Ninh Thuan patagok bhum palei mik va bangsa takik 

Tal bhum palei Cam di An Nhơn, xã Xuân Hải, huyện Ninh Hải, mbaok meta di pak ini hu salih bahrau. Dom janih gom điện, jalan mbak, sang bac, bilai y te, ia hacih pandar hu buh jien tame ngak brei siam lagaih. Rilo mbaok bruk ngak mbang, raong glang tui jalan patabiak pandap panda pambuak haong ilamu siam gheih daok hu peih ngak yaok labik, yaok palei… ba mai bui sambai chreih chrai ka rahra bhap bini.

Ong Nguyễn Đình Thi, Phó akaok UBND xã Xuân Hải sambai mayai khan lac, Xuân Hải ieu lac sa bhum taneran, dang gah ia harei tame di huyện Ninh Hải. Dalam xã hu 9 palei ngan saong mblang taneh praong labaih 2.250 ha. Xã hu 2 bangsa Kinh saong Cam gam daok saong gauk. Thun 2011, Xuân Hải hu pakat tỉnh pilih dalam klau xã brei piah peih padang ngak Danak dak bruk ngak negar padang ngak palei pala bahrau. Tal thun 2015, xã Xuan Hai padang blaoh salah biak naih, mek hu yaom tapa 19/19 asal kadha tanut ka bruk padang ngak palei pala bahrau.

Yau ye ha gai kandeih kein lagaih brei patagok breuk ngak, xã Xuân Hải patui tame bruk kham marat ngak paglaong dom asal kadha padang ngak palei pala bahrau. patui di nan, dalam tukvak masa thun 2016 - 2021, hu labaih 33,7 tỷ đồng meng kadung jien di Danak dak bruk ngak negar padang ngak palei pala bahrau, yau dahlau diah pagam pablak tame dom danak dak, kadung jien jak ba meng doanh nghiệp saong rahra hu rik tame, hu xã pandar piah patui veik buh tame brei padang ngak dom cơ sở hạ tầng; daong ba dom bruk ngak mbang patabiak ndap nda, pablei salih, cak rok patagok kinh tế puk palei; pato bruk gam saong bruk ngak, paglaong jien mek tame. Kayua yau nan ye, biah tal urak ini Xuân Hải mek hu 5/5 nyaom asal kadha tanut, 13/13 kadha ngan haong 24/24 bruk ba tabiak saong daok cang hu pok brei angan xã mek hu tanut paglaong chuan palei pala bahrau.

Daok di huyện bhum ceik Bác Ái, labik hu labaih 90% rahra urang bangsa Raglai, dom thun tapa, kayua hu mbang tui sarak 30a, gam tui di nan jeng hu bruk sangka iek glang, pakat tinh daong ba buh jien tame ngak, sa tangin sahaai saong gauk di taong abih danak dak hệ thống chính trị, mbaok meta puk palei di huyện dak harei dak salih bahrau.  

Tui UBND huyện Bác Ái, kayua jak ba kadung jien buh tame, yau nan ye urak ini, rilo meng lac dom gah, yau ye: gom ndiện, jalan, sang bac, bilai y tế, ia pandar…hu buh jien tame ngak siam lagaih, bat al grauk puk palei. Dom bruk ngak mbang, pablei salih, sarak karo mbang ngui raidiuk an sinh xã hội daok ba mai ralo siam lagaih. Urak ini, di dalam huyện, tui kuhria yaok xã mek hu labaih 10 asal kadha palei pala bahrau, oh hu xã halei mala 5 asal kadha.

Urak ini di dalam tỉnh Ninh Thuận hu 32 bangsa takik ngan saong labaih 144.200 urang, gam saong 24,4% rahra; dalam nan urang Cam hu 12,17%, urang Raglai hu 0,39%.

Ong Bá Bình Yên, Phó akaok Mbang Bangsa tỉnh Ninh Thuận brei thau: kayua dom gah buh jien tame, rilo labik bhum palei bhap bini rahra urang bangsa takik dak saong daok hu bruk salih cambaih laih. Tal urak ini, taong abih dom xã di bhum palei urang bangsa takik saong bhum ceik hu bilai y tế; taong abih puk palei hu sang bac; taong abih xã hu sang bac pakat trung học cơ sở; taong abih puk palei jeng hu gom điện saong hu labaih 99% baoh sang hu gom ndien truac hadah; 90% baoh sang bhap bini hu ia hacih pandar mek hu labaih. Dom baoh sang kan kandah di bhum mikva urang bangsa takik yaok thun trun bien meng 3 - 4%, dalam nan huyện kathaot 30a Bác Ái trun tui kuhria meng 5 - 6% dalam sa thun. Bruk patagok kinh tế di bhum mikva urang bangsa takik tui kuhria mboh mek hu 10% dalam sa thun.

Tal thun 2025, tỉnh Ninh Thuận kuhria brei jak ba kadung jien labaih 2.780 tỷ đồng di pakat Trung ương, kadung gilang jien kanja ka puk palei, kadung jien blei masraiy saong kadung jien rahra xã hội hóa piah pataom buh jien tame, paglaong bruk ngak pasiam veik cơ sở hạ tầng pandar yaok harei pabak siam abih ka bruk pala drak saong raidiuk di bhap bini bhum bangsa takik saong bhum ceik, di dom xã biak kan kandah.

Patui di nan, tỉnh meda daok buh jien tame, daong ba dom danak dak rami ramik tani tanat ka bhap bini bhum mbuan sanang njauk bala kayua langik takik, bhum palei biak kan kandah, langyah brei dom bruk taneh daok, sang daok, taneh ngak mbang, pala drak, raong glang, ia pandar… piah ka bhap bini hu kein laba piah cak rok patagok bruk ngak mbang, pablei salih saong paglaong bruk di dalam raidiuk.

Langiu di nan, tinh daok patui bruk peih pato bruk ngak hu yaom glaong ngan haong dom urang ngak lac urang bangsa takik; ba kein laba ka urang ngak hu bac bruk ngak gam saong bruk duah bruk ngak di bhum palei; ba kein laba ka dom baoh sang bangsa hu mbaok tame dom kapul pambuak gauk, hợp tác xã piah gam haong gauk pambuak bruk ngak mbang pambuak haong danak dak bruk ngak negar brei ka bruk patrun kathaot saong padang ngak palei pala bahrau.

Meda ndem mayai, yaom lac mek hu rilo kadha siam jeng yaok janih, min raidiuk, kinh tế - xã hội di bhap bini urang bangsa takik, bhum ceik di Ninh Thuận jeng daok dom kan kandah. Kayua tamuh di labih bhum kan kathaot, ilamo bhap bini rahra daok beir gam saong bruk ngak mbang, pablei salih di mikva bhap bini oh samu gauk, dalam tuk langik tasik khí hậu salih dak harei dak sarau, njauk kan kandah di jit ruak dui atah… ngak kan kandah oh sit tal bruk raidiuk, ngak mbang, pablei salih di bhap bini.

Gam gam saong bruk kham marat di pakat tỉnh, bruk sa hatung sa hatai di mikva urang bangsa takik dalam tỉnh, meng masa ini tal thun 2025, tỉnh kham marat brei patrun daok takik dom baoh sang kan kathaot yaok thun meng 1,5 - 2%; dalam nan brei patrun sang kan kathaot di bhum bangsa takik saong bhum ceik tui kuhria lac labaih 3% dalam sa thun tui tanut chuan kathaot di rilo gah./.

Urang lang: Samad Han -17/7