Thun 1998, sa-ai Ngô Thanh Tân tui ame meng Tiền Giang mai xã Tân Thắng padang mbang ngui. Sang sa-ai jeng lac sa dalam dom sang camereip abih mai tal bhum taneh bahrau Tân Thắng. Harei nan, yaom lac umo bahrau 12 thun min sa-ai oh var hu thaot binguk di Tân Thắng zaman nan, lac bhum taneh kan kathaot, pui, ia oh ginup piah pandar, piah pala drak. Jaik abih dom jalan nao mai sit sot, kaya nong paik, yuak blaoh pajeng ba kan kandah… Sa-ai Ngô Thanh Tân khan lac: “Thun 1998 tuk bahrau mai tal ini oh hu jalan, nao mai meng jalan haluk sit, anek saih nao bac biak kan kandah, nao darak pasar 2 mon meng tal, kaya nong oh pablei hu kayua urang blei salih oh tame hu. Meng tuk hu jao brei ka Bà Rịa - Vũng Tàu ye pui, jalan hu ngak dahlau, urang blei salih tame tal bein blei kaya nong, oh daok njauk kateik yaom, raidiuk mikva dak harei dak ginup meda jang”.

Bruk sangka padang ngak jalan, pui, ia… hu ba jalan ka bruk ngak nong di ấp Bình Thắng cakrok. Urak ini, taneh ngak nong di palei ini hu jaik 470 ha. Meyah dahlau daih, mikva rilo meng pala phun katut panak harei, ye urak ini taneh pala janih phun ini daok labaih 50 ha min, dom taneh daok veik hu pala phun darang ralow mbong patih yau bắp cải nan ye hu angan ieu lac darang bắp cải.  

Ong Lê Văn Bến, Akaok mBan ngak bruk Mặt trận ấp Bình Thắng brei thau, thun 2023, palei hu padang HTX pala ngak darang Bình Thắng. mBan mặt trận jak ba mikva xã viên pala ngak tui jalan hữu cơ, ngak tabiak pandap siam hu chất lượng, ba jien tame rilo ka rahra. Ini lac jalan peih tabiak ka pandap panda kaya nong di palei yam tabiak darak pasar praong: “Jalan cakrok patagok di mikva dak harei dak praong khang, darak pasar pablei tabiak negar langiu dak harei dak kan kandah, meyah urang ngak nong oh tame sa kapul nyaom halei nan, oh ngak tui jalan di darak pasar ye pandap oh hu yaom duk haong dom labik karei. Pagap yau ngak tui Viet GAP ye brei khik kajap dom tanut ka bruk kandaong labaih jru khik caga phun pala, khak drak, pruh jru jeng brei khik hu salamat”.

Ong Huỳnh Anh Chiến, Chủ tịch UBND xã Bình Châu, huyện Xuyên Mộc, tỉnh Bà Rịa – Vũng Tàu brei thau, urak ini di ấp Bình Thắng oh daok sang kan kathaot, jien mek tame kuhria tui akaok menuac hu 80 triệu đồng sa urang sa thun, rilo jang 60 triệu đồng duk haong tuk camereip bahrau padang tagok. Urak ini, dom jalan ia thuỷ lợi praong jeng hu huyện padang ngak, khik ginup ia pruh ka bruk ngak nong saong ia pandar di bilan thu: “Tal tukvak ini bruk ngak mbang di mikva ấp Bình Thắng tagok biak khang, oh daok sang kan kathaot. Prein khang di mikva ấp Bình Thắng lac chuyên canh phun darang, phun mbang baoh, dom thun jaik ini, janih phun pala ini tagok biak khang. Urak ini huyện jeng daok buh jien ngak binek ka 3, daong ka mikva khik piah ia pruh ka phun pala dalam bilan pandiak thu.” 

Meng dom baoh sang mai padang mbang ngui, hadei di 15 thun padang tagaok tal harei ini, Bình Thắng hu labaih 202 sang haong 861 urang. Bruk ngak mbang dak harei dak cakrok, thaot binguk puk palei kan kathaot dahlau daih lac bruk di zaman dahlau. Mai Bình Thắng radaih ô tô peih nduac bingi di angaok dom jalan nhựa samu tapak, peih nduac tal dom sang bhap bini daok di labik atah bayah. Bình Thắng harei ini hu ma-om bak sambao màu hijao di dom bein phun bak baoh saong dalam dom baoh sang praong, siam, khang kajap dalam dom bein phun nan, mboh hu dom triệu phú takai haluk./.