Di xã Đắk Ơ, xã Bù Gia Mập di huyện Bù Gia Mập, tỉnh Bình Phước, rilo bingun ia thu abih. Piah hu ia pandar, bhap bini njauk nao atah yaok pluh mbaik jalan likau ia di sang urang hu bingun ia dalam. Rilo urang oh nao atah hu ye njauk buh jien tabiak blei ia. Kurang ia ba tal bruk tahaneh mbang ngak huak, menei gei gaok rilo kan daman.

Ong Điểu Mơ Rớt, daok di palei Bù Rên, xã Bù Gia Mập khan lac, jaik 1 bilan ini mai, bingun ia di sang thu abih ia. Sang ong hu kuac dalam trun  ala min oh hu ia:“Oh hu ia pandar, sang buh jien tabiak blei ia mai pandar. Sa m3 ia yaom 150.000 đồng, kuang ia di sang 3m3 meng bak. Kuang ia ini piah tahaneng mbang, menei, papah khan ao, brei ka pabui menyum dalam 4,5 harei lac abih”.

Daok sang muk Nguyễn Thị Bạch Lan, ấp Bù La, xã Bù Gia Mập, yaom lac bingun ia oh ka thu abih min oh ginup ia pandar ka 4 urang dalam sang. Nan ye, jaik 1 bilan ini, sang muk abih jien trieu piah blei ia pandar:“Oh hu ginup ia nan ye njauk blei ia pandar. Sa radaih labaih 100.000 tal 200.000 đồng, pandar dalam 4 harei. Hu ia ye drei pandar hu rilo hasit, menei gei, papah khan ao hu sahanang. Urak ini oh hu ia, njauk blei nan ye pandar patak pataom, dalam sang oh hu thei khin pandar ralo. Yaok harei, mek thon mbat praong menei anek taco, hadei di nan mek ia nan papah khan ao, biak glaih glar”.

Karja huyen Bù Gia Mập brei thau, hu pambuak haong Đoàn Kinh tế - Quốc phòng 778 (Quân khu 7), Đồn biên phòng Bù Gia Mập, Bein pakat negar Bù Gia Mập brei ia ka bhap bini oh mek jien. Piah  bhap bini hu ginup ia pandar, dom đơn vị pajeng ia gam gam meng page tal biar harei saong oh hu harei padeih. Yaok harei pabak brei labaih 400 m3 ia piah mikva hu ia pandar.

Thiếu tá Đinh Thế Cộng, Chính trị viên, Phaok Đồn biên phòng Bù Gia Mập brei thau, tukvak tapa, đồn haong bhap bini peih ngak rilo bruk piah cak rok patagok kinh te, ilamo, xa hoi di palei. Abih di nyu lac, bilan pandiak thu lagu, Đồn bhian brei ia ka mikva urang ngak nong oh mek jien.“Đồn hu pambuak haong dom gah dalam palei peih bruk yaok pataom, brei ia ka mikva. Bruk kan kandah praong abih di urak ini lac ia hacih, kayua ia daok kurang. Piah hu ia hacih brei ka mikva pandar, Đồn saong xã hu pambuak bruk nao duah ia  hacih piah brei ka mikva”.  

Urang ngak praong di UBND xã Bù Gia Mập, huyện Bù Gia Mập brei thau, dalam xã hu 1.776 baoh sang min urak ini hu labaih 300 baoh sang kurang ia pandar. Lac xã bhum taphia negar hu bhap bini bangsa takik labaih 73%, raidiuk bhap bini jeng daok gaok rilo kan kandah. Meyah oh hu pabak brei ia, mikva glaih glar duah jien bei ia pandar. Nan ye, karja xã pambuak haong dom đơn vị brei pajeng ia mai alin brei ka mikva: “Meyah caong khin blei hu ia ye brei hu jien bayar ka urang chip urang meng pajeng ia mai brei, min oh lac sang halei jeng hu jien piah blei. Bruk di khol dahlak lac brei ia ka mikva tal tuk halei mikva hu ia pandar tani tanat veik meng padeih. Sa harei brei 35 m3 ia ka 30 tal 40 baoh sang tui pandap padang ia. Meyah sang halei pandar sa khoi ye brei sa khoi, sang halei pandar 2 khoi ye brei 2 khoi piah urang pandar”.

Kuhria tal harei 25/3, pandiak bhang ngak brei 1.444 baoh sang, labaih 8.283 ha phun pala di 7/11 huyen, ban sit di Bình Phước gaok kan kandah. Tui kuhria mboh dahlau, pandiak bhang tua riya di tanut 3 tal 4, lac tanut kan kandah khang tal biak khang.

Urak ini, dom puk palei dalam tỉnh Bình Phước daok peih ngak dom jalan pacang caga pandiak bhang tua riya, kurang ia pruh ka phun pala saong ia pandar di bhap bini./.