Bhap bini daok di kaoh pulao ye thei jeng hu ia hacih piah pandar

Sang saai Nguyễn Thị Hoàng Oanh, puk An Lộc, xã Tam Thôn Hiệp, huyện Cần Giờ hu taong yaom lac sa dalam dom baoh sang raong cim yến mek hu yaom glaong ngan haong jien mek tame hu tani tanat,  meng 300 tal 500 triệu đồng sa thun. Dalam tuk raong cim, yaok thun mek hu 2 vụ, sang saai Oanh saong mikva urang nong daok pak ini thei jeng hu jabat chức năng puk palei daong gah ilamo, thau ka bruk darak pasa, saong brei kapul ngak bruk mek mẫu dut iek ka cim yến. 

  Kuhria tal urak ini, dalam huyện Cần Giờ hu 481 sang raong yến, dalam nan hu 320 sang raong daok mek sruh. Sản lượng sruh yến mek hu tui kuhria lac 12,8 tấn, rik daong patagok sản lượng kaya nong di pak ini. Urak ini, Yến Sào Cần Giờ lac sa dalam 3 pandap gam haong ikan dứa thu saong pa-aok Cần Giờ hu Cục Sở hữu Trí tuệ brei harak Chứng nhận tut angan nhãn hiệu. Jien mek tame glaong, bhap bin sa tangin haong gauk rik prein tame haong karja palei ngak pasiam veik dom jalan palei, peih praong jalan sit, daong ka mbaok mata palei pala hu siam mekre, hadah hadai. Saai Nguyễn Thị Hoàng Oanh bui sambai khan lac: “Meng langiu jalan praong tame lac jalan nhựa, dom jalan sit dalam palei jeng hu tuh bê tông abih, điện jalan jeng hu ginup, ba bruk hit ngak mbang ka rilo urang ngak. Sang kan kathaot jeng trun rilo. Urak ini oh daok mboh sang hala bo rilo meng lac sang  tôn, sang xi-măng”.

Piah paglaong danak dak padang ngak palei pala bahrau, daong ka urang nong dak harei dak salih jalan ngak mbang, duah jien, meng bruk pala drak, ngak nong yau meng kan salih tapa ngak nong pambuak haong dịch vụ du lịch, rik daong cak rok patagok kinh tế xã hội puk palei, bruk “cak rok patagok du lịch xã đảo Thạnh An” bahrau ini hu ba tame ngak.

Bruk ngak ini hu labik mbang manyum saong labik ma-in, tuk camriep hu 10 gian pandap kayua mikva daok di kaoh pulao tut angan tame pablei salih; pambuak haong dom kapul pablei salih pabak ka bruk mbang manyum, daok veik, rivang ma-in, duah thau, parang main đờn ca tài tử, blei pandap đặc trưng Cần Giờ duh ka tuai mai tal xã pulao Thạnh An, puk pulao Thiềng Liềng...  Amuk Trần Thị Năm, urang daok di xã pulao Thạnh An, huyện Cần Giờ brei thau: “Sang kan kathaot hu masaiy jien daong patrun kathaot piah ngak mbang, daok dom baoh sang mbaih jeng ye hu pasaiy meng 50 tal 100 triệu đồng piah cak rok patagok kinh tế. Bhap bini daok di kaoh pulao ye thei jeng hu ginup sang vệ sinh, taong abih dom baoh sang jeng hu ia hacih piah pandar. Đien jalan urak ini hadah tanyak, dahlau daih oh hu, radaih juak daok oh hu piah nao, min urak ini taong abih dom baoh sang bhap bini, thei jeng hu radaih mac”. 

Tui UBND huyện Cần Giờ, TP.HCM, dahlau di tuk peih ngak danak dak padang ngak palei pala bahrau, dom urang ngak hu bac bruk ngak bahrau hu labaih 20% di thun 2010. Tal urak ini, dom urang ngak hu bac bruk hu jaik 96% (32.300 urang ngak hu bruk ngak dalam 36.800 urang ngak dalam umo thun). Cần Giờ oh daok sang kan kathaot tui tanut chuan di negar. 

Patui jalan paglaong dom tanut palei pala bahrau, ong Nguyễn Ngọc Xuân, Phó akaok UBND huyện Cần Giờ brei thau: huyện hu ba tabiak jalan ngak tal thun 2025 hu taong abih 6 xã mek hu tanut chuan palei pala bahrau paglaong; 3 dalam 6 xã mek hu tanut chuan palei pala bahrau kiểu mẫu; jien mek tame kuhrua tui akaok menuac hu 97 triệu đồng sa urang sa thun… Piah ngak hu dom bruk ba tabiak nan, langiu di bruk pataom tame tacei pato peih ngak taong abih dom bruk ngak ka dom xa, ban sit cak rok patagok dom kết cấu hạ tầng samu gauk, siam gheih, huyện Cần Giờ patagok glaong di abih dom siam lagaih, pandar hu kein laba dom prein khang, abih di nyu nan lac xã hội hóa piah jhul khang Danak dak yaok xa sa pandap - OCOP, padang ngak bhum nguyên liệu khang kajap, ba bruk ngak, jien mek tame tani tanat ka bhap bini. Ong Nguyễn Ngọc Xuân ndem lac: “Urak ini huyện hu padang dom HTX pablei salih dịch vụ. Dom bruk ngak di HTX ini cak rok patagok, meda ba mbuan lagaih pambuak haong urang nong, padang ngak dom pandap panda pambuak haong Vietgap, OCOP rik daong cak rok patagok kinh tế di palei saong meng nan jhul samar bruk pahlaong dom tanut padang ngak palei pala bahrau”.

Anak tal, Cần Giờ meda lac ban padeih padai, du lịch, sinh thái. Bruk paglaong dom asal kadha palei pala bahrau di Cần Giờ meng jhul khang bruk salih jalan pala drak, langyah bruk ngak hu siam makre, lagaih haong prein khang di pak ini hu ba mai bruk cak rok khang kajap kinh tế - xã hội ka huyện kaoh pulao Cần Giờ, labik atah biyah, kan kandah abih di ban raya HCM./.

Urang lang: Thu Thảo – 07/07