Phun mang tay di mikva Cam daok di An Nhon

Ong Thành Văn Tân, Akaok Chi bộ gam lac akaok Mbang khik ramik palei An Nhơn brei thau, palei hu palabha bhap bini jeng 2 labik, palei praong (ieu lac palei An Nhơn klaak) saong labik dui bhap bini rahra tabiak (ieu lac bhum Gò Sắn) atah di nan labaih 1 km, jang daok ieu lac palei An Nhơn bahrau. Dalam palei hu rahra labaih 2.145 urang dalam 465 baoh sang, dalam nan ngan haong jaik 1.000 urang tui agama Islam, urang daok gac tui agama Bà ni.

  Chi bộ palei An Nhơn hu 25 urang đảng, mateh lac dalam nan mboh hu urang đảng daok dalam bhum palei saong 87 urang đảng daok ngak bruk ndam gam saong pambuak haong bhum palei, ieu lac sa kapul nyom khang praong dalam bruk paglaong prein pal akaok di chi bộ palei. 

Chi bộ palei An Nhơn tuk halei jeng khik tani tanat bruk sinh hoạt njauk tukvak masa, njauk adat, yaok harak gar jeng hu khik biak siam makre, caga dahlau bruk pandar ialmu ngak kong khau tin dalam bruk ngak yau ye peih kapul zalo urang đảng piah payua asal kadha harak gar, sarak, tapa di nan pathau khan siam lagaih ka rahra, sang danaok. Langiu di nan, chi bộ daok padang kapul zalo palei, zalo urang đảng labik daok ngan haong jaik 200 urang hu mbaok tame.

  Tui taong yaom di urang pal akaok Đảng ủy xã Xuân Hải, dalam tuk nyaom sinh hoạt, chi bộ palei tuk halei jeng paglaong hatai jum pataom gauk, yaok panuac rik tame nyaom biai jeng ye lac piah dak padang ngak pasiam saong tuk halei jeng hu pachreih tui. Kayua yau nan ye, yaok bruk ngak pambuak tal hadei di tuk ba tabiak jeng hu bruk pachreih tui di taong abih dom urang đảng, bhap bini saong gam peih ngak samar drah, khang catang, ba mai kein lagaih cambaih laih.

Di bilan 8/2019, chi bộ palei hu ba tabiak sarak brei ka bruk ngak pasiam taneh daok klak lawik, hareik harum tamuh sarau dau, labik tuh rah nerak di bhap bini, ngak jeng mblang main. Ngan haong paok jien jak ba hu jaik 100 triệu đồng, mblang main di palei hu buh jien tame ngak saong hu ngak salah blaoh, jeng labik gheih makre, main sambai bui di bhap bini.

Tui ong Thành Văn Tân brei thau lac padang ngak palei pala bahrau piah ka urang tui ieik ngak ieu lac sa bruk ngak hu makna praong ba akaok nao dahlau, chi bộ palei An Nhơn pataom tame patagok bruk ngak di urang pal akaok, pato tacei, ba bhap bini tame bruk ngak piah cak rok patagok bruk ngak mbang, pablei salih, paralo jien mek tame brei ka bhap bini rahra. Bruk tuah di abih lac tukvak masa piah padang ngak mblang main gam haong tukvak masa bo palei An Nhơn hu pakat huyen pilih ruah ngak labik padang ngak palei pala ka urang pasang ieik. Kayua yau nan ye, meda ndem mayai lac danak dak ini ieu lac bruk peih ngak bak hu makna praong piah ka bhap bini dalam palei sa tangin sa takai haong gauk, patagok prein buh jien tame ngak dom danak dak hu angan saim karei. 

Tuk mblang main hu ngak salah baloh, akaok saneng di mikva dalam palei jeng hu salih bahrau, saneng di bruk sa tangin haong gauk padang ngak palei pala bahrau di mikva jeng dak harei dak hu paglaong. Langiu di nan, An Nhơn daok hu ngak jalan bingu atah labaih 500 m di gah jalan praong di palei. Bingu hu pala tapen jalan min di anak sang halei, sang nan dang sangka iek glang, puh ramik, pruh ia saong ngak jeng bhum palei haci hacih, bak bingu hala siam gheih.

Rilo urang đảng dalam palei tuk halei jeng ba rup nao dahlau dalam bruk pandar ilamo kỹ thuật tame bruk ngak, taduan peih ngak rilo bruk ngak nong ngak kong ilamu glaong, ngak tui jalan pandap panda ba mai kein laba siam makre. Dom urang đảng jeng thau cambaih laih, paglaong hatai ngak bruk di drei daong ka bhap bini gam ngak kaya mada di bhum palei. Chi bộ hu ginum biai peih ngak sarak di pakat Tỉnh ủy brei ka bruk cak rok patagok bruk ngak nong tui jalan công nghệ glaong; ba tabiak yaok urang đảng ba tabiak sa panuac, hadei di nan pataom veik jeng jalan ngak cambaih laih piah pato tacei, palabha ilamo piah yaih khang cak rok patagok dom bruk ngak mbang, pablei salih, daong ka bhap bini hu mbaok tame hợp tác xã piah gam pambuak gauk ngak. Kayua yau nan ye, jien mek tame di bhap bini gam haong bruk diukrai dak harei dak hu tagok glaong. Baoh sang kan kathaot dalam palei tal urak ini njauk daok 10 baoh sang.

Tui jalan pal akaok pato tacei di chi bộ palei, palei Cam An Nhơn tuk halei jeng ieu lac sa palei ba akaok nao dahlau dalam xã brei ka bruk dak padang palei pala bahrau. Dom danak dak padang ngak gah y tế, sang bac, jalan mbak nao mai jeng hu padang ngak khang karo. Taeng di jalan dalam palei ndak hu 80% hu brei ngak siam karo, angaok tapen sa binah jalan jeng hu gom truac hadah masa tuk melam. Jien mek tame tui kuhria yaok akaok manuac mek hu 61 triệu đồng sa thun.

  Ngan haong jalan ba tabiak ngak cambaih laih gam haong dom bruk ngak lagaih di chi bộ, palei patui veik jeng hu mboh rilo urang ndang bahrau halain hatain, lac kreih camnin, buh abih hatai haong bruk palei, bruk di xã. Thun ini, palei An Nhơn hu jalan jak ba dom urang ngak siam, dalam nan rilo meng lac kapul urang đảng dalam chi bộ saong urang đảng labik daok patui ngak bruk dak padang sang ilamo palei. Gam tui di nan, chi bộ jang yau Mbang khik ramik palei daok pasang iek piah ngak salah dom asal kadha piah samar drah pok brei angan palei kieu mai di puac thun ini./. 

Urang lang: TS Phu Van Han – 09/10