Dalam bilan 9 meng blaoh, lac bilan anek saih nao tal sang bac tame thun bac bahrau. Piah paglaong hatai sahneng, ngak njauk tui hukum nao mai angaok jalan ka anek saih, abih di nyu lac anek kamuan urang bangsa takik, gah cảnh sát giao thông - Công an huyện Bắc Yên hu brei dom kapul ngak bruk pasang iek luac harei melam. Đại úy Lê Hữu Nhân – Phaok akaok Kapul Cảnh sát giao thông - Trật tự công an huyện Bắc Yên brei thau:“Kol dahlak pataom tame dom anek saih peih nduac radaih suan adat hukum yau ye pataom gauk lạng lách, nduac samar, oh tuak me-om tamo bảo hiểm tuk peih nduac radaih angaok jalan, pambuak bruk haong mban giám hiệu dom sang bac peih bruk pathau khan, brei thau adat hukum, paglaong akaok sahneng saong pambuak bruk haong amaik ame di anek saih, kakei, pato dom adei ngak suan, saong khan brei sang bac thau piah hu jalan langyah tui quy định”

Thun bac 2023-2024, dalam huyện Bắc Yên hu 45 sang bac hu labaih 20.000 anek saih dom pakat. Piah ka dom adei thau cambaih, Cảnh sát giao thông Công an huyện Bắc Yên pilh ruah asal pathau khan lagaih haong umo thun di anek saih. Adei Lèo Thị Nga Diệu – tal bac 11A, Pasak pato megru thường xuyên huyện Bắc Yên khan lac:“Di huyện Bắc Yên di kol adei, rilo anek saih oh ka tal umo thun peih nduac radaih máy min hu amaik, ame jao brei radaih nao bac. Rilo tuk peih bac, dom ayut nan pajeng gauk nduac samar lo, yaom lac angaok jalan tuk nan hu biak rilo anek saih daok nao takai mai sang. Adei mboh biak jhak, biak mbuan ba tal bala. Hu rilo mbang adei jaik njauk dom ayut nduac radaih máy peih samar ginuh tame. Huac lo”.

Cei gru Bạc Văn Ân – Phaok Hiệu trưởng Sang bac Phổ thông bangsa gam bac gam daok Trung học cơ sở saong Trung học phổ thông Bắc Yên brei thau:“Sang bac Phổ thông bangsa gam bac gam daok THCS & THPT Bắc Yên hu pathau khan ka anek saih dom adat hukum meng rilo jalan ngak yau ye di tuk chào cờ harei akaok adit, peih dom mbang ngoại khóa, dalam nan hu da-a dom sa-ai dalam kapul cảnh sát giao thông trật tự công an huyện Bắc Yên pambuak bruk haong sang bac piah pato pakai ka dom adei thau ka hukum salamat nao mai angaok jalan mbak, tapa nan daong ba adat hukum tame dalam raidiuk, saong tapa nan, dom adei jeng thau paglaong hatai sahneng jang dalam bruk ngak njauk tui adat hukum”

Meng rilo jalan ngak samu gauk, siam lagaih, hu padang ngak tani tanat, cambaih laih, hatai sahneng di anek saih daok di huyện bhum glaong Bắc Yên di tỉnh Sơn La dak harei dak hu glaong tagok, min bruk khik kajap siam mekre salamat nao mai angaok jalan tuk halei jeng lac bruk praong brei langyah chip, taphia bruk ba tangin tame bruk di dom gah chức năng, brei hu bruk ba tangin tame di abih menuac sia, puk palei, piah ka ilamu nao mai angaok jalan hu  pambak tabiak praong dalam./.