Wuen Akok UB bhap bini tỉnh Đồng Nai Võ Tấn Đức mboh lac, tukvak anak tal dom tỉnh dalam bhum Ndong Nam bộ njauk jhul khang bruk pambuak bhum dalam gah jalan mbak. Dalam tỉnh Đồng Nai urak ini daok peih ngak danak dak mblang kapal haok Long Thành, caga ba tame pandar di bilan 9 thun 2026.

Ong Đức hu panuac ieu TPHCM saong dom tỉnh jaik taphia daong piah ngak salah dom jalan pambuak bruk nao mai. Dalam nan, jalan Vành đai 3 TPHCM labik 1A nao tapa huyen Nhơn Trạch ngak hu labaih 90% bruk bayar jien, peih taneh. Tỉnh sanya lac dahlau bilan 6 thun 2024 meda ngak salah taong abih bruk nan.

Daok danak dak jalan peih drah samar Biên Hòa - Vũng Tàu, ong Đức ieu tỉnh Bà Rịa – Vũng Tàu pambuak bruk pathau khan Thủ tướng, Quốc hội brei tabiak sarak, jalan ngak karei piah peih ngak: “Brei hu jalan ngak karei piah peih ngak danak dak angaok jalan radaih hu blaoh lac Raya 51 peih ngak tui jalan BOT, dreih yau peih ngak Srak 98 di Quoc hoi ka TPHCM piah ngak dom tatua tapa gar, labik canah jalan hu makna praong di jalan Raya 51.”

 Daok ong Võ Văn Minh - Akok UB bhap bini tỉnh Bình Dương brei thau dom kan kandah ka pandap padang ngak jalan Vành đai 3 TP.HCM. Dalam nan, di Bình Dương kan kandah abih lac cuah piah ngak. Ong Minh lac: “Biak caong khin Mban tacei pato di Vành đai 3 patui bruk sangka piah hu bruk njauk gauk, tacei ba brei ngak chip. Abih di nyu lac di pok ngak samu mbaok jalan, brei ginup pandap piah caga dahlau kayua brei hu tukvak piah khik kajap ky thuat”.  

 Akok UB bhap bini tỉnh Tây Ninh - Nguyễn Thanh Ngọc ndem lac: Bhum Ndong Nam Bộ hu mbuan lagaih ralo, nan ye bruk pambuak bhum jeng brei mboh hu jalan maong piah pandar dom prein khang, dom kein lagaih. Bhum taneh ini hu patagok ye yaok bhum palei jeng hu patagok tui.

Ong Ngọc mboh lac, langiu di bruk pambuak gauk dua gah di yaok bhum ye bruk pambuak bhum jeng daok lac bruk praong abih, haong pasak lac TPHCM. Jalan mbak nao mai di bhum lac makna praong abih piah pabak prein khang patagok kinh te:

“ Quy hoach bhum lac piah ka bhum taneh nan hu cak rok patagok, oh njauk ndem lac dom mentri dom gah daok quy hoạch bo caik hatai tui pang panuac di drei. Nan lac bruk njauk ngak, bo daok tui ngak. Suai lavik, tỉnh ini haong tỉnh diah jneg njauk pambuak ngak jaln peih drah samar”.

Bí thư Tỉnh ủy Đồng Nai Nguyễn Hồng Lĩnh sahaneng lac, bruk parabha gah piah patagok prein khang di yaok tỉnh. Tui ong Lĩnh, parabha bruk tui bhum hu makna biak praong, njauk langyah bruk lagaih di yaok bhum dut haong gauk piah parabha bruk veik.

Gam haong nan, ong Lĩnh caong khin lac bhum Đông Nam Bộ brei caik hatai jang tal bruk patagok hijao piah ka bruk patagok di bhum hu khang kajap, tagok prein meriak gauk jang:

“Net zero lac danak dak taong abih gah, cambaic laic saong siam lagaih haong bruk taom gauk di bhum haong darak pasar di dunya. Meyah oh kham merat haong net zero meda ngak jhak tal pandap panda nao dom labik dalam tukvak anak tal. Caong khin yaok tỉnh jeng hu danak dak piah jhul pasamar bruk nan”.

Dom thun jiak ini, dom bruk cakrok patagok di bhum Đông Nam Bộ daok dak harei dak trun saong patagok kinh te mboh lac daok suai veik. Dom urang ilamo gah kinh te, dom urang jakar khik iek jeng njauk gauk mboh lac, yaok tỉnh, ban dalam bhum njuak pambuak gauk khang kajap, njauk gauk dalam parabha bruk, iek tui prein khang, tui mbuan lagaih di drei saong daong ka gauk piah ba gauk jhul samar bruk cakrok patagok khang kajap./.