Piah daong paglaong hatai sahneng tuk nduac radaih di jalan mbak, yaok urang njauk peih ngak siam dom bruk yau: ka sa lac: Dahlau tuk peih radaih di jalan mbak hu pasang iek radaih drei hu salamat halei oh. Dua lac: Ba ginup harak gar tui adat tuk peih radaih di jalan. Klau lac: cuk tamo siam pacang khik akaok, ndem oh haong bruk cuk tamo oh siam. Pak lac: Nao njauk jalan, binah jalan, labik jalan,…tui adat, tuk halei jeng sahaneng ngak njauk tui adat hukum Salamat jalan mbak. Lime lac: oh nduac samar jang adat brei nduac. Paglaong hatai sahaneng parabha jalan ka urang karei nduac, vaih gah ieu, vaih hanuk… njauk tui adat hukum. Pasram hatai cang tuk gaok gom jalan mbak atau gar jalan. Njauk thau daong urang gaok bala jalan mbak. Nam lac: pasang iek, pasiam radaih njauk tui tukvak ba tabiak. tijuh lac: Pasram jalan diukrai hu ilamo dalam tuk peih radaih saong ngak siam adat hukum “Pak oh, klau hu” bo UB Salamat jalan mbak pakat negar hu jak ba rahra ngak tui tuk peih radaih di jalan.

“Pak oh” lac: Oh menyum alak mbia, oh nduac samar, nduac suan, nduac tapa gom bhong, oh nduac radaih tuk oh hu ginup harak gar tui adat hukum; oh meblah mek takai jalan, lih tame mbaok jalan pacang khik salamat jalan mbak; oh ndom puac jhak haong taong abih urang nduac radaih di jalan jeng yau tuk gaok bala radaih di jalan mbak; oh caik rahtabiak bala tuk nduac radaih di angaok jalan.

“Klau hu” lac: hu thau ginup hukum gah jalan mbak; hu hatai sahaneng  glaong abih haong rup drei saong bol bhap rahra; daok dang ndom puac hu ilamo, pambuak gauk daong urang tuk gaok bala jalan mbak.

Ong Nguyễn Trọng Thái, dahlau daih ngak Chánh Văn phòng Ủy ban Salamat jalan mbak Negar ndem lac: “Ka sa lac brei ngak pasiam dom adat hukum gah siam mekre salamat jalan mbak piah khik kajap, piah paglaong siam lagaih bruk khik ramik di karja jeng yau brei ka urang peih radaih di jalan mbak ngak tui ka njauk. Dua tra, paglaong bruk pathau khan dom adat hukum tal dom urang peih radaih di jalan mbak jeng yau pathau khan tal abih rahra, abih di nyu nan lac dom labik atah bayah saong bhum mikva bangsa takik.”

Pato pakai ilamo peih radaih di jalan mbak dahlau di abih lac meng yaok baoh sang. Ong amuk, amaik ame hu ngak siam lagaih bruk pato pakai, kakei anek taco saong dom urang dalam sang hu ilamo tuk peih radaih di jalan mbak. Abih di nyu nan lac urang praong thun ba akaok nao dahlau, hu hatai sahaneng ngak siam dalam bruk peih radaih di mangaok jalan mbak salamat piah anek taco ngak tui. Sang lac sa labik pato pakai camereip ngan haong yaok sa urang. Gam tui di nan, pathau khan, pato pakai hatai sahaneng tuk peih radaih di jalan mbak di rahra pak labik daok, jabat, sang bac, labik ngak bruk di urang ngak, dom kapul nyaom chính trị - xã hội, tapa nan urang hu pang, hu thau saong gam haong gauk klah rabha, bac megru, meng nan hu pasiam hatai sahaneng, tuk peih radaih di jalan mbak di yaok sa urang. Ayut Nông Thủy Nương, tal bac 11A5 Sang bac Phổ thông Bangsa gam bac gam daok tỉnh Cao Bằng khan lac: “Dom bruk yau ye ba gauk juak radaih ngak jeng talei angaok jalan, nao radaih điện atau radaih patuh bo oh cuk tamo pacang khik akaok. Lac sa bruk biak jhak brei mboh oh lac dom bruk ngak jhak bo brei mboh hatai sahaneng oh siam di khol drei. Kayua yau nan ye,tui adei lac tah klaak chip bruk ngak ini. Khol drei njauk pathau khan saong paglaong hatai sahaneng ngak njauk tui hukum salamat jalan mbak.”

Piah ka bruk ngak njauk tui hukum jalan mbak hu siam lagaih, langiu di bruk pathau khan, gam haong nan lac daom jalan taong phạt nao tui. Tapa nan ngak jeng hatai sahaneng ngak njauk tui adat hukum tuk peih radaih di yaok urang. Gam haong nan, paglaong hatai sahaneng ngak bruk di kapul urang jakar Cảnh sát jalan mbak, pasang iek jalan mbak, dom jabat, kapul nyaom, menuac urang hu bruk ngak pambuak tal./.