Phuong Binh Duong saong phuong Thu Dau Mot jeng daok dalam Ban Thu Dau Mot klak. Ini lac dom labik hu bruk patagok samar drah dalam rilo thun, kadung jien taneh maong yau hu pabak thir. Kayua yau nan, piah patagok samar drah dalam tukvak mai meng anak tal, dom phuong brei “truh tapa ta-eng drei” gam saong dom jalan kuhria biak karei. Urak ini Ndang bo phuong ba tabiak jalan ngak bahrau lac patui bruk patagok kein lagaih gah ngak kong, mayao mayit jitvu, pagam haong pacang khik taneh riya langik tasik, pamaong tal sa labik daok saong bruk ngak hu siam glaong. Ong Nguyễn Văn Sum, Phaok Bi thu bhian hu mbaok di Ndang uy phuong Binh Duong ndom mayai lac: “Ndang bo phuong lac brei caik ngak dahlau bruk dui pachreih patagok kinh te, padang ngak jalan mbak tui jalan ngak ban medin hadah krah, pagam haong patagok ban medin haong ngak kong. Ba tabiak dom pakat, dom pakat ngak jeng dom labik ngak kong hijao, hacih sa-at, brei caik dahlau dom gah ilamo ngak kong pakat glaong, jitvu asar siam glaong, daong jhul tagok bruk pablei tabiak blei tame saong logistic."

Di phuong Thu Dau Mot jeng daok patagok “pandiak”, brei ka hu dom jalan langyah lagaih siam. Jalan ngak di phuong lac padang ban medin hadah krah, bahrau saong labik hijao. Ngak tui kein lagaih pablei salih saong jitvu hu dahlau, phuong brei patui veik jhul khang pablei salih, daong gah ngak mbang pablei salih saong buh jien tame salih lek taka so. Abih di nyu nan lac, bruk pasiam ban medin saong patagok jalan nao takai tapen kraong Sai Gon ieu lac bruk hu makna, ngak labik hujao, dui pachreih yulit saong paglaong raidiuk ka rahra. Amuk Nguyễn Thu Cúc, Bi thu Ndang uy phuong Thu Dau Mot brei thau: “Urak ini piah patagok danak dak brei maong iek bruk ngak blaoh piah pasang duah iek, tanyi panuac di dom so, mban, gah dom jabat karja, likau panuac ndom piah meda hu patagok dom danak dak di bhum palei. Min danak dak brei ka hu pasang iek, plaih ngak rilo labik, patagok dom danak dak ngak kan kandah tal raidiuk rahra”.

Di phuong Chánh Hiệp daok pandar taneh thaoh piah dui pachreih gah buh jien tame ngak mbang, abih di nyu dalam nan lac danak dak patagok darak pasar, jitvu tapen kraong Sai Gon saong patagok labik ban medin bahrau. Ini lac kein lagaih ameh piah phuong ngak tabiak sa mbaok meta bahrau saong hadah krah.

Amuk Trương Thị Thu Hiền, Phaok Bi thu Chánh Hiệp khan brei thau, piah hu patagok ye dom danak dak buh jien tame di karja pakat ban raya daok mateh dhua yau ye Sang iek ruak 1.500 ghe caneng, pablei ngak bruk mathik athah Tương Bình Hiệp, jalan DX144 brei hu blaoh drah aval. Urang pan akaok phuong caong khin hu bruk neh rabha pakat, neh rabha bruk piah bhum palei ngak, rilo meng lac ramik caga phun jien buh tame di karja.

"Urak ini, khol drei urang dang akaok jeng brei pato tacei UB Bhap bini phuong pasang iek, duah iek dom danak dak, dom jalan kuhria brei hu peih ngak dalam thun 2025, tukvak thun 2025-2030. Khol dahlak hulin hu jalan kuhria saong likau panuac ndom di dom jabat, dom mban dom gah karja Ban raya Ho Chi Minh. Jeng caong khin tuk drei hu ba tagok dom danak dak jalan mbak samar chip dalam bhum brei hu neh rabha kadung jien karja, khik kajap hu ginup piah peih bruk buh jien tame di karja”

Tui jalan ngak, dom phuong daok pataom tame patagok karei di drei. Ini lac sa bruk njauk caik hatai, kayua nyu meda ba tal bruk kurang bruk samu gauk meyah oh hu bruk pambuak khang kajap. Urang pan akaok dom bhum palei ndom meyai lac, brei hu bruk pato tacei sa hatai sa jalan piah jhul tagok labik Binh Duong klak uak drei tagok khang kajap, rik tame bruk patagok karo di Ban raya Ho Chi Minh./.