Kuhria dalam 2 bilan akaok thun ini, Krông Bách hu 3 urang metai kayua ruak meruai, lac huyện hu urang ruak meruai ralo abih di tỉnh Dak Lak. Ong Y Doãn Niê, pho akaok UB bhap bini huyện Krông Bách mboh lac, bruk pacang caga ruak di huen gaok rilo kan kandah kayua rilo baoh sang raong asaw meyao oh ngak tui jabat karja dalam bruk pacang caga ruak:“Bhap bini raong asaw meyao dalam huyen ralo meng peih palao di hamu apuh, urang jakar thu y rilo mbang mai klauk jru caga ruak min baoh sang oh chap mek hu saong bhian plaih bruk klauk jru vaccine.”

Di ban Buôn Ma Thuột atau labik halei karei di Dak Lak meng puk palei tal ban sit, jeng hu mboh dom drei  asaw di langiu jalan. Bruk nan mbuan ba tal bala ka urang nao angaok jalan. Sa-aiTrịnh Thị Hồng Hạnh, daok di phường Tân Lợi, ban Buôn Ma Thuột daok mboh biak huac kayua sa-ai hu mbang njauk asaw kaik blaoh: “Adit dahlau, dahlak daok nao takai tal darak, ye sa drei asaw di gah dalam daoh plong tabiak mai. Tuk nan dahlak biak huac saong nduac klak, min dak nduac, asaw dak pagui tui saong sahanak khin kaik manuac jang. Mboh asaw raong palao ye dahlak biak huac”.

Tui kuhria rah tapa, yaok thun, Dak Lak hu labaih 6.000 urang njauk asau, meyao kaik brei tame taong ruak caga dahlau. Kuhria meng akaok thun tal ini, tỉnh hu 4 urang metai kayua ruak meruai. Ong Đỗ Xuân Dũng, Pho Yam ndoc Sở Ngak nong saong Patagok palei pala tỉnh Đắk Lắk brei thau, bruk ba tal jit ruak tagok ralo lac kayua oh khik iek hu taphon asau, meyao; Bruk klauk jru vaccine caga ruak meruai daok biar, tok hu 37%. Langiu di nan, bruk taong phat tui hukum gah khik iek asau raong, klauk caga ruak meruai ka asau, meyao oh ka catang.“Meng dahlau mai, oh ka mboh jabat halei, urang halei taong phạt bruk caik ka asaw kaik menuac. Hukum hu blaoh min khol drei ka oh pandar. Langiu di nan, bruk pathau khan ka pacang caga jit ruak meruai ye njauk brei peih ngak catang gah taong phat. Dom urang raong asau, meyao oh ngak tui hukum saong caik rah tabiak bruk biak jhak biak trak damak ye jabat chức năng meda ba tabiak kaoh duas hinh su ngan haong po raong saw meyao tui hukum ba tabik”.

Tui ong Nguyễn Thiên Văn, Pho akok UBND tỉnh Đắk Lắk, piah patrun patakik bruk mbuan tamuh ruak meruai jeng yau patrun patakik urang metai kayua meruai, dom gah chuc nang saong karja palei njauk pataom yaok prein khang piah peih ngak catang dom bruk pacang caga ruak meruai bo tỉnh ba tabiak. Dalam nan, brei pakhang bruk khik iek asau meyao; paglong bruk klauk jru vaccine pacang caga ruak meruai, gam haong nan, jhul khang bruk pathau khan piah bhap bini hu thau cambaic laic ka bruk jhak tal prein yawa kayua ruak meruai. Ong Nguyễn Thiên Văn mboh lac, sahaneng mboh saong hu mbaok tame di bhap bini lac jalan jak jeng dalamu bruk pacang caga ruak meruai.“Dom puk palei sangka caik hatai pathau khan, jak ba dalam bhap bini piah paglong jalan sahaneng di bhap bini ka bruk mbuan ba tal metai lahik kayua ruak meruai. Urang raong asau, meyao brei klauk jru vaccine pacang caga ruak meruai ka taphon asaw meyao. Tuk asaw, meyao kaik brei samar drah nao tal jabat y te iek ruak, taong ruak”.   

Dak Lak daok dalam tuk tabung glong bilan pandiak, lac tuk mbuan lagaih piah ruak meruai di asaw, meyao tamuh tabiak, ngak jhak tal prein yawa di anek manuac. Kayua yau nan ye, gam haong bruk ngak catang di dom jabat karja, bhap bini brei paglong jalan sahaneng ka bruk pacang caga ruak piah patrun patakik ruak meruai./.