Dalam baoh sang “Jum pataom quân - dân” bahrau hu padang brei, ong Y Huê Êban daok di palei Niêng 1, xã Ea Nuôl, huyện Buôn Đôn bui sambai khan lac, meng harei hu baoh sang bahrau, sang ong oh daok glaih glar kuhria bruk pacang pandiak, caga hajan. Prein yava di ong jeng hu siam jang, ngak hu rilo bruk, sang hu jien mek tame. Ong thau dhar phor dom sa-ai bộ đội hu padang sang alin hadiah brei:

“Dahlau daih sang sit ganiuk, hajan sraiy, pandiak pa-uh, urak ini karja palei sangka padang ngak brei baoh sang praong siam, uan tabuan lo. Dahlak kham merat ngak mbang piah cakrok, gam haong mikva dalam palei daong khik caga puk palei siam mekre, sron mbon”.

Tui panuac khan di ong Y Kim Êban, akaok palei Buôn Niêng 1, bộ đội bo ong Y Huê ndom tal nan lac urang jakar, urang lin đơn vị K864, di Cục Quân khí, Tổng cục Kỹ thuật, Bộ Quốc phòng. Ini jeng lac labik pambuak talei rohim haong Buôn Niêng 1 meng rilo thun ini mai. Bruk daong padang sang ka sang kathaot hu daong pabak prein ka dom sang kham merat yam tagok.

“Talei rohim di urang lin haong rahra biak siam, mai ravang, tacei pato dom ilamu ka mikva cakrok bruk ngak mbang. Puk palei kol dahlak biak bui sambai chreih chrai. Abih di nyu lac dom sang kathaot urang kham merat cakrok bruk ngak mbang piah anak tal dom sang kathaot dak harei dak takik nao”.

Lac labik pambuak talei rohim haong Buôn M’riu, xã Cư Huê, huyện Ea Kar, tỉnh Đắk Lắk, 20 thun tapa, Cty Điện lực Đắk Lắk hu daong oh lac takik dalam bruk ngak brei salih bahrau mbaok mata palei pala di pak ini. Meng sa palei eik lipa, kathaot rambah, taduan brah daong brei di bilan cang yuak, ye urak ini, dom sang kathaot daok 10% min. Rilo sang dalam palei padang hu sang bahrau, blei hu radaih công nông, jamriak pruh ia ka phun pala.

Tui panuac khan di ong Trần Văn Thuận, Yam ndok Cty Điện lực Đắk Lắk, tui jalan ngak di bruk pambuak talei rohim yaok thun, Đảng ủy cty hu brei bruk ka yaok mban, ngành, kapul nyaom, chi bộ pambuak bruk haong dom gah pambuak talei rohim piah peih ngak hu siam danak dak ini.

 “Tui danak dak pambuak talei rohim ye hu ba tabiak dom bruk ngak yaok thun piah daong ka rahra saong dom baoh sang sarak karja, sang kan kandah piah cakrok bruk ngak mbang. Ngan saong palei M'riu ye dom kan kandah urak ini hu thau blaoh saong daok ba tabiak jalan daong ka rahra, daong padang palei ilamu.”

Ong Nguyễn Đình Trung, Uỷ viên Trung ương Đảng, Bí thư Tỉnh ủy Đắk Lắk brei thau, meng bruk daong di dom labik pambuak talei rohim, raidiuk mbang ngui daok dang di bhap bini bangsa takik hu siam tagok biak rilo. Anak tal, Tỉnh ủy Đắk Lắk daok brei jhul khang bruk pambuak talei rohim haong dom palei urang bangsa takik piah daong patruh eik patrun kathaot, pakhang bruk jum pataom bangsa, kham merat dak padang Đắk Lắk dak harei dak kaya meda, siam mekre, salih bahrau, bak ilamu:

 “Dom gah pambuak talei rohim haong dom puk palei meda lac ngak hu siam dom bruk tui jalan ba tabiak. Raidiuk bhap bini di bhum atah bayah hu dom salih bahrau mboh di anak meta saong bruk ba tangin tame, bruk jum pataom di dom bangsa ba gauk padang tỉnh Đắk Lắk siam mekre, kaya mada”.

Anak meta mboh lac, dom bruk ngak hu makna, pambuak pagam haong bruk di puk palei, bruk pambuak talei rohim puk palei di Đắk Lắk hu ba mai kein laba, rik daong praong dalam bruk cakrok KTXH, dak padang, pakhang pakajap hệ thống chính trị puk palei, khik kajap an ninh chính trị, sron mbon salamat puk palei saong kak kajap jang talei jum pataom di dom bangsa adei sa-ai./.