Urang ngak taduan hu rilo pok jien dong meng kadung jien di LĐLĐ

Ngan song saai Mạch Chí Nhân (urang ngak gah pasiam cơ khí HTX Kinh doanh tổng hợp Tân Mỹ Chánh, ban Mỹ Tho, tỉnh Tiền Giang), “Bilan urang ngak” thun 2022 lac sa bruk biak gheih, kayua lac meng harei ni, sang saai hu sang daok siam mekre. Saai Nhân song duik di sa-ai jeng lac urang ngak, jien bilan takik, rong  2 anek sit mbang bac, saong amaik taha, ruak kik , sang saai dok dalam sa boh sang taik tahak prong  24m2.

Dalam bilan  2,  urang jakar  công đoàn di pak ni brei thau, saai  Nhân hu pilih ruah alin brei “boh sang công đoàn” di tuk “Bilan urang ngak  2022” meng kadung jien boh sang  công đoàn di Liên đoàn Lao động (LĐLĐ) tỉnh Tiền Giang. Nan ye boh sang taik tahak samar hu yah klaak, piah padang ngak baoh sang khang kajap hong yaom jien labaih 80 triệu đồng; dalam nan, kadung jien boh sang  công đoàn dong sa meteh, binah dok veik duik pasang saai  Nhân nyim, mesraiy... Boh sang di saai Nhân lac 1 dalam 14 boh sang công đoàn hu LĐLĐ tỉnh Tiền Giang alin hadiah brei ka  urang ngak kan kandah ka sang dok di tuk “Bilan urang ngak 2022”.

Pachreih tui “Bilan urang ngak”, dom pakat  công đoàn tỉnh Bến Tre jeng bahrau alin hadiah 28 boh sang  công đoàn, yaom meng  50-60 triệu đồng sa boh sang, dong ka rilo boh sang urang ngak hu labik dok khang kajap, tani tanat. Di Long An, dalam bilan 5 ni, dom pakat công đoàn bahrau alin brei 5 baoh sang công đoàn. Dalam bilan  4,  hu 17 urang ngak  jeng hu taduan baoh sang công đoàn. 

Dok di ban Cần Thơ, gam song 15 baoh sang công đoàn ye LĐLĐ ban Cần Thơ dok hu jao  32 pok jien bac ka anek di urang ngak hu rai duik kan kandah, brei sổ tiết kiệm Công đoàn Việt Nam ka 6 uranaih  metui  lac anek di  đoàn viên công đoàn (yaok sổ yaom 10 triệu đồng); peih dom gian hàng parang iek pandap, pablei pandap trun yaom ka urang công  đoàn song urang ngak; nao ravang, brei pandap ka urang ngak hu rai duik kan kandah, njauk bala tuk ngak bruk …

Oh lac gah pandap panda, dalam “bilan urang ngak 2022”, urang ngak dok hu công đoàn sangka ba brei bui sambai yau : Harei pataom dar phol urang ngak; Harei pataom ilamu hadah krah, pok meyaom, yaih khan  urang ngak naih gheih dalam bruk pakacah gauk ngak. Gam song nan, công đoàn dok peih bruk ndom nyai nao mai  song urang pandar urang ngak ka bruk ngak, jien bilan, jien  thưởng,  phụ cấp độc hại song bruk siam mekre hacih saat dalam tuk ngak bruk …

Tui ong Nguyễn Văn Quí, Akaok LĐLĐ tỉnh Long An, dom bruk ngak, pachreih tui “Bilan urang ngak” piah thau dhar phor urang ngak kham merat ngak bruk, rik dong song doanh nghiệp yam tapa kan kandah. Gam song nan, lac tuk piah ka urang pal akaok tỉnh, ban, dom pakat, dom gah  song doanh nghiệp caik hatai tui pang dom hatai cong khin di urang ngak ka bruk ngak, rai duik, talei rohim ngak bruk dalam doanh nghiệp./.

Urang lang: Hanipha- 26/5