Ong Hồ Quốc Lực, Yam ndok Cty Cổ phần thực phẩm Sao Ta, tỉnh Sóc Trăng, doanh nghiệp ngak hadang đông lạnh pablei tabiak negar langiu jeng mboh lac, pabah lamnge Trần Để meda daong ka doanh nghiệp patrun jien sahui, patakik khat lahik, patagok hatai jia di gah ngak mbang haong gauk dalam bruk jao - mek pandap panda saong jhul patagok gah KTXH di abih bhum: “Pandap panda hu pataom veik piah pajeng ba meng Sóc Trăng tagok 2 pabah lamnge lac Cát Lái saong Cái Mép piah ba tapa negar langiu. Jalan nao ini biak atah, kapal gilai nao mai biak rilo, nan ye mbuan hu bala, mbuan gaok khat lahik. Meyah hu pabah lamnge ye kol drei mboh lac, kein lagaih biak rilo ka dom doanh nghiệp di bhum ĐBSCL hu pandap pablei tapa negar langiu, kayua jien sahui tok daok meteh min”.

Bruk padang ngak Pabah lamnge ia dalam piah ba dom kaya nong di bhum ĐBSCL nao tapak dom taneh ia di dunya lac caong khin meng lavik mai di doanh nghiệp saong dom tỉnh ban dalam bhum. Pabah lamnge hu taong yaom lac hu makna biak praong dalam chuỗi logistics saong brei hu piah cakrok kinh tế tasik.

Ong Nguyễn Văn Thể, Bí thư Đảng uỷ khối dom jabat Trung ương, dahlau daih ngak bí thư Tỉnh uỷ Sóc Trăng brei thau, yaom lac hu rilo prein khang, min bhum ĐBSCL urak ini bahrau meblak yaom GDP oh ka tal 10% di taneh ia, ini lac bruk oh lagaih oh njauk ngan saong sa bhum taneh hu maong lac ginup meda. Kadha ini brei mboh lac, bhum ĐBSCL daok kathaot duk haong bruk lac prein khang di bhum: “Piah ngak sa pabah lamnge tame tabiak ka bhum ĐBSCL ye oh hu labik halei siam jang Trần Đề, Sóc Trăng. Saong likau ndom veik lac, meyah oh hu pabah lamnge ini, bhum ĐBSCL miat miat kan kathaot, bruk suh sah di menuac sia, yaok triệu urang ngak di bhum ini njauk nao tal Bình Dương, Đồng Nai piah ngak mbang pah saong nyu ba tal srau kadau xã hội. Dahlak ndom lac, pabah lamnge Trần Đề lac bruk njauk ngak, meyah kol drei buh jien tame ngak aval ye ba mai kein laba biak glaong".

Urak ini, labaih 70% pandap panda tame – tabiak taneh ia di bhum ĐBSCL njauk pajeng ba meng jalan radaih tagok dom pabah lamnge di TP. Hồ Chí Minh, ngak brei tagaok jien sahui pajeng ba, lahik rilo tukvak, pambak tal chất lượng pandap, gam haong nan, ngak trak damak ka bruk nao mai di jalan mbak. Kayua yau nan ye, Mintri Chính trị hu tabiak sarak ka 13 saong Rajaei jeng hu tabiak sarak 78 ka jalan cakrok KTXH saong khik kajap quốc phòng, an ninh bhum ĐBSCL hu ndom lac tal thun 2030 patagok pabah lamnge Trần Đề jeng pabah lamnge praong saong lac pabah mbang tame tabiak di bhum. Pambuak bruk quy hoạch, peih bruk buh jien tame ngak dom jalan cao tốc samu haong dom pabah lamnge, caong lac meda langyah hu “labik gar tavak” ka abih bhum.

Rilo doanh nghiệp mboh lac, bruk padang ngak pabah lamnge Trần Đề meda ba tal salih karei jang dahlau  dom pandap panda tame- tabiak taneh ia di 8 dalam 13 tỉnh bhum ĐBSCL. Gam haong nan, dui pachreih hu pandap panda ba tapa ka Campuchia tui jalan kraong Mekong…Ong Lê Tấn Đạt, Phaok Taong Yam ndok Cty Cổ phần Tư vấn padang ngak danak dak jalan tasik mboh lac:“Piah lang talaih gar tavak dalam bruk pajeng ba pandap panda tame-tabiak taneh ia di bhum ĐBSCL haong dom bhum kinh tế praong dalam taneh ia saong khu vực, bruk buh jien tame ngak pabah lamnge Trần Đề ka gilai kapal praong pajeng rilo pandap ka bhum ĐBSCL lac bruk njauk ngak”.

Bruk padang ngak pabah lamnge Trần Đề, tỉnh Sóc Trăng hu ba tabiak dalam dom quy hoạch, hu kuhri kuhria lagaih haong bruk lac pabah mbang tame tabiak negar kaya pandap di bhum ĐBSCL, taduan mek – pajeng ba pandap panda ka Campuchia saong dom taneh ia bhum kraong Mê Kông. Ini lac danak dak hu makna biak praong dalam bruk patagok KTXH, an sinh xã hội, an ninh Quốc phòng ka abih bhum ĐBSCL. Meng nan, samar lang talaih labik gar tavak, ba bhum taneh “9 ine girai” par tagok, nao jaik haong dom bhum kinh tế dalam taneh ia saong khu vực./.