Labaih 10 thun pala phun mang tay hijao, dom urang nong yau ong Não Văn Say daok di palei Tuấn Tú, xã An Hải, huyện Ninh Phước mboh biak bui sambai tuk phun mang tay hijao hu pok brei angan lac mek hu tanut chuan OCOP 3 patuk saong mbang camriep hu ba tagok labik pablei salih điện tử. Ong Say biak chreih chrai jang tuk hu Hợp tác xã Dịch vụ tổng hợp Tuấn Tú daong phun jien pala tui tanut chuan VietGap piah ba mang tay hijao tame dom siêu thị dalam saong langiu tỉnh. Ong Não Văn Say khan lac: “meng harei tame OCOP ini ye mikva hu hatai saneng tuk halei jeng ngak mang tay hijao, khak drak pandar huu co…”

Tok pala 2 sào măng tây hijao, yaok harei sang amuk Kỳ jeng hu jien mek tame labaih 1 triệu đồng. Amuk khan lac: Phun mang tay hijao hu pala tui jalan hữu cơ saong hu pablei  di mangaok sàn pablei salih điện tử hu daong ka bruk pablei pandap hu lagaih jang. Amuk Thị Kỳ, daok di palei Tuấn Tú, xã An Hải, huyện Ninh Phước, t. Ninh Thuận brei thau: “meng harei ngak mang tay ye biak lac tani tanat jien mek tame ka sang..”

Urak ini, Hợp tác xã Dịch vụ tổng hợp Tuấn Tú hu 2 pandap hu pok brei angan lac mek hu tanut chuan OCOP 3 patuk, nan lac mang tay hijao saong ce mang tay. Huyện Ninh Phước hu daong 740 triệu đồng ka Hợp tác xã blei jamraik piah ngak dom pandap meng mang tay. Ong Hùng Ky, Yam ndok HTX Dịch vụ tổng hợp Tuấn Tú, xã An Hải, huyện Ninh Phước, Ninh Thuận ndem lac: “HTX Tuan Tu meng di harei pala mang tay ye mikva dalam HTX hu jien mek tame biak rilo”.

Măng tây hijao lac phun pala praong di Ninh Phước, hu yaom glaong saong daong pasiam raidiuk bhap bini. Urak ini, huyện hu qui hoạch bhum pala mang tay hijao, labaih 200ha di xã An Hải saong Phước Hải. Min tui ong Nguyễn Mạnh Tiến, Gru pato di sang bac Đại học Quốc gia TPHCM: piah paglaong yaom mang tay, Ninh Phước brei jhul khang dom bruk pachreih pablei salih piah yaih khan, pablei pandap saong daong ka rahra pandar dom ilamo công nghệ piah thau hu asal di pandap: “Dom pandap panda hu pambuak tal mang tay hu lagaih tuk bo mblang taneh pala mang tay di dalam huyện dak harei dak tagok. Saong pandap ini hu rahra buh jien tame ngak pasiam kadung papaok, biar tauk, peih praong bruk ngak saong duah jalan pablei tabiak. Dom pandap OCOP hadei di tuk hu pok brei angan saong taong yaom meda daong ka dom pandap hu pok brei angan lac OCOP hu tabiak langiu darak pasa saong patagok jien tame tapa bruk daong di dom gah karei.”

Hu pala tui tanut chuan Vietgap saong mek hu angan lac OCOP 3 patuk, mang tay hijao urak ini biak lac phun pala praong di urang ngak nong daok di xã An Hải, huyện Ninh Phước./.