Danak dak 8 lac danak dak karei ka lakei kamei akaok meti daok dalam sa Danak dak pakat Negar, brei mboh bruk snagka praong di Ndang saong Karja. Hadei jaik 5 thun peih ngak (tukvak 2021-2025), Danak dak mek hu rilo jak jeng siam mekre. Bruk pasang iek saong padang ngak bruk hu peih ngak samar drah, ngan haong bruk padang Mban Dui ba Danak dak meng Trung uong tal pakat tinh di jaik abih dom bhum palei. Trung uong hu ba tabiak 17 harak gar tacei ba saong peih bruk pasang iek, langyah dom tavak tavaiy dil samu.

Jien padai jeng hu jak ba rilo, ngan haong kadung jien buh tabiak jaik 2 ribau ty dong, rilo meng kadung jien Trung uong. Rilo tanut hu makna pambuak tal bruk padang kapul truyen thong bhap bini, labik njep je tame, kalup kapul pan akaok ka bruk salih, saong paglaong prein ngak ka urang jakar kamei bangsa takik mek hu saong tapa jalan kuhria, gaok mai hu tanut mek hu tagok dua mbang.

Yaom lac hu dom jak jeng, bruk pagam lakei kamei dalam danak dak thanh phan di Danak dak pakat Negar bhum mikva urang bangsa takik saong bhum ceik jeng daok rilo bruk “gar tavak” brei hu taong yaom tapak, nan lac bruk kurang dalam bruk rabha saong pandar kadung jien karja palei; lac dom kan kandah dalam bruk brei mboh urang saong peih ngak asal kadha; lac dom bruk kanjah dalam bruk bac pasram paglaong prein ngak; atau dom bruk kurang dalam bruk pagam lakei kamei tame dom danak dak thanh phan karei.

Daok ka dom bruk kurang dalam bruk rabha saong pandar kadung jien karja palei, yaom lac Mentri Jien padai hu Sarak 55 brei kein lagaih ka bhum palei ramik radak kadung jien, min rilo tinh bhum urang bangsa takik saong bhum ceik gaok kan kandah ka jien mek tame, ba tal bruk rabha jien padai ka Danak dak 8 oh ka pabak hu hatai caong. Dom kapul truyen thong bhap bini, yaom lac hu padang saong bac pasram, min tok mek hu sa paok jien takik abih, ngak oh hu ginup prein piah khik tani tanat sa danak dak tui jalan cambaih laih. Bruk ini nao cagar gilac hatai di bruk pathau khan roh duah, piah brei mboh kein lagaih ka jien padai peih ka dom kapul bhap bini ngak bruk hu siam lagaih. Ngak bruk jak ba rahra rik daong piah hu veik kadung jien jeng daok rilo kan kandah, oh ka mek hu yau caong takre.

Tien si Phạm Thái Hưng, urang ilamo langyah ka sarak brei thau: Yaom lac Danak dak 8 hu makna, min dom harak gar tacei ba meng dom mentri, dom gah Trung uong saong bhum palei ngan haong bruk ngak dom danak dak, danak dak sit thanh phan karei dalam Danak dak pakat Negar oh ka biak caik hatai tal asal kadha pagam lakei kamei biak hu ginup.

"Dalam jaik 200 tanut bruk ngak di Danak dak paket Negar, hu tal 71 tanut brei khin ka hu neh rabha tui lakei kamei, min bruk ngak tapak jeng daok kan kandah. Kadha ini ngak ka bruk jhul tagok bruk lakei kamei samu gauk dalam bhum mikva urang bangsa, meng nan mai lac biak srau kadau, gilac dak kan si mek hu bruk kuhria yau Jalan ngak pakat negar ba tabiak."

Jeng tui Tien si Phạm Thái Hưng, piah jhul tagok siam lagaih bruk pagam lakei kamei, khik kajap dom jalan ngak saong lakei kamei samu gauk di Sarak 88 Quoc hoi saong Jalan ngak pakat negar hu ngak tui jalan ngak tapak, brei hu dom salih mbuan abih dalam jalan ngak. Dalam nan brei apgam lakei kamei tame taong abih dom danak dak saong danak dak sit di Danak dak pakat Negar. Bruk ini brei ka hu tacei ba cambaih laih meng dom mentri, dom gah dang ngak danak dak, ngan haong bruk dui ba haong gauk meng Jabat dui ba Danak dak pakat Negar saong Uy mban Bangsa. Brei salih bahrau bruk paglaong prein ngak. Salkih meng bac pasram katut harei tapa jalan paglaong prein ngak tui tukvak, sangka iek praong bruk lagaih saong ilamo. Langiu di nan, brei tagok truyen thong pambak tame bhap bini…

Bruk langyah dom bruk kandaong ini oh lac paglaong siam lagaih bruk ngak di Danak dak 8 bo daok lac asal kadha hu makna piah ka Danak dak pakat Negar bhum mikva urang bangsa takik biak hu mek hu jalan ngak taong abih ka bruk patagok karo kajap saong samu gauk, oh luai ka thei daok veik gah likuk./.