Di tỉnh Bình Phước, yaom jien bilan “tối thiểu vùng” tui dự thảo Nghị định bahrau daok hu khik tamo. Amuk Phạm Thị Mai Hương, Phaok Yam ndok Sở LĐTB&XH tỉnh Bình Phước brei thau, kayua oh ginup paka nan ye tinh oh likau ramik veik bhum jien bilan takik di abih. Min Sở meda daong ka UBND tỉnh patui bruk pataom mek panuac di dom đơn vị, doanh nghiệp piah pasang iek tagok bhum jien bilan dalam thun 2025.

Urak ini, Bình Phước hu jaik 400.000 urang ngak dalam tỉnh. Amuk Mai Hương brei thau, bruk tagok bhum, tagok jien bilan meda dui pachreih urang ngak mai Bình Phước, min jeng ngak trak damak ka doanh nghiệp dalam bruk bayar jien bilan ka urang ngak:“Meng bhum II tagok bhum I ye yaom jien bilan glaong biar jang gauk nan ye doanh nghiệp rami ramik veik prein ngak di doanh nghiệp. Tui nan, salih ka bruk pilih ruah 100 urang ngak ye doanh nghiệp meda rami ramik urang ngak takik jang piah khik bruk ngak. Kayua yaom jien bilan tagok jeng hu makna lac jien sahui tagok, ba tal trak damak ka  bruk ngak di doanh nghiệp”

Daok UBND tỉnh Long An jeng hu ba tabiak panuac caong lac, ramik veik bhum II tagok bhum I ka ban Tân An saong dom huyện Đức Hòa, Bến Lức, bhum III tagok bhum II ka ban sit biên giới Kiến Tường. Tui ong Nguyễn Đại Tánh, Phaok Yam ndok Sở LĐTB&XH tỉnh Long An, tukvak tapa yaom kaom darak pasar, bruk mbang ngui daok dang di TP.HCM pandar yaom jien bilan takik di abih bhum I, dalam tuk nan dom huyện Đức Hòa, Bến Lức, Cần Giuộc jaik taphia dom labik hu rilo cụm ngak kong praong min pandar bhum II. Bruk glaong biar ini ba tal bruk srau kadau darak pasar urang ngak di Long An.

Urak ini Long An hu labaih 980.000 urang ngak, dalam nan hu 370.000 urang ngak dalam dom labik ngak kong. Meng ini tal jhung thun 2024, dom doanh nghiệp di Long An hu rilo đơn hàng bahrau, bruk pilih ruah urang ngak jeng tagok tui.

Ong Nguyễn Đại Tánh, Phaok Yam ndok Sở LĐTB&XH tỉnh Long An daok brei thau lac: “Ngan saong urang ngak tuk tagok yaom jien bilan tối thiểu vùng ye jien bilan yaok bilan di urang blei BHXH jeng tagok tui. Daok suai lavik, hadei ini, tuk langyah dom sarak, urang ngak jeng hu taduan jien glaong jang, lagaih haong dom sarak bahrau.”

Di TP.HCM, ong Nguyễn Bảo Cường, akaok jabat Urang ngak - Jien bilan - BHXH, Sở LĐTB&XH brei thau, tapa mek panuac dom puk palei, doanh nghiệp, liên đoàn lao động…TP.HCM brei khik tamo bhum pandar yaom jien bilan takik abih tui Nghị định 38/2022 di Rajaei. “Yaom jien bilan bayar ka urang ngak iek tui bruk ngak, prein ngak,  kein laba saong dom kadha pambuak tal prein di doanh nghiệp saong đầu vào ka bruk ngak mbang, pablei salih, tui prein ngak, ilamu ngak bruk, iek tui rilo kadha karei piah ba tabiak yaom jien bilan njauk ka dua gah. Di TP.HCM yaom jien bilan hu bayar biak glaong piah khik kajap raidiuk urang ngak, piah dui pachreih saong khik takai urang veik”.

Dalam bhum Đông Nam bộ, tỉnh Bà Rịa-Vũng Tàu oh likau ramik veik bhum jien bilan takik di abih. Ong Nguyễn Phi Hùng, Akaok jabat Bruk ngak – Urang ngak - Jien bilan, Sở LĐTB&XH tỉnh brei thau, dom doanh nghiệp bayar jien bilan biar jang yaom jien bilan tối thiểu vùng njauk brei ramik veik ka nyu lagaih haong adat hukum gah yaom jien bilan tối thiểu vùng. Dalam nan, rilo meng lac dom doanh nghiệp takhaok kalik, jhik pet, kaya ikan… haong 50.000 urang ngak gaok tal bruk ramik veik.

Jeng tui panuac khan di ong Hùng, urak ini, rilo doanh nghiệp rilo gah yau ye dầu khí, padang ngak …dalam tỉnh daok bayar glaong jang yaom jien bilan tối thiểu vùng daok pandar. Dom đơn vị ini oh njauk ramik veik bruk tagok jien bilan tối thiểu vùng, kayua urang daok hu dom sarak tagok jien bilan, tagok bậc pabak raidiuk di urang ngak…Nan ye daok takik doanh nghiệp dalam tinh njauk ramik veik yaom jien bilan tối thiểu vùng tuk bruk nan hu brei tapa./.