Meng kan mai, bangsa Việt Nam drei hu adat kakuh amuk akei, pamaong tal halau gha

Taneh aia – Bangsa hu sa halau gha Tiên - Rồng, hu harei Pacit daa Po Hùng, hu kalan kakuh Quốc Tổ saong Lăng Mộ Tổ angaok ceik Nghĩa Lĩnh - Phú Thọ piah yaok thun mai kakuh likau, mai veik haong halau gha. Daok dalam yaok baoh sang, labik ginreih di abih, jeng hu papan  kakuh amuk akei, kakuh dom urang caih menek drei tabiak, raong ba, tacei pato, daong ba ka abih rai drei, anek taco drei. Asal di bruk pok kakuh amuk akei di urang Việt Nam lac bruk thau dhal phol, lac hatung hatai pamaong tal halau gha. Pak nan, daok hu bruk ginreih, bruk cộng hưởng hatai anit ranam, hatai jia ngak jeng pren diuk rai di urang Việt.

Pamaong tal ong akaok ong akei, pamaong tal halau gha haong sa hatung hatai ginreih, hacih sa-at di abih, nan lac yaom glaong hu njaom tame dalam hatai di yaok urang Việt Nam meng ribau thun ini mai: Yaom lac nao halei mai halei, hadhar harei pacit pluh bingun bilan klau. Panuac pandit nan yau sa panuac kakei, sa panuac brei thau, sa hatung hatai luac rai oh salih karei hu.

Dalam dak rai sajarah dom ribau thun dak padang taneh aia, khik iek taneh aia saong peih prong taneh aia di khaol drei, hu oh thau hadom jayak daneiy angan, khang hatai pacang khik bruk yasa di taneh aia drei, saong pak dalam dom thun bilan atah mesruh metak, gaok biak rilo pandik harao di bruk neh rabha, hatung hatai pamaong tal ong akaok ong akei, tal halau gha, tal adei sa-ai  ralow darah 3 bhum taneh gah barak – bhum kreh negar saong gah meraong negar oh tuk halei mbaih mboh, neh rabha.  

Pren diuk rai, hatai khang kajap, bruk sa hatung hatai haong gauk di urang Việt nan lac dom kadha siam gheih di abih hu pataom veik meng dom pandik harao tapa ribau thun dak padang saong pacang khik ka nyu tamo taneh ia, palei negar, gam hu pren khang mai meng hatai ranam pamaong tal palei negar, tal halau gha. Yau di Tây Nguyên, bhap bani dom bangsa takik njauk kateik gheik biak rilo saong pren khang oh hu hagait pacang cakak hu dalam dom thun atah mesruh pacang kaol Pháp, Mỹ, jeng mai meng hatung hatai anit ranam nan: Amaik sua tangi phun kơ-nia/Gha he menyum aia pak halei? Menyum halau aia gah Barak (Bóng cây kơ-nia - Ngọc Anh). Saong di gah Meraong, dom thun mesruh pacang Mỹ, daong taneh aia, sa thaik binguk hadah tanjak, brei mboh ka hatai ranam biak dalam, ka pren khang oh hu gah di bhap bani saong urang lin gah meraong nan lac dom kalan kakuh Wa Hồ. Dom baoh kalan sit sot nan miat miat lac brei mboh ka bruk kiên cường, thủy chung di bhap bani brei ka Wa Hồ saong brei ka bruk yasa di taneh aia.

Bruk yasa taneh aia nan oh njauk lac eng nyu bo hu. Dom rai rah, dom ralow darah, dom urang van klak rup dei meng ribau thun ini piah pacang khik. Dom rai rah nao dahlau saong miat miat dom rai rah hadei ini tuk halei jeng kanal hadar “lời thề sắt son” meblah mek độc lập, yasa saong pacang khik quyền ngak po taneh ia, palei negar dalam dom thun bilan mesruh metak rambah rambup saong mbiah tal urak ini. Tok mek sa kadha piah pagap yau ini, Quảng Trị tok hu labaih 6 rituh ribau bhap bani bo pacang khik tal 80 ribau liệt sĩ dalam bruk mesruh pacang Mỹ, daong taneh aia, yasa palei negar! Oh var hu, oh tuk halei var hu dom ralow darah van klaak rup drei di dom dom rai rah urang Việt piah hu sa taneh aia yau harei ini.

Miat miat pamaong mai halau gha, thau dhar phol muk kei, ong kaok ong kar hu dak padang taneh aia ini piah pambak prong dalam yaok urang kol drei ka hatung hatai anit ranam, kadha bruk khang hatai saong pren khang brei ka bruk khang kajap saong kaya meda di taneh aia drei, harei ini saong harei hadei./.

 Urang lang: Jasi – 11/04