Luac 2 bilan  tapa, di palei lan am Cam Bình Đức, xa Phan Hiệp, huyen Bắc Bình, tinh Binh Thuan, dom urang dalam dom baoh sang ngak lan tuk halei jeng mboh sami samar ngak drah meng bruk mek gluh lan, mbeik thaik thaok tal am lan. Muk Lương Thị Hòa daok di palei Bình Tiến, xa Phan Hiệp, huyen Bắc Bình chreih chrai lac, meng tuk salih tapa ngak lan my nghe, pandap lan am di sang muk hu rilo urang takre, abih di nyu lac tuai damuai.

Muk Hòa khan lac, lan am my nghe di labik ini hu rilo thaik thaok yau: kra nduh, linga yoni, pandap peih tuh ia Binh Thuan, bimong Cam, kalaoh bingu, gilai li-i, ikan…Yaok pandap di baoh sang muk ngak tabiak praong mbiah saong sit, buh tame kadung teik, ba-lo bak, mbuan ka tuai damuai ba tui.

“Yaok thun hu nao ngak parang iak 4 mbang di bimong Pô Sah Inư, Ban Phan Thiết dalam dom tuk yau: Tet Nguyen ndan, Tet saka ia harei, harei padei 30/4 saong harei negar 2/9. Daok dom pandap nan lac labik resort di  Mũi Né kakei blei jaik 200 baoh..."

Tabiak meng palei lan am Cam xa Phan Hiệp, khol dahlak duah tal labik ngak rilo limo pambu sa pandiak di xã Phan Hoà, sa xa hu taong abih lac urang Cam di huyen Bắc Bình. Sa-ai Bá Hữu Nhi, po di labik ini daok jan var haong bruk sik ngak rilo, daok diuk di sa-ai daok pambuk rilo. Sa-ai Nhi khan lac, dahlau di diah, sang sa-ai mek rilo limo meng labik sik ngak rilo pajeng nao pablei, mboh glaih glar ralo yau nan ye sahaneng duah jalan ngak karei.

Camereip  tok pambu dua klau kilo pablei ka mikva dalam palei min mboh pablei hu meng ngak tagok rilo jang  meng 10-20 kilo sa harei saong pablei abih. Ngak yau nan, dak thun dak ngak parilo rilo thun tagok. 

Sa-ai Nhi khan lac, caong hu limo pambu sa pandiak bingi yamen ye kaok meti brei palih ruah rilo that, hadei di nan lac pandam kaya  saong pambu. Makna praong abih lac pandap njauk khik brei hacih sa-at. Kuhria tui janih rilo yaom pablei karei di gauk, biar abih  lac 400.000 ndong sa kilo saong glong abih 650.000 ndong sa kilo. Urak ini, baoh sang sa-ai taduan hu rilo urang kakei blei tuk Tet Nguyen ndan 2025. Sa-ai Nhi khan lac:

"Bilan mat ini, harei 10 bingun nao yaok harei sik ngak jaik sa rituh kilo rilo, jaik Tet hu urang kakei blei dahlak sik ngak jaik 2 rituh kilo ralo…”

Njauk ndem tal lac rilo limo thu di sang sa-ai Bá Hữu Nhi daok di palei Ia Mik -Bình Minh, xa Phan Hòa saong lan am di sang muk Lương Thị Hòa daok palei  Bình Tiến, xa Phan Hiệp birau mek hu angan pandap OCOP 3 patuk.

Tui UB bhap bini huyen Bac Binh, tui bruk taong yaom pandap, tut tanut cambaic yaok asar kadha, Kapol urang taong yaom, parabha brei angan pandap OCOP di huyen hu tadaun 4 pandap OCOP 3 patuk pakat huyen thun 2024, dalam nan hu Limo thu  Hữu Nhi di sang sa-ai Bá Hữu Nhi saong lan am di urang Cam Sơn Hòa (sang amuk Lương Thị Hoà). Ini lac dom pandap kaya nong pak ini, hu dom po labik ngak iek praong paglong asar siam, ralo thaik thaok, hu ginup asar kadha ba tabiak, hu brei thau la hlau gha di nyu.

Dalam thun 2024, dom bhum palei peih bruk taong yaom ka 48 pandap OCOP taong yaom iek veik saong labaih 100 pandap birau. Mbiah tal puac thun 2024, kuhria abih tih pandap OCOP daok hu ngak tui dalam tinh Binh Thuan lac 242 pandap.

Ong Nguyễn Hữu Phước, Phaok Yam ndoc So Ngak nong saong Patagok palei pala  - Phaok akaok Hoi ndong taong yaom, brei angan pandap OCOP tinh Binh Thuan khan lac, tapa danak dak OCOP, dom padap  hu rilo salih birau asar siam, ao papaok pandap, duah thau angan je bruk ngak tabiak pandap.

“Danak dak OCOP - yaok sa xa sa pandap lac dom pandap hu laba di bhum taneh, palei saong pablak tame nan hu ilamo bhum palei, yau nan ye pagam tame pandap OCOP lac dalikan pandap. Langiu  hu mbang pandap daok hu thau ka ilamo bhum palei. Drei daong ka mikva piah ngak ka urang thau cambaic laic jang dalikan nan, min bruk njuak ngak dahlau abih lac pandap hacih sa-at”.

Meyah dahlau diah, pandap lan am palei Cam di xa Phan Hiep atau limo thu di xa Phan Hoà, huyen Bắc Bình, tinh Binh Thuan tok pablei ka dom palei Cam saong pablei ka dom urang kak kaiy,  min urak ini dom pandap nan hu pagam patuk angan OCOP yam tabiak atah palei, jiak hu mbaok dom labik darak praong di grauk labik dalam saong langiu tinh.

Dom harei tapa, mblang am gaok glah lan di palei Cam Bình Đức apui daok khuah  mariak; dom mejam di sang sa-ai Bá Hữu Nhi pambu bak rilo, yau pagol sanya sa Thun birau patuah jamo, trei sir mai thong dom palei Cam di Binh Thuan./.