Hadei di tuk hu panuac pato tacei  meng Kapul Urang kumei huyện Bắc Hà, tỉnh Lào Cai, Kapul urang kumei xã Cốc Lẩu hu pilih ruah bruk ngak jalan bingu salih ka hareik tamuh ban glai ban glo pambuak haong bruk padang ngak palei pala bahrau. Jalan mbak puk palei hu pala bak dom janih bingu biak rilo sambo mau yau ye bingu mười giờ, sam, cúc cánh bướm, chiều tím… Tapa nan  nyu ngak brei hadah mekre puk palei bhum ceik sron mbon, joa kandang. Saai Lùng Thị Hà, xã Cốc Lẩu, huyện Bắc Hà, tỉnh Lào Cai brei thau:“Adei saai kumei dalam palei thei jeng pachreih tui bruk ini. Meda lac, thei jeng chreih chrai parabha bruk ka gauk, daong gauk pala bingu, sangka iek glang abih drei. Danak dak dalam bruk padang ngak palei pala bahrau ini ngan haong kol dahlak lac biak siam makre. Angaok dom jalan thei jeng chreih chrai nao mek bingu mai pala piah ka jalan dak harei dak gheih mekre jang.”

Oh lac danak dak bo bruk ngak ini hu jeng bruk ngak gam gam, eng drei halain hatain buh prein tame di kapul urang kumei di pak ini. Puk Tổng Kim lac sa dalam dom puk kan kandah abih di xã Vĩnh Yên, huyện Bảo Yên, di pak ini abih tih lac urang bangsa Mông. Kapul urang kumei huyện saong tỉnh hu nao tal yaok baoh sang piah pathau khan jak ba dom adei saai kumei dalam xã eng drei ngak hacih sang danaok di drei dahlau, bloh hadei di nan meng tal jalan mbak puk palei. Urak ini, bruk pala bingu saong sangka iek glang ka dom jalan bingu jeng lac bruk ngak yaok harei di adei saai dalam xã. Urak ini oh daok bruk klaak nerak ban glai ban glo di tapen jalan. Sa-a Sùng Thị May brei thau:“Dalam puk palei drei brei ngak ka nyu hacih saat, dahlau di abih lac piah khik ka rup drei, ka puk palei drei, lac khik ka Đảng saong Kanja.”

Urak ini, tỉnh Lào Cai hu labaih 250 jalan bingu hu dom urang kumei dalam palei pala bak sambo mau, jalan bingu palei pala bahrau, jalan bingu hu truac hadah gom ngan haong yaom jien buh tame abih tih lac jaik 3 tỷ đồng oh ka kuhria tal prein ngak lac kayua dom pakat kapul urang kumei dalam tỉnh peih ngak. Ini lac jak jeng dalam sahneng duah jalan ngak bahrau dalam bruk peih ngak asal kadha 3 hacih pambuak pagam haong bruk khik caga alam môi trường kapul urang kumei dom pakat. Bruk pala bingu tapen jalan hu pambak tal yaok puk palei. Bruk padang dom jalan bingu hu salih jalan sahaneng di rahra ka bruk hacih saat alam môi trường, hatai saneng ngak mekre mbaok meta puk palei hu paglaong cambaih laih. Amuk Hà Thị Khánh Nguyệt, akaok Kapul urang kumei tỉnh Lào Cai brei thau:“Gam haong bruk jak ba padang baoh sang “5 oh 3 hacih”, Kapul urang kumei dom pakat jeng hu patagok bruk pathau khan, jak ba urang dalam kapul urang kumei peih ngak dom asal kadha dalam bruk jak ba ini. Bruk jak ba ini jeng hu rilo urang kumei dalam kapul abih drei hu mbaok tame, pambuak haong bruk padang ngak palei pala bahrau, abih di nyu nan lac ngan haong xã padang ngak palei pala bahrau paglaong, kiểu mẫu.”

Pala bingu tapen jalan puk palei lac bruk ngak siam lagaih, rik daong khik caga salamat jalan mbak, khik caga alam môi trường, ngak mekre mbaok meta puk palei. Meng jalan sahaneng, oh cang duah halei atah, bruk gheih mekre meda mai meng dom bruk sit, jaik taphia di abih dalam raidiuk, dom jalan bingu puk palei ndung bak mbuan mbiah, lac brei mboh ka bruk salih bahrau, cak rok patagok bo danak dak padang ngak palei pala bahrau hu ba mai. Meng labik tok pala iek di dom labik daok kiểu mẫu, urak ini bruk pala bingu rah tui dom jalan  palei bhum ceik hu pambak praong di rilo puk palei. Di rilo labik, bruk pala saong sangka iek glang bingu daok hu kak kajap haong bruk puh ramik, ngak hacih saat jalan puk palei. Tapa nan, rik daong ka dom puk palei peih ngak siam dom asal kadha ka alam môi trường dalam bruk padang ngak palei pala bahrau di bhum palei pala saong bhum ceik./.