Paglaong bruk caga dahlau sap Viet ka anek saih di bhum mikva bangsa takik

Piah daong ngak danak dak “Paglaong bruk caga sap Viet Nam ka uranaih mầm non saong anek saih tiểu học bhum mikva bangsa takik tukvak ka 2, thun 2021 - 2025” hu ba mai kein lagaih, dom labik mapto magru mầm non, tiểu học hu peih ngak siam bruk paglaong sap Viet ka uranaih tapa dom bruk pablak, bruk pato magru phổ thông; paglaong pato magru đạo đức, bruk diukrai, lamo, mapt magru giới tính saong ilamo pacang caga, plaih di bala, rambuac, khik tani tanat bruk pato magru dib hum ceik, bhum mikva bangsa takik, trun manieng bruk oh samu gauk di dom bhum palei. Taeng di bhum mikva bangsa Cam, dom sang bac peih bruk bac akhar Cam tui jalan pilih ruah hu brei adat di Danak dak pato magru phổ thông 2018, piah khik ramik saong patagok yaom glaong ilamo di bangsa Cam.

Patui di nan, dom labik daok patui veik buh jien tame pabak, salih, pabak pandap panda pato magru, phần mềm pato akhar Viet lagaih haong taong abih dom kapul, nyaom, tal bac, dom labik sang bac mầm non, tiểu học di dom xã kan kandah, xa biak kan kandah hu uranaih lac urang bangsa takik. Gam tui di nan, iek praong bruk paglaong ilamo kapul gru pato, dom urang jakar ngak gah khik ramik di dom labik pato magru mầm non saong tiểu học hu anek saih lac urang bangsa takik, khik tani tanat tal thun 2025, hu takik di nyu lac 30% urang jakar khik ramik, gru pato pakat mầm non saong tiểu học lac urang Viet daok ngak bruk di bhum mikva bangsa takik thau sap di bangsa di uranaih piah pato magru, ndem mayai nao mai haong anek saih. Dahlau di nan, danak dak “Paglaong bruk pato sap Viet ka ranaih mầm non saong anek saih bac tiểu học bhum mikva bangsa takik tukvak 2016 - 2020, pamaong tal thun 2025” hu peih tabiak di 50 sang bac, 282 kapul nyaom, tal bac mầm non saong 47 sang bac, 66 labik sang bac tiểu học hu uranaih, anek saih bangsa takik di 7 huyện: Tuy Phong, Bắc Bình, Hàm Thuận Bắc, Hàm Thuận Nam, Hàm Tân, Tánh Linh saong Đức Linh.

Langiu di nan, abih dom anek saih bangsa takik jeng hu padang kiang ngak sang tapuk thư viện, labik puk palei saong dom labik ma-in karei hu pagam tapan hu cih vak meng sap Viet piah daong ka uranaih pambuak yaok harei harei gam haong sap Viet. Dom harei pacacah, mbeik drei tame “vak akhar huruh gheih”, “Sap Viet di khol adei”, “Harei puac sap Viet”… hu sang bac khik tani tanat peih ngak yaok mbang.

Hadei di 5 thun (2016 - 2020) Bình Thuận hu jaik 5.000 uranaih bangsa takik pakat pabam mầm non hu mai tame sang bac (meblah 51% taong abih tih dom uranaih); 100% uranaih bangsa takik hu tabiak tal bac jeng hu paglaong sap Viet. Meng nan, uranaih meda hu thau cambaih sap Viet, bhian ndem puac nao mai meng sap Viet, khang hatai, hu ilamo piah tame tal 1. Daok pakat tiểu học, bruk bac sap Viet di anek saih jeng hu paglaong cambaih laih, abih di nyu nan lac prein pandar sap Viet di anek saih meng tal 2 - 5 hu rilo siam makre. Rilo meng lac dom anek saih hu ndem, pang thau cambaih piah ndem mayai nao mai dalam bruk raiiduk, main saong pabak hu panuac ieu kakei dalam bruk bac magru./.

Urang lang: TS Phú Văn Hẳn – 14/08