Kaya nong lac gah pablei tapa negar langiu praong di Việt Nam haong yaom jien mek tame yaok thun jaik 49 tỷ USD, dalam nan rilo di abih lac njam patam. Min anak meta mboh lac, jaik 80% kaya nong di Việt Nam tabiak darak pasar ka oh hu angan, logo, nhãn mác…, abih di nyu lac dom doanh nghiệp mbiah saong sit. Rilo janih kaya nong siam, chất lượng biak glaong di dalam taneh ia yau ye: brah ST25, cà phê, pa-ok blait, vải thiều, la-u, pa-ok, thanh long,… min tuk tabiak negar langiu rilo meng lac daok tamo, oh ka hu sangka padang, patagok angan.

Ong Huỳnh Thanh Sử, Phaok Yam ndok Sở Công Thương ban Cần Thơ brei thau bruk biak di palei, padai brah di Cần Thơ hu angan tapa panuac ca dao meng kan dahlau, lac “Cần Thơ brah patih ia jangaih/ Thei nao tal nan oh khin veik mai” – ndung bak ginup makna ka 1 bhum kraong ia kaya meda, haong dom kaya pandap, alam langik tasik dui takai tuai damuai atah jaik… Min tal harei ini, angan padai brah, kaya ikan di Cần Thơ jeng oh ka yam atah: “Karja palei biak sangka pataom tame tacei pato dom gah piah ngak, min biak rilo kan kandah, bo kan kandah praong abih lac jien piah ngak. Sa bruk tra lac khin ngak, brei hu bruk ba tangin tame haong gauk, sa hatung hatai haong gauk di abih dom doanh nghiệp. Blaoh ramik caga, kuhria gam bhum nguyên liệu ye ban Cần Thơ jeng hu dom kan kandah”.

Ginum biai ka bruk padang angan, GS.TS Võ Tòng Xuân ndom tapak lac: tal harei ini Việt Nam ka oh hu angan brei kaya nong kayua dom jabat khik ramik karja jeng ka oh sangka rilo tal bruk yaih khan angan kaya nong Việt. Ndom  ka bruk padang angan di Việt Nam haong dom taneh ia mangaok dunya, ong Võ Tòng Xuân caong khin lac rup binguk urang pan akaok taneh ia nao tal halei jeng brei yaih khan takik di abih lac sa angan pandap di taneh ia drei. Urang pan akaok brei pandar meng pilih ruah saong taong yaom hu kaya pandap hu angan di abih. “Dahlak sahneng lac Karja hu jalan padang angan kaya pandap negar, Karja lac menuac nao dahlau piah pilih ruah dom doanh nghiệp biak biai hu hatai siam, hu ilamu naih gheih, daong ka dom doanh nghiep ini pambuak bruk haong urang ngak nong, daong ka mikva pala, ngak. Yau nan bruk ngak di Karja dalam bruk ini, lac biak praong”.

Urak ini, bahrau hu 20 dalam 124 doanh nghiệp ngak pandap, pablei salih, chế biến kaya nong mek hu angan negar. Mboh lac biak takik duk haong prein khang daok hu.

 Tui doanh nhân Đặng Văn Thành, Chủ tịch kapul TTC Group, piah padang angan ye dom doanh nghiệp sit meda ngak vệ tinh ka dom angan praong. Meng ilamu  pablei tabiak negar langiu tabau saradang haong rilo janih pandap hu angan je, hadei di 3 thun tame Hiệp định Pablei salih pandap panda  ASEAN, TTC Group hu daong ngak jeng labik dang ka tabau saradang Việt Nam. Urak ini, doanh nghiệp ini padang hu angan ka pandap ia tasau la-u, hu urang Islam biak takre. Ong Thành mboh lac, caong khin padang angan ye brei caga bhum nguyên liệu, peih bruk pala, ngak njauk tui jalan ba tabiak piah paglaong chất lượng pandap: “Biak di nyu piah ngak hu, brei hu trách nhiệm meng doanh nhân, doanh nông saong bruk daong di Karja meng dom harak pambuak bruk pablei salih dua gah, rilo gah. Dahlak jeng caong “tham tán thương mại” njauk sangka rilo jang piah paglaong hu angan Việt.”

Bruk padang angan negar ka pandap panda kaya nong Việt daok jeng bruk njauk ngak samar drah jang tuk halei karei tuk kol drei peih hu rilo pabah mbang darak pasar kan tame yau ye Nhật, Mỹ, EU... tapa dom harak pambuak bruk pablei salih hu mbaoh tangin saong hu ba tabiak ngak tui. Tui dom chuyên gia, Việt Nam pablei tabiak negar langiu biak rilo janih kaya nong, min brei pilih ruah janih biak hu angan je piah pataom tame yaih khan saong hu jalan marketing siam, lagaih. Piah ngak hu bruk ini, brei hu bruk sa hatung hatian di dom mintri, dom gah, dom doanh nghiệp saong rahra, meng nan meda padang hu angan negar ka kaya nong Việt./.