Langik la-ar di tuk page di bilan pataih, ong Abdol HaMid, Hakim palei Cam puk 4 taduan khol dahlak  dalam sang Megik Masjid Nourul Ehsaan di tapen jalan raya 1A. Hakim Abdol HaMid bui sambai lac: Mikva puk 4 urak ini hu salih birau jang dahlau biak ralo. Hu Ndang, Karja  hu sangka daong ngak sang meng Danak dak 134, sang anit ranam ka mikva, jalan betong hacih sa-at, taong abih bhap bini hu pandar ndien saong ia hacih. Ong Abdol HaMid khan lac: “Harei ini, puk 4 salih birau biak rilo. Dam dara dalam palei hu ngak bruk di xi nghiep, duah hu jien tame. Meng tuk mek hu angan palei pala birau paglong dalam palei hu cak rok…Khol dahlak biak thau dhar phol Ndang saong Karja.”

Palei 4, xã Xuân Hưng, hu jaik 3 ribau urang, taong abih lac bhap bangsa Cam tui Islam. Dahlau di thun 2000 raidiuk mikva saong grauk ayut daok rilo kan kandah, sang danaok tayaik kamblieng, jalan mbak gluh baok. Yau nan min, hu bruk sangka di Ndang, Karja thong dom danak dak, sarak hu buh jien tame  ka urang bangsa takik, dalam nan hu urang bangsa Cam puk 4 hu pabak prein khang yam tagok ngak mbang cakrok. Mbaok meta palei kathaot hu salih tame nan lac palei salih birau hadah hadai abih gah, hu jalan mbak nao mai praong tapi tapak, sang ilamo, labik daok hacih sa-at siam mekre saong raidiuk rahra dak harei dak patagok.

Ong Mo Ha Mach A Mine, Bi thư Chi bo, gam ngak akok palei 4 khan lac, bhap bini puk 4 tui agama Islam, meng tuk ngak salah blaoh palei pala birau paglong, raidiuk bhap bini hu siam mekre tagok mboh di meta, labik daok hacih sa-at tuk palei xã hadah hadai – haci hacih- sa-at mekre. Abih di nyu lac mikva thau sahaneng, abih gauk  brei ramik pataom hareik, brei caik harei tui janih di nyu, rik jien tame, tabiak ngak bruk piah pagam jaik 300 baoh gom truac hadah meng pandiak ia harei grauk jalan  dalam palei. Ong Mo Ha Mach A Mine khan lac: “ Urak ini, jien mek tame di mikva mbluak jang, jien mek tame kuhria rah tapa 72 trieu dong sa urang sa thun. Tuk palei mek hu angan palei pala birau, taong abih jalan mbak  dalam palei hu tuh betong, duah gah jalan pala phun kayua hijao saong bingu… Jaik 85% mikva hu blei sarak adat iek ruak tui BHYT…”

Meng tuk tok ngak padai ia, mikva puk 4 thau salih tapa pala phun karei lagaih thaong taneh riya pak ini jeng yau urang caong blei di darak pasar, patagok burk raong limo, pabe, kubao…Hu yau nan lac mai meng Jabat Ngak nong saong Patagok palei huyen hu brei pajaih phun pala, pajaih athur raong, khak drak, jru khik caga phun pala; brei urang jakar mai tal palei piah tacei pato ka mikva  yaok bruk ngak piah hu siam. Meng nan, langiu ngak padai, pala thanh long, tram, mikva daok khang hatai mesre phun jien di gilang pariak sarak karja pala iek phun durian, peih praong bruk raong glang athur.

Yau baoh sang sa-ai Im Rao hu angan salam sarak sang kan kathaot pak ini. Dalam sang dua diuk pasang saong 4 urang anek tok pambak tame hamu padai. Meng tuk hu tacei patao bruk raong limo binai, sa-ai Im Rao khang hatai mesre 100 trieu ndong meng Gilang pariak sarak karja xa hoi piah raong taphon limo. Urak ini diuk saong 3 urang anek di sa-ai nao jhik ka urang dalam xã. Hu jien mek tame tani tanat, yaok thun baoh sang sa-ai  jeng patak pataom hu 60 trieu ndong. Bui sambai jang baoh sang sa-ai hu tabiak truh angan sarak baoh sang kathaot. Sa-ai Im Rao brei thau: “Hulin dhar phol Karja hu daong ka diuk pasang dahlak tapa truh kathaot, mesre 100 trieu blei limo mai raong, diuk pasang anek bik dahlak hu bruk ngak jien patak pataom 50 trieu ndong, raong limo hu 50 trieu veik, meng nan sang hulin tabiak truh kathaot.”

Di puk 4 hu labaih 800 dam dara daok ngak bruk di dom labik ngak kong nghiep jien bilan meg 8 -13 trieu ndong yaok bilan. Hu bruk ngak tani tanat, ye dom baoh sang  kaya meda dak harei dak  hu ralo. Meyah thun 2010, puk 4 hu tal 226 baoh sang kathaot, mbiah tal ini, daok tok 7 baoh sang kathaot dalam abih tih jaik 600 baoh sang. Taong abih uranaih hu nao bac meng mau yao tal THPT. Muk Nguyễn Thị Thu Trang, urang jakar bangsa - agama, UBND xã Xuân Hưng, huyện Xuân Lộc khan lac:“Hadei mek hu angan palei pala birau paglong ye raidiuk mikva hu patagok rilo mboh di meta, abih di nyu lac bhap bini bangsa Cam. Akaok sahaneng glong jang kayua hu urang jakar pathau khan, jak ba, pato jalan yam tagok. Mikva Cam patagok khang kadang meng bruk salih phun pala, bac megru, ngak bruk. Dom dam dara umo 18 thun thau sahaneng jang dahlau.”

Tuk raidiuk saong jalan sahaneng hu hadah krah, urang Cam thau kham merat ba drei tame ngak tui dom bruk jak ba peih ngak di xa, huyen, tinh…Kapol kapulan  di palei Cam pasram daoh tamia, piah pamere bruk di palei, xa jeng yau piah ba nao pakacah di pakat huyen, tinh. Tal bac hukum, akhar huroh saong dom adat cambat  ilamo di urang Cam  tui agama Islam hu mikva khik ramik.

Langik tapa thun birau, dom dhar bingu mai kanyik katam chroh nerang di pandiak hadah hadai, gam cambuai khim klao angaok mbaok meta  di bhap  bini Cam puk 4 yau brei mboh sa raidiuk drei sir di bilan pataih thun birau./.