Dom kumei dara Chăm dalam khan aow bangsa bak sambo màu chreih chrai uan raok thun bahrau

Dom harei puac thun, kol dahlak nao tapa krong Hậu, tapa phà Châu Giang piah nao tal dom palei  Chăm di xã Châu Phong, ban sit Tân Châu, tỉnh An Giang. Angaok dom jalan ba tame dom palei Chăm, hala doh negar hu tual bak abih, meriah bhong, mboh biak bui sambai chreih chrai. Dalam ngin la-an bilan xuân, labik ini labik daih, dom kumei dara Chăm dalam khan aow bangsa bak sambo màu yam takai angaok dom jalan palei  hu tuh betông samu, tapak. 

Thun ni, sang muk A Sé daok di palei  Phũm Xoài, xã Châu Phong, ban sit Tân Châu, tỉnh An Giang raok Tết dalam boh sang bahrau, khang kajap siam mekre kayua mBan lambaok urang Cam Islam An Giang hadiah brei. Hu sang bahrau lac bruk cong khin di sang muk  A Sé meng lavik mai, kayua jien duah hu takik meng bruk ngak pah, pablei har, min hu 5 cambuai mbang, oh thau tal tuk halei meng hu jien padang hu sang. Muk A Sé ndom lac, meng harei ni sang muk  kuhria ngak mbang, rong dom anek mbang bac: “Uan tambuan lo, sang bruk abih ye, urak ni hu boh sang bahrau lac meng hu mBan đại diện song bhap bini kuhria brei ka sang di hulin, uan tabuan lo. Urak ni, hu sang ye kham merat tapa truh kan kathaot. Kham ngak brei ka anek nao bac tal tal 12, piah hadei di ni nyu kuhria ka adei nyu”.

Urang Chăm Islam An Giang hu harei roya karei di drei, min harei ni, gam song bruk patagok di xã hội, bruk lai tame gauk di dom ilamu gheih mekre meng kan di dom bangsa, mik va Chăm di An Giang jeng iek Tết Nguyên đán di urang Yuan yau sa harei roya, yaom lac dok pak harei, ngak mbang atah di labik halei jeng ba gauk mai sang.Tui ong Haji JacKy, Akaok  mBan đại diện urang Cam Islam tỉnh An Giang, di tuki Tết meng kan di urang Việt, kol dahlak bhian pahadar gauk, dom harei tết langiu di bruk nao ravang gauk, main sambai giải trí…jeng brei khik kajap dom bruk pacang caga jit ruak, gam song karja piah rik dong jhul kandun likuh jit ruak. Min, oh lac yau nan bo bruk raok tết takik bui sambai: “Tết nguyên đán, bhap bini bangsa Cam jeng nao pablei salih pandap Tet…”

Ong Muhammad Sa Lếs, daok di palei Phủm Xoài, xã Châu Phong khan lac: Rai duik urak ni di mik va Chăm hu trei si, haniem phol jang dahlau. Meng hu dom danak dak hu padang ngak, nan ye yaok palei Chăm Châu Phong urak ni hu salih bahrau mboh di anak meta, rilo danak dak duh ka bhap bini hu padang ngak. Dom jalan mbak dalam palei jeng hu tuh  bê tông ba mbuan lagaih ka mik va, rilo boh sang praong, siam hu padang ngak bahrau, Sang bac  Mầm non bangsa hu padang ngak bahrau, điện palei pala, ia saat, hu ginup abih; tal urak ni, taong abih dom boh sang mik va bangsa hu pandar  điện negar song pandar ia hacih saat ,… Dom boh sang ngak mbang pablei salih jeng hu dong brei mesraiy phun jien. Meng nan, rai duik mbang ngui dok dang di mik va Chăm dak harei dak hadah hadai. 

Likau la sang megik Islam hu padang ngak biak gheih biak mekre gam song bruk menyim khan bai meng kan di urang Chăm daok di Châu Phong, Kol dahlak  vaih tame ravang sang ong Hakem Salayman, Hakiem sang megik  Aman daok di  xã Khánh Hòa, huyện Châu Phú, njauk di tuk sang ong dok brei pandap Tết ka dom urang Yuan dalam palei. Ong Hakem Salayman brei thau, urang Chăm An Giang tuk halei jeng thau dar phol Đảng song karja oh padeih isangka kuhria ka rai duik di mik va . Yaok tuk Tết meng kan atau dom harei riya prong di urang Chăm, kol dahlak tuk halei jeng taduan hu bruk sangka di dom mban, ngành, dom kapul nyaom mai rivang, tadhau ayuh Tết song alin brei pandap. Bruk ni hu ngak brei talei jum pataom  dom bangsa dak harei dak khang kajap

Dok saai Sity Hari daok di  xã Khánh Hòa ye mboh cambaih dom kan kandah dalam thun bloh kayua jit COVID-19, nan ye, saai cong khin dalam thun bahrau jit ruak hu jhul kandun likuh, mik va sahnang hatai patagok bruk ngak mbang.

Meng sarak, jalan ngak njauk di Đảng, karja gam song bruk kham merat yam tagok di mik va, rai duik bhum mik va Chăm An Giang oh padeih salih bahrau song paglong.  Meng nan, yaok tuk Tết mai, tuk phun mai katam dok raak bingu hadah ye  mik va Chăm di An Giang jeng chreih chrai taduan tết, yam tapa thun bahrau song hatai cong khin sa thun bahrau prein yava khang kajap, bruk ngak mbang ngak huak hu siam mekre, sang halei jeng trei si, ginup meda piah gam haong taneh ia nao tagok./.

Urang lang: Hani Pha – 29/01