Daok iek anek njauk ruak pandiak tabiak darah di Khoa Hồi sức Cấp cứu uranaih saong anek kuman, Sang iek ruak Đa khoa bhum Tây Nguyên, saai Nguyễn Thị Nguyệt Ánh, daok di xã Ea Tiêu, huyện Cư Kuin, tỉnh Đắk Lắk brei thau, kayua iek lap nan ye tuk anek bahrau njauk ruak tok nao blei jru mai anek manyum. Tuk ruak trak meng nao sang iek ruak, tuk nan ruak di anek biak trak damak, kan suak yava, khal darah njauk tame tiểu cầu, huyết tương saong tame darah. Saai Nguyễn Thị Nguyệt Ánh khan lac:

 “Kamuan pandiak harei nan amaik tavak bruk abih dua harei, njauk payua anek ka sang gauk gar, tal harei ka 3 meng ba anek nao iek ruak ye mboh pandiak pandik tarakaong blaoh manyum jru 1 harei, tal harei ka 4 anek nyu ndaih baoh, blaoh ba tagok sang iek ruak huyện Cư Kuin saong payua tagok pak ini. Di sang nyu takhaoh ta-aok min tagok pak ini mboh ruak trak jang jeng mboh huac.”

Di taphia nan, saai Hoàng Thị Điệp daok pak xã Cư Ê Bur, ban Buôn Ma Thuột jeng daok iek anek likei umo 8 thun njauk ruak pandiak tabiak darah. Anek di saai Điệp tame sang iek ruak di tuk tiểu cầu trun khang, dom bac si brei tame ia gam gam:

  “Harei jip adit blaoh anek nyu pandiak, hadei di nan ba anek tagok Sang iek ruak ban piah iek ruak di mangaok nan, bac si lac anek njauk ruak pandiak pandik tarakaong, klau harei hadei brei dut iek darah ye mboh ruak pandiak tabiak darah. Tal melam anek trak jang, bac si brei ba tagok cap cuu di Sang iek ruak bhum. Tuk tame ini pandiak hu trun paje, min ia ye tame biak rilo saong tiểu cầu trun khang saong daok dalam tanut canh bao biak kan kandah.”

Tui bac si Hoàng Ngọc Anh Tuấn, Akaok Khoa Hồi sức – Cấp cứu uranaih saong anek kaman, Sang iek ruak Đa khoa bhum Tây Nguyên ye dom uranaih ruak tame sang iek ruak hu rilo kumuan ruak pandiak tabiak darah trak, tame sang iek ruak tuk takhlaoh ta-aok tabiak darah, tabiak huyết tương… jhak tal prein yava, mbuan matai:

  “Uranaih halei ruak tame ini jeng laik tame bruk soc saong soc gilac veik. Caong lac dom amaik ame atau urang sangka uranaih tuk mboh uranaih gaok dom bruk yau pandiak glaong, magei handoh rup pabhap atau klak mbang ye njauk ba nao tal labik y tế jaik abih piah hu iek ruak saong langyah piah plaih ruak trak oh kuhria caga samu.”

Ong Hoàng Hải Phúc, Yam ndok Pasak pasang iek ruak kik tỉnh Đắk Lắk brei thau, sang iek ruak daok kham marat ngak pasiam dom kan kandah piah jhul samar bruk pacang caga ruak pandiak tabiak darah:

“Thun ini jit ruak tagok biak samar saong kol dahlak hu daong ka dom huyen biak rilo, min urak ini pandap panda, jru tavao saong mac jamraik ye kol dahlak daok payua harak tagok Sở Y tế piah likau pabak. Sở Y tế hu payua harak ka So jien padai, daok So jien padai payua ka Ủy ban piah brei tapa yau habar ye jeng daok cang. Kol dahlak jeng caong hu jien piah samar drah blei pandap panda, binh pruh, dom mac pruh piah daong tani tanat dalam tukvak anak tal ".

Pasak pasang iek ruak kik tỉnh Đắk Lắk jeng brei thau, meng akaok thun tal ini, dalam tinh hu 1.325 urang ruak pandiak tabiak darah Dengue. Kuhria meng akaok bilan 8 tal urak ini hu labaih 400 urang ruak. Ban Buôn Ma thuột lac labik hu dom urang ruak pandiak tabiak darah rilo abih dalam tinh, ngan haong 422 urang./.