Kadha vak "Urang taong mek ikan di bhum Tây Nam Bộ kham merat peih talaih “thẻ kanyik": Pamaong tal bruk cak rok patagok khang kajap bruk taong mek ikan di Như Tâm angaok harak báo Bangsa saong cak rok patagok. 

Ong Lê Văn Sử - Phaok akaok UBND tỉnh Cà Mau, Akaom MBan tacei pato ka pacang taong mek ikan suan adat hukum, oh pathau khan saong oh tui adat (IUU) tỉnh Cà Mau brei thau, meng thun 2020, urang pal akaok tỉnh Kiên Giang saong Cà Mau hu mboh tangin tame danak dak pambuak bruk saong brei tapa danak dak pambuak gauk, peih bruk pasang iek haong gauk dalam bruk taong mek ikan angaok tasik, pacang taong mek ikan IUU. 

Oh lac tok hu urang pal akaok dua tỉnh mboh tangin tame danak dak pambuak bruk haong gauk, bo dom jabat ngak bruk khik iek angaok tasik di dua tỉnh jeng hu mboh tangin pambuak bruk haong gauk tui yaok bruk ngak di drei. Đại tá Huỳnh Văn Đông - Chính ủy Bộ đội Biên phòng (BĐBP) tỉnh Kiên Giang brei thau, Bộ Chỉ huy Bộ đội biên phòng tỉnh Kiên Giang, hu mboh tangin tame harak pambuak bruk gam haong dom jabat di tỉnh ayut piah pasang mong, khik iek catang manuac urang, kapal gilai tame, tabiak bhum tapen tasik; oh caik ka urang taong mek ikan ba gilai nao taong mek ikan di bhum tasik negar langiu, piah oh ngak pambak tal quyền lợi saong angan je di taneh aia, bangsa.  

Tui Sở Ngak nong saong patagok palei pala tỉnh Cà Mau, kayua kaya ikan dak harei dak takik nao, nan ye bruk palao san hô nhân tạo trun tasik piah nyu ngak ka siam veik halau aia ala takai tasik piah khik veik saong cak rok patagok halaw kaya ikan dalam aia, patrun bruk gilai katung halam (njul) taong mek ikan tapen takai tasik saong paglaong kein laba bruk taong mek ikan tui jalan khang kajap. Urak ini, jaik 30 taneh aia angaok dunya daok ngak rạn san hô nhân tạo piah patagok bruk taong mek ikan tasik. 

Tui ong Lê Văn Sử - Phaok akaok UBND tỉnh, Akaok Mban tacei pato tỉnh Cà Mau ka bruk pacang cakak taong mek ikan IUU: Dự án peih ngak iek rạn san hô nhân tạo piah pasiam veik kaya ikan dalam aia, pamong tal cak rok patagok bruk taong mek ikan tui jalan khang kajap; taphia di nan pacang cakak IUU, akaok mereip mek hu rilo jak jeng siam mekre. Dom janih ikan pataom di labik palao rạn san hô nhân tạo mboh cak rok patagok rilo. Abih di nyu, hu dom janih ikan di labik rạn mboh prong jang dom janih ikan bo mikva taong mek hu langiu tasik atah, hu mboh rilo jang but pajaih, janih kaya ikan jang yau but pajaih nghêu, hadang, hải sâm, giáp xác… dak harei dak rilo jang, taphia di nan pacang cakak hu bruk taong mek ikan tui jalan pametai abih.

Daok di tỉnh Kiên Giang, langiu di bruk palao rạn san hô nhân tạo, tỉnh daok caik hatai tal bruk palao dom janih ikan pajaih trun tasik piah pacang khik saong cak rok patagok kaya ikan dalam aia. Ong Lê Quốc Anh – Phaok akaok UBND tỉnh Kiên Giang brei thau: “taphia di bruk ngak ka nyu catang pacang IUU, khaol dahlak tuk halei jeng caik hatai tal bruk cak rok patagok kaya ikan dalam aia, piah patrun patakik bruk thu lagu kaya ikan dalam aia. Hu yau nan, khaol drei meng khik hu siam bruk pacang taong mek ikan suan adat hukum”. 

Bruk palao drei pajaih trun veik tasik, lac jakan ngak di tỉnh Kiên Giang meng rilo thun ini mai. Yaok mbang hu bruk hagait prong pambuak pagam haong pulao tasik, lac ba tabiak bruk palao drei pajaih trun tasik, jeng hu dom bruk hu peih ngak tui tukvak ba tabiak. Tapa nan, pacheih taong abih bhap bani sa tangin haong gauk khik iek, cak rok patagok kaya ikan dalam aia, pacang khik môi trường sinh thái.

Pak di urak ini, urang taong ikan di bhum tasik Tây Nam jeng thau hu bruk ngak di drei, anak bruk taong mek ikan; dom urang nan jeng mboh lac njauk peih talaih "thẻ kanyik” ka rup drei. Taong abih gauk jeng kham meret, khang hatai gam haong hệ thống chính trị dalam tukvak ameh 180 harei piah peih talaih “thẻ kanyik”, piah oh daok pambak tal kein laba, angan je saong mbaok meta di taneh aia, di bangsa./.