Yaok adit 2 melam, sa-ai Hoàng Thị Thêm (urang Tày, daok ngak bruk di Jabat bangsa, Rayo papar sap – papar binguk tỉnh Lạng Sơn), rami ramik bruk hit di sang piah nao tal labik pato sap Tày ka urang jakar, công chức, viên chức. Sa-ai Hoàng Thị Thêm khan lac: Bruk pabak prein pang, menyai saong thau sap bangsa Tày hu daong ka sa-ai khang hatai jang dalam dalam bruk vak, lang sap dom khau tin, hu thau jang saong hu daok jaik mikva jang tuk nao ngak bruk di puk palei.“Dahlak mboh khóa bac ini biak kein ka dahlak. Dom gru pato biak abih hatai jai, pato dom ilamu biak jaik haong bruk di anak meta ka yaok urang bac, dahlak mboh biak mbuan thau saong thau hu rilo ilamu. Dahlak lac urang Tày ye tapa nan jeng daong hu rilo ka bruk ngak di dahlak.”

Urak ini dalam tỉnh Lạng Sơn hu 12 labik pato bac hu peih dom tal bac sap bangsa takik (rilo meng lac sap Tày, Nùng). Dalam dom khóa bac, urang bac hu bac tui dom asal kadha, hu thau dom panuac hu makna yau gauk, cagar gauk, panuac hu rilo makna..., saong abih di nyu lac hu thau ka ilamu meng kan, ka adat cambat, tanarakun di bhap bini piah tui nan ngak bruk hu siam jang.

Amuk Nguyễn Thị Hương, Phaok Yam ndok Pasak pato pakai sap negar langiu- pato pakai gam gam huyện Cao Lộc brei thau: Piah paglaong jang jak jeng dom tal pato saong bac sap bangsa takik, Pasak hu rilo jalan pato lagaih piah patagok bruk chủ động di urang bac, kham merat pandar công nghệ thông tin, pandar dom pandap pang, iek saong pachreih urang bac pambuak bruk bac di tal bac haong bruk ndom biai nao mai dalam taom gaok yaok harei...“Pasak jeng bhian peih bruk brei ka urang bac nao tame puk palei taom gaok tapak haong mikva bangsa, ndom biai nao mai haong mikva, duah thau bruk pandar ilamu kĩ thuật, bruk ngak mbang ngak huak di puk palei. Gam haong nan, lac ravang dom bruk ngak mbang naih joi di dom sang bhap bini, ravang iek dom inem mek sajarah, labik mekre hu angan di palei…”

Tỉnh Lạng Sơn hu 8 bangsa, dalam nan rilo meng lac urang Nùng, Tày haong Kinh. Anak meta mboh lac, bruk hu bac sap bangsa takik hu daong ka dom urang jakar, công chức daok ngak bruk dalam bhum bhap bini bangsa takik hu mbuan lagaih jang dalam bruk ngak saong dalam raidiuk. Meng thun 2016 tal ini, dom Pasak pato pakai sap negar langiu- pato pakai gam gam dalam tỉnh peih hu labaih 200 tal bac sap bangsa Tày, Nùng saong hu 8.000 urang bac hu brei harak chứng chỉ. Amuk Phan Mỹ Hạnh, Phaok Yam ndok Sở Pato megru tỉnh Lạng Sơn brei thau:“Bruk pato bac sap bangsa takik taduan hu bruk sangka di dom urang jakar, urang lin dalam tỉnh. Kol dahlak mboh lac bruk bac sap bangsa takik hu daong ka dom urang bac pandar hu sap bangsa dalam ndom biai nao mai saong dalam bruk ngak, pabak hu bruk ngak di drei.Tuk thau sap ndom, panuac puac, ilamu, adat cambat tanarakun di bhap bini bangsa takik, hu daong ka urang jakar hu mbuan lagaih jang tuk ngak bruk di palei, saong dom khóa bac jeng hu daong biak praong dalam bruk khik ramik ilamu bangsa.”

Pato saong bac sap bangsa takik lac sa sarak biak siam di Đảng saong Karja drei, rik daong khik ramik saong patagok yaom glaong ilamu di dom bangsa takik, daong ka dom rai anek kamuan urang bangsa takik patagok hatai sahneng ka bangsa, mboh hadah mbaok meta, khang hatai jia piah ba drei tame bruk dak padang taneh ia. Meng dom kapul urang jakar daok ngak bruk di bhum urang bangsa takik, thau saong menyai hu sap di mikva, hu daong ngak siam jang bruk brei thau dom sarak, dom jalan ngak di Đảng, karja, adat hukum di Karja nao tal mikva jang, rik daong tame bruk cakrok patagok KTXH di palei, patagok bruk jum pataom bangsa./.

Urang lang: Mousa Phương – 31/10