Jalan mbak daok takik daok sit nan ye bruk cak rok patagok di Bình Thuận ka oh samu haong kein laba

Bhap bini bhum tanah Bình Thuận, thei hei jeng chreih chrai, bui sambai caong maong ieik yaok harei tal jalan raya nduac nao tapa tỉnh drah blaoh salah jeng ye ba tame pandar. Jalan raya Phan Thiết – Dầu Giây pambuak ngan haong jalan raya Ban raya HCM – Long Thành – Dầu Giây meda brei panak masa tukvak nao mai meng Ban raya HCM tal Phan Thiết (Bình Thuận) meng labaih 4 tuk jam trun daok labaih 2 tuk jam. Jalan raya ini meda daong brei ka Bình Thuận pambuak kein lagaih jang ngan haong dom bhum kinh tế ikonomi dalam nagar, mboh abih di nyu ngan saong bhum kreih negar, bhum Đông Nam Bộ, ngan haong pasak Ban raya HCM.

Piah patagok siam lagaih bruk buh jien tame padang ngak jalan raya, tỉnh Bình Thuận gam peih ngak siam dom jalan nduac tui di tapen tasik, yau ye: Jalan ĐT.719B gah Phan Thiết – Kê Gà, jalan ĐT.719 gah Kê Gà - Tân Thiện; peih ngak danak dak jalan Hàm Kiệm nao Tiến Thành, gah meng Jalan nagar 1 nao tal jalan ĐT.719B pambuak gah jalan raya ngan haong Jalan nagar 1 tal jalan tapen tasik di dalam tỉnh.

Ong Phan Chính, sa urang daok di ban sit La Gi Binh Thuan brei thau lac, hadei di labaih 30 thun padang tỉnh, gein ini ieu lac mbang patama camariep drei mboh bruk buh jien tame ngak jalan mbak biak khang catang, gam gak jalan raya jalan nagar gam gam saong jalan mbak di bhum palei.

Ong Phan Chính lac: “Gein ini yau brei thau lac daong brei ka bhap bini mboh sambai ka bruk cak rok patagok, mboh cambac di mata jalan mbak nao mai, hu pambuak haong gauk, ieu lac sa bruk daong jhul drah samar khang piah cak rok patagok. Jeng ye jalan tapen tasik mboh kein laba piah hu bruk salih praong saong pachreih hu dom bruk ngak, dalam nan hu pachreih ka bruk jirah rivang ieik du lịch”.

Jalan ĐT.719B dan haong jalan ĐT.719 hu angan biak praong ka bruk cak rok patagok jirah rivang bhum mraong salatan Bình Thuận, peih pambuak jalan 4 huyện, ban sit, ban praong yau ye: Hàm Thuận Nam, Hàm Tân, La Gi dan haong Ban Phan Thiết. Muk Lê Thị Bích Liên, akaok parti Bí thư huyện Hàm Thuận Nam brei thau lac, jalan ĐT.719 meng Kê Gà - Tân Thiện ieu lac jalan tapen tasik di huyện Hàm Thuận Nam, mboh biak lagaih siam ka bruk patagok carok jirah rivang du lịch.

  Amuk Lê Thị Bích Liên ndem lac: “Huyện hu padak padang ngak labik bhum huyện, rami ramik ngak ka pasiam bruk padak padang ngak di ban sit Thuận Nam gam peih bruk padak padang di taong abih dom xã hu jalan tapen tasik nduac tapa piah ba kein lagaih ka bruk cak rok patagok jeng ye dom danak dak daok hu padak padang hu peih ngak siam lagaih sanang jang”.

Jalan mbak pambuak gauk saong peih praong oh lac sa janih brei ka siam lagaih ka bruk nao mai ka bhap bini bo daok ieu lac sa bruk piah pachreih dom gah buh jien tame ngak mbang. Ong Phạm Quang Hậu- Akaok rami ramik tacei jalan  Sonata Resort di xã Tiến Thành, ban Phan Thiết brei thau, karja rajaei bhum palei daok buh jien tame biak khang brei ka dom bruk ngak gah jalan pambuak haong dom bhum karei, nyu daok daong cak rok patagok ikonomi kinh tế.

Ong Phạm Quang Hậu brei thau lac: “Dahlau deih, sa haja jalan 719 mai ban Phan Thiết kayua yau nan ye mboh biak kan kandah lam bruk nao mai. Urak ini, dom jalan mbak hu pambuak gauk, gam tui di nan hu rilo bruk karei karei bo tỉnh Bình Thuận daok ieik glang sang ka buh jien tame ngak ka gah maraong tinh, tui caong lac meda patagok dalam meng 3 tal 5 thun anak tal. Nan ieu lac sa bruk biak sambai ka gah maraong di ban Phan Thiết”.

Ndom mayai tal ban sit La Gi di dalam dom thun baharau blaoh mboh dom jalan mbak hu iek praong bruk buh jien tame ngak. Jalan asal tame ban sit lac jalan nagar QL55 biak lagaih, tui kuhria dalam tukvak tal gah meng ban sit La Gi nao Bà Rịa – Vũng Tàu, nduac tapa huyện Hàm Tân mada hu pakat nagar ba tame angan brei buh jien tame ngak dalam masa 2021 – 2025. Hadei di tuk masa jalan raya Phan Thiết – Giầu Dây ngak salah meda hu sa tanut pambuak jalan raya haong jalan nagar QL55 mai tal ban sit La Gi. Di gah jalan tapen tasik, masa meng anak tal meda peih ngak veik gah jalan Kê Gà – Tân Hải (Pulau Hòn Lan – Tân Hải).

Hadei di tuk dom gah jalan ini hu ngak salah bruk nao mai di ban Phan Thiết haong ban sit La Gi, jang yau meng La Gi nao Bà Rịa - Vũng Tàu, Đồng Nai, ban raya HCM, Lâm Đồng biak siam lagaih.

  Ong Phạm Văn Nam – Bí thư ban sit La Gi brei thau lac, ban sit hu pathau tagok pakat tỉnh Bình Thuận likau pabak sa gah jalan meng danao Núi Đất (xã Tân Tiến, ban sit La Gi) nao tabiak jalan nagar 1A gah jaik taphia haong gah huyện Hàm Thuận Nam saong huyện Hàm Tân labaih 15km. Mayah hu jalan ini, gah barak ban sit La Gi meda sanang cak rok patagok siam makre jang. Patui di nan brei pachreih hu rilo tuai mai main tal labik Dinh Thầy Thím, hồ Núi Đất saong bhum tapen tasik di ban sit La Gi.

Ong Pham Van Nam ndem lac “Ngan haong ban sit daok sa gah jalan hu angan praong nan ieu lac gah jalan mbak di tapen tasik, ban sit hu pathau khan tal pakat tỉnh saong ndah hu pakat tinh brei ngak. Dahlau deih ban sit biak kan si mboh kein meng tasik jeng ye oh mboh kein lagaih mai meng tasik, jang ye oh mboh hagait brei pachreih kein laba mai meng tasik. Mayah gah jalan ini hu dak padak saong gam patui buh jien tame ngak mbang dalam tukvak mang masa anak tal meda brei ka La Gi ieu lac sa labik piah brei pachreih hu tuai damuai tuai jirah rivang, jang yau urang bhap bini mbang hu laba meng tasik biak rilo”.

  Jalan raya daok rami ramik brei ngak ka drah samar, mblang kapar haok Phan Thiết hu Thủ tướng rajaei brei jalan ieu buh jien tame, gam tui di nan hu ngak dom jalan tapen tasik di gah maraong daok brei jhul samar bruk peih ngak saong anak tal meda hu veik naik pabah lamnge tasik Sơn Mỹ (gah maraong di tỉnh) gam haong naik pabah lamnge tasik Vĩnh Tân (gah barak di tỉnh) hu ba tame peih ngak meda ba kein lagaih ka tinh Bình Thuận jhul samar bruk cak rok patagok kinh tế ikonomi.

Ong Nguyễn Hữu Trung- Yam ndok Mban khik ramik buh jien tame ngak saong padang ngak jalan mbak di tỉnh Bình Thuận brei thau: “Danak dak jalan raya Barak – Mraong Bắc – Nam gah nao tapa tỉnh atah labaih 160 km dalam nan hu 7 tanut jao pambuak haong dom pasak ban sit ban praong ban raya, dom bhum pasak jirah rivang. Njauk ndem lmayai lac danak dak ba bruk ba kein laba biak praong ka gah jalan mbak di tỉnh. Gam tui di nan bruk pambuak ini jeng ba kein lagaih ka bhap bini, urang ngak mbang blei salih, dalam nan njauk ndom mayai brei ka labik bhum tapen tasik gah maraong tinh Bình Thuận”.

Dom danak dak nan hu buh jien tame ngak salah saong ba tame pandar rik tame ngak salah dom jalan mbak pambuak gam haong jalan mbak jalan raya, ba kein lagaih jhul samar bruk cak rok patagok kinh tế tasik, ngan haong bruk ngak praong abih lac gah du lịch rivang jirah tasik. Abih di nyu lac bhum tapen tasik gah Maraong di tỉnh Bình Thuận ngan haong biak rilo kein lagaih brei ka cak rok patagok ikonomi, du lịch tasik, jhul khang bruk cak rok patagok kinh tế xã hội, ikonomi rahra rik tame bruk khik tani tanat karo kajap nagar palei, daong brei ka hu ralo karo kajap di kaoh pulao bhum tasik dalam tukvak masa waktu jaman ini./.

Urang lang: TS. Phú Văn Hẳn - 28/08