Kayua yau nan ye, ba bruk ngak ka dam dara bangsa takik urak ini njauk hu patagok saong jhul pakhang jang. Kadha vak di urang vak Mạnh Phương ka bruk “Pambuak veik, ba bruk ngak ka urang ngak daok ranaih umo thun lac urang bangsa takik di tỉnh Nghệ An”.

Tui harak angan khik ramik, kapul dam dara xã huyện Kỳ Sơn hu labaih 421 urang doan dam dara, min anak meta mboh lac, tuk ba tabiak ngak sa bruk praong ba akaok nao dahlau ye dom dam dara ieu pataom tok hu jaik mateh, kayua yau nan ye kapul dam dara xã gaok biak rilo kan kandah piah ngak hu yau bruk ba tabiak. Saai Lương Văn Tạc, bí thư Kapul dam dara xã Phà Đánh, huyện Kỳ Sơn, Nghệ An khan lac:

“Nao ngak dom danak dak dam dara, binah bruk dam dara yaok thun ye ieu pataom jeng oh hu rilo kayua urang nao ngak mbang atah abih saong tuk tết urang meng mai pataom mbaok rilo.”

Bruk ini daok rahtabiak di rilo labik dalam tỉnh Nghệ An, ba tal bruk kurang urang ngak dalam dom bruk di kapul dam dara, dalam danak dak patruh eik patrun kathaot di bhum atah biyah saong ngak kan kandah oh sit tal bruk cak rok patagok urang đảng lac urang bangsa takik.

Pamaong tal bruk ba bruk ngak ka dam dara bangsa takik, pakat ủy, karja dom pakat saong dom kapul dam dara di Nghệ An hu padang rilo danak dak daong dam dara bangsa takik daok veik di palei atau dam dara mai veik palei ngak mbang, cak rok patagok kinh tế, ngak kaya mada pak palei di drei. Saai Vi Thái Thuận, Bí thư huyện đoàn Kỳ Sơn, Nghệ An lac:

“Ban chấp hành huyện đoàn patagok dom prein khang piah daong ka dam dara padang mbang ngui. Taphia di nan, ban chấp hành huyện đoàn daok sangka, pambuak haong dom gah, peih dom tal pato bruk ngak, tukvak katut panak saong tukvak atah, blaoh peih dom tal pasram ba brei ilamo kỹ thuật ka dam dara urang đoàn piah daong ka dam dara urang đoàn padang mbang ngui”.

Thun 2016, Saai Mong Văn Sơn mai veik palei Phà Khảo, masaiy jien meng gilang pariak sarak karja, gilang paraik ngak nong piah raong kubau, limo. Tuk camriep meng 1 drei kubau saong 3 drei limo blaoh hu karja xã Phà Đánh daong palagaih brei padang labik raong palao 3 ha. Meng tari tareng, oh huac glaih glar,  Saai Mong Văn Sơn jeng kreih camin dam dara ngak kinh tế naih joi di puk Phà Khảo jang yau di mikva bangsa Khơ Mú daok di huyện Kỳ Sơn. Saai Mong Văn Sơn bui sambai khan lac:

“Adei buh jien tame raong kubau, limo, gah kapul dam dara jeng hu daong ka bruk brei masaiy jien saong gah dam dara padang mbang ngui hu peih dom tal pato pasram ka ilamo raong saong sangka iek glang. Adei jeng bac hu ka ilamo raong kubau, limo nan ye adei hu pandar tame.”

Kapul dam dara xã Minh Hợp, huyện Quỳ hợp tuk halei jeng sangka tal bruk pambuak gauk, ba bruk ngak ka dam dara bangsa takik, thau cambaih ini lac sa dalam dom bruk ngak praong. Taphia di bruk padang dom bruk ngak, kapul dam dara xã Minh Hợp pataom tame peih ngak danak dak rami ramik salih bruk ngak mbang dalam urang đoàn, dam dara, meng nan rik daong tame bruk peih ngak Sarak nyaom roya đảng bộ xã tukvak 2020-2025. Tuk hu sarak daong samar drah, hu daong palagaih ka pandap ngak, ka ilamo ye dam dara bangsa takik meda kham marat oh lac piah tabiak truh kan kathaot ngak kaya mada ka sang drei bo daok jeng sa kapul ba akaok nao dahlau, rik daong tame bruk peih ngak dom danak dak cak rok patagok kinh tế xã hội di puk palei./.