Sang sa-ai Saphi Y khang hatai nao mesraiy jien pala thanh long

Dom jalan nao mai dom palei hu tuh bê-tông hacih sa-at, praong laneing, dom phun bingu hadah tapen jalan, gom jalan hadah tuk melam trun, jalan điện negar hu dui tal yaok baoh sang, puk palei sron mbon, bhap bini rap ar tuai damuai...lac dom hagait hu mboh di palei Cam Ấp 4, xã Xuân Hưng, huyện Xuân Lộc, tỉnh Đồng Nai urak ini.

Ong Abdohamit, Hakiem Jamaah Nourul Ehsaan  lac urang abih hatai ka bruk puk, bruk palei saong kak kajap haong mikva Ấp 4 meng yaok pluh thun ini mai. Meng angan je, meng bruk ba akaok nao dahlau saong meng hatung hatian di drei, ong haong mikva hu ba xã Xuân Hưng ngak salah bruk padang ngak palei pala bahrau di thun 2020 saong daok kham merat mek hu chuẩn palei pala bahrau paglaong di jhung thun ini: “Ban giáo cả bhian pathau khan ka mikva thau, blaoh pablak tame…”

Gam haong mbaok meta palei pala bahrau, urang Cam khang hatai salih janih phun pala takik kein laba tapa dom janih phun hu yaom kinh tế glaong, yau ye: Thanh long, kruac bung, pa-ok, cao su, pa-ok blait, durian…

Sang sa-ai Saphi Y dahlau daih ngak padai, pala tui jalan meng kan nan ye padai hu takik. Meng tuk hu urang jakar ngak nong tacei pato ilamu pala drak, sa-ai khang hatai nao mesraiy jien pala thanh long, pambuak haong dom janih phun karei. Langiu di nan, sang sa-ai daok hu peih tiem pablei tạp hóa piah paglaong jien mek tame ka baoh sang: “Sang dahlak hulin pala thanh long hu 8 công..”

Bruk njauk iek praong nan lac oh kuhria ngak kaya ka ta-eng drei, mikva pak ini tuk halei jeng hu hatai sahneng daong gauk yam tagok. Sang sa-ai Ami Ná lac sang kan kandah, rup sa-ai bhian njauk ruak kik, nan ye sa-ai pagam pambak tame bruk daong di mikva haong karja palei. Bahrau ini, sa-ai hu daong brei tapon pabe binai saong hu tacei pato ilamu raong pabe, peih tabiak jalan tagok bahrau ka bruk ngak mbang di sang. Sa-ai Ami Ná brei thau: “Dahlau deih dahlak raong limo…”

Eik lipa, kathaot rambah daok kadun atah, mikva thau sahneng jang ka bruk kuhria ka harei hadei di anek bhik di drei. Urak ini taong abih dom uraniah hu nao bac meng mẫu giáo tal THPT; palei hu jaik 600 dam dara nao ngak công nhân di dom labik ngak kong haong yaom jien bilan meng 6-8 triệu đồng yaok bilan. Jien mek tame kuhria rah tapa hu jaik 60 triệu đồng yaok urang yaok thun

Ong Trần Đình Lai, Chủ tịch UB bhap bini xã Xuân Hưng brei thau, baoh sang kathaot urak ini tok daok 2,5% dom sang dalam palei saong palei daok kham merat tal puac thun ini oh daok sang kan kathaot: “Bruk padang ngak palei pala bahrau hu ngak brei salih karei raidiuk di mikva urang Cam. Uranaih hu nao bac, rilo adei praong tagok hu mbaok tame dom bruk di palei. Nan lac dom salih bahrau. Abih di nyu lac, bruk lakhah caga hu ngak siam tui adat di karja. Hatai sahneng di mikva hu salih bahrau biak rilo duk haong dahlau daih. Padang ngak palei pala bahrau hu ba mai raidiuk trei sir jang, gah ilamu jeng hu hadah hadai jang, urang Cam haong urang Yuan jum pataom gauk jang".

Palei Cam ấp 4 rilo thun ini mai oh hu tệ nạn xã hội; raidiuk trei sir, điện, jalan, sang bac, bilai iek ruak praong siam. Nan lac bruk hadah mbaok meta, hu meng kham merat saong meng jum pataom yam tagok dalam raidiuk, dak padang puk paga, palei negar di mikva urang Cam pak ini./.

Urang lang: M. Phuong – 26/08