Urang kathaot hu megru bruk rong glang song mesraiy jien ngak mbang

Kadha bahrau di danak dak patrun kathaot tukvak 2021-2025, nan lac pataom tame bruk ngak mbang duah jien ka baoh sang, bhap bani saong doanh nghiệp padang bruk ngak mbang saong bhap bani meda hu mbaok tame dom danak dak. Tui amuk Đinh Thị Hưng, akaok Sở Lao động – Thương binh saong Xã hội tỉnh Lào Cai, dalam bruk padang ngak dom sarak piah daong ka bhap bani, abih di nyu lac dom sarak pambuak tal bruk cak rok patagok bruk ngak mbang, meyah dom jalan ngak oh cambaih laih ye biak kan hu peih brei jien. Taphia di nan, adat lac bhap bani caong khin hu jien daong piah ngak mbang pala drak ye njauk padang danak dak saong hu UBND tỉnh pasang iek, mboh tangin. Dalam tuk binah prong bhap bani kathaot ilamu biar, nan ye urang huac ngak:

"Adat lac bhap bani caong hu daong yau nan meng kadung jien karja tỉnh ye njauk padang danak dak saong hu UBND pakat tỉnh pasang iek, mboh tangin tame. Bhap bani ye ilamu biar saong huac ngak danak dak. Sa danak dak brei tapa pakat huyện blaoh tagok pakat tỉnh mboh tangin tame nan ye mikva oh thei mbak carak. Ini jeng lac dom hagait daok hu mboh di puk palei nan ye khaol drei njauk roh duah ka nyu cambaih laih, abih di nyu lac daong ka bruk ngak mbang kinh tế patrun kathaot.”

Danak dak bruk ngak pakat negar patrun kathaot khang kajap tukvak 2021-2025 hu rilo kadha bahrau dut haong tukvak 2016-2020. Nan lac peih ngak jalan ngak pataom tame anek manuac, tapak lac buh jien tame ngak, paglaong pren ngak bruk ka urang kathaot; thau cambaih makna ba tal kathaot piah langyah tantu, cambaih laih dom kadha di urang kathaot, labik hu rilo urang kathaot. Jalan ngak di danak dak nan lac kham merat, baoh sang kathaot tui chuẩn kathaot rilo gah patui khik tanut trun meng 1,0 - 1,5% sa thun; baoh sang kathaot urang bangsa takik trun labaih 3,0% sa thun; 30% huyện kathaot, 30% xã biak kan kandah labik tapen tasik saong pulao kaoh tabiak truh kathaot, biak kan kandah; baoh sang kathaot di dom huyện kathaot trun meng 4 - 5% sa thun.

Piah ngak hu bruk ini, urang jakar palei njauk thau cambaih rai diuk di bhap bani, abih di nyu lac bruk kan kandah di jit Covid-19 tal urang kathaot. Tacei tabiak njauk menuac lac urang kathaot, baoh sang kathaot, piah ba tabiak jalan daong tapa dom sarak patrun kathaot atau danak dak bruk ngak pakat negar patrun kathaot; ieu pataom pren khang di puk palei, di bhol bhap rahra, meng nan hu sarak daong gah BHYT, pato megru, bruk ngak, daong gah xã hội, pamaong tal bruk salih meng daong karei tapa daomg tui danak dak, tui bruk ngak mbang. Danak dak jeng meda tacei pato ka dom puk palei ngak harak padang dom angan, taong yaom bruk caong khin saong peih bruk daong ba ka nyu siam meng phun jien di danak dak, meng pren khang di puk palei saong dom phun jien ieu pataom karei, daong ka urang kathaot hu sang daok tani tanat, khang kajap, meda pacang hu hoang biến đổi khí hậu, bala meng langik tasik.  

Ong Tô Đức, Chánh văn phòng Quốc gia ka patrun kathaot, Mentri LĐTBXH brei thau:

“Mentri jeng daok kuhria pambuak bruk haong dom mentri, dom gah pambuak tal, abih di nyu lac Mentri Kế hoạch đầu tư, Mentri Jien padai, pok likau Raja-ei patabiak sarak ka bhum kathaot biak kan kandah. Tuk thau lac đối tượng di danak dak bruk ngak pakat negar patrun kathaot tukvak 2021 -2025, meyah ngak salah blaoh mek hu tanut chuẩn palei pala bahrau ye jeng hu buh jien tame ngak meng danak dak mbiah tal thun 2025.”

Tukvak tapa, Mentri LĐTBXH jeng hu tacei pato dom puk palei sangka duah thau cambaih baoh sang kathaot, baoh sang jaik kathaot. UB bhap bani dom tỉnh brei khik kajap bruk tacei tabiak baoh sang kathaot lac njauk manuac, njauk urang, plaih di bruk nduac tui thành tích. Gam haong nan, pathau khan jak ba, pacheih, paglaong hatai saneng ka bruk ngak di drei, pamedeih tagok hatai kham merat yam tagok ka dom baoh sang kathaot, patrun hatai saneng pagam pambak tame, daong ka baoh sang kathaot, baoh sang jaik kathaot yam tagok tabiak truh kathaot khang kajap./.

Urang lang: Jasi -1/4