Takik hu sa palei urang bangsa takik halei di Tây Nguyên bo kaya meda saong gheih mekre yau Ako Dhong. Labik ini daok hu biak rilo dom baoh sang atah meng kan, dom bộ chiêng quý sap yava atah taduan raok tuai, rilo urang kumei chreih chrai menyim khan bai tapen sang atah… Tuai meda nao vil val Ako Dhong, maong iek dom baoh sang atah meng kan di urang Ê Đê yau akaok kapal gilai pamaong tabiak pabah mbang praong. Gah likuk baoh sang atah lac biệt thự, lac sang bahrau, praong, mekre daok mala dom halui kayau hijao.

Nghệ nhân Ama H’Loan chreih chrai khan lac: “Urang Ê Đê dalam palei kaya meda lac meng thau ba drei tame haong saman ini saong khik ramik yaom glaong ilamu meng kan di bangsa drei. Rilo ilamu gheih mekre di urang Ê Đê jeng daok hu khik tamo meng cồng chiêng, ché quý, rilo urang kumei jeng daok menyim khan bai, urang taha pak yot, dom adat cambat jeng hu peih ngak saong abih di nyu lac jeng daok khik baoh sang atah”.

Sang atah lac brei mboh ka ilamu di urang Ê Đê. Tuk raidiuk bahrau,  kinh tế kaya meda, rilo sang caong khin ngak sang praong, khang kajap. Jeng hu tuk, mikva urang Ê Đê di Ako Dhong khin yah klaak sang atah piah ngak sang kiak. Dom urang taha dalam palei kham merat khik veik, pathau khan, langyah tal yaok menuac urang. Nan ye bo sang atah jeng daok hu mikva pak ini khik ramik tani tanat. Meng khik ramik dom gheih mekre meng kan hu daok tamo, palei Ako Dhong urak ini hu jeng labik ravang me-in dui pachreih tuai tuk mai tal Đắk Lắk.

Ako Dhong lac palei mekre abih di Đắk Lắk - Tây Nguyên haong 32 baoh sang atah meng kan, gam haong rilo bộ cồng chiêng, alat ragam, dom nghệ nhân, kapul daoh tamia saong dom bruk ngak meng kan hu bhap bini dalam palei khik ramik saong patagok tapa rilo rai dalam palei.

Tỉnh Đắk Lắk hu 49 bangsa daok, ngak jeng rilo janih ilamu, abih di nyu lac ilamu dom bangsa takik di labik hu mbuan lagaih ka cakrok du lịch bhap bini. Vaktu 2021-2025, Tỉnh ủy Đắk Lắk hu tabiak danak dak patagok du lịch tỉnh Đắk Lắk tal thun 2030. Tui nan, pasak ka patagok du lịch lac ban Buôn Ma Thuột, huyện Lắk, huyện Buôn Đôn saong hu brei dahlau bruk pataom prein tame ngak, kham merat jeng gah kinh tế dang akaok di thun 2030. UBND tỉnh jeng hu daong patagok du lịch bhap bini di dom puk palei urang bangsa takik vaktu 2021-2025, pataom tame daong ka 5 puk, palei. Dalam nan palei Ako Dhong, phường Tân Lợi, TP Buôn Ma Thuột hu pilih ruah ngak iek.

Sở Ilamu, Thể thao saong Du lịch Đắk Lắk hu tabiak panuac brei angan  ka palei du lịch bhap bini Ako Dhong. Tuai mai tal palei Ako Dhong oh lac hu maong iek puk palei gheih mekre, hu mbang iek dom janih pandap bingi karei, bo daok hu duah thau ka ilamu hadah krah di urang Ê Đê.

Tui Phaok Yam ndok Sở Ilamu, Thể thao saong Du lịch Đắk Lắk Nguyễn Thụy Phương Hiếu, piah daong ba jalan saong pambuak haong bhap bini dalam palei ba tangin tame khik ramik saong patagok hu prein khang di drei, ngak jeng sa labik du lịch bhap bini hadah krah, tỉnh Đắk Lắk tacei pato dom sở, ban, ngành saong puk palei sangka daong padang ngak cơ sở hạ tầng, pandap panda ilamu du lịch, pato pakai bruk ngak du lịch, padang pandap du lịch, khik caga alam môi trường....

Tal urak ini, mBan khik ramik du lịch bhap bini palei saong mikva dalam palei hu caga ginup dom kadha siam di abih ka labik saong menuac piah duh ka tuai dalam saong langiu taneh ia.

Piah ka bruk du lịch bhap bini palei Ako Dhong cakrok tani tanat, khang kajap, Sở Ilamu, Thể thao saong Du lịch Đắk Lắk caong khin hu daong pabak prein khang piah khik ramik saong patagok du lịch bhap bini di palei. Gam haong nan caong lac, mBan Khik ramik du lịch bhap bini Ako Dhong peih ngak siam quy chế ngak bruk, gam haong bhap bini khik ramik siam dom drap ar hu daong, saong buh jien tame ngak paglaong chất lượng bruk ngak hu siam mekre, salamat, văn minh, khik ramik ilamu bangsa. Hiệp hội Du lịch Đắk Lắk saong dom doanh nghiệp du lịch lữ hành pambuak bruk haong mBan Khik ramik du lịch bhap bini palei sangka padang ngak danak dak du lịch pambuak haong bruk ngak du lịch di palei./.