramik veik gah ngak nong. Tui nan, bruk praong lac pataom tame pato tacei ilamo, peih  dom mbang ginum biai di mblang hamu, daong ka bhap bini hu pajaih bahrau hu năng suất, chất lượng siam salih ka pajaih klaak oh daok siam; daong padang angan ka dom pandap panda đặc thù, pambuak haong doanh nghiệp dalam bruk ngak saong duah jalan pablei pandap ka bhap bini./.

Urang lang: Thu Thao – 26/09