Dalam tuk padeih hè ini, yaok mesup dom harei som, but, suk yaok adit, jaik 30 adei umo thun tiểu học saong trung học cơ sở pataom mbaok di baoh sang atah di ama Jiwon, daok di buôn Akŏ Dhông, ban Buôn Ma Thuột, tỉnh Đắk Lắk. Di ini, hu dua tal sap Anh pato brei saoh oh mek jien hu dom sinh viên halar hatian di tỉnh peih tabiak dalam tuk padeih hè. Adei Đỗ Thanh Nhã Byă (umo 10 thun), daok di buôn Akŏ Dhông chreih chai khan lac:“Anek hu bac tal sap Anh oh abih jien kayua dom sa-ai sinh viên pato. Anek mboh biak kein laghaih ka rup drei. Saong dalam bilan hè ini anek daok bac megru hu rilo kadha jang, abih di nyu lac anek caong khin anek meda ndom me-yai hu dom sap negar langiu saong anek bac megru hu bruk ndom biai nao mai haong manuac urang jaik taphia, atau lac urang negar langiu”.

Daok ngan haong adei H Da Rin Ênuôl (umo 15 thun) daok di buôn Alê B, phường Ea Tam, ban Buôn Ma Thuột, dom harei hè mboh chreih chai bui sambai jang tuk adei taom gaok hu haong ilamo Ê Đê tapa tal bac tamia xoang kayua Pasak Pathau khan, Ilamo saong The thao ban Buôn Ma Thuột peih tabiak. H Da Rin brei thau:“Adei bac megru hu rilo kadha jang ka ilamo di bangsa drei. Adei thau rilo jang ka ragam tamia saong meda pambuak kadha bac meng gru pato, biên đạo tabiak rilo kadha tamia saong jeng meda pato tacei gilac veik hu ka dom adei di dom tal hadei. Meng nan dalam dom rija roya atau hu bruk hagait nan dalam buôn, dalam phường peih ngak ye khaol dahlak mboh biak jia tame rup drei piah parang me-in anak  manuac sia”.

Sa bruk ngak karei tra jeng pachreih bruk hu mbaok dii rilo uranaih bangsa takik di Đắk Lắk yaok tuk padeih hè. Nan lac “Trại pabak ilamu paneh kadha văn học nghệ thuật” kayua Kapul Văn học Nghệ thuật Đắk Lắk peih ngak. Thun ini, bruk ngak ini hu jaik 40 anek saih hu mbaok tame. Ini lac dom anek saih hu palih ruah meng dom mbang pakacah anek saih naih jioy, pakacah vak thư dunya (UPU), dom anek saih hu năng khiếu di 24 sang bac THCS saong THPT dalam tỉnh.

Langiu di nan dom adei daok hu nao maong iek, duah thau tapak saong ndom biai nao mai haong dom urang lin Biên phòng; duah thau ka ilamo glai, ilamo lamen di Bein negar Yok Đôn; ndom biai nao mai haong uranaih di bhum tapain negar; duah thau tapak di Jabat Cảnh sát Pacang khuah padam khuah saong daong urang njauk bala, Công an tỉnh Đắk Lắk… Tapa nan, daong ka dom adei pabak hu hatai saneng, pataom mek hu rilo harak gar ka bruk paneh cuak ariya saong cih vak thaik binguk.  

Amuk Niê Thanh Mai, akaok Kapul Văn học Nghệ thuật Đắk Lắk taong yaom, yaom lac tukvak duah thau oh hu rilo min dom adei brei mboh hu bruk saong ka, chreih chai haong dom bruk ngak. Tapa yaok thun, danak dak hu bruk salih bahrau, oh peih ngak gilac piah ka dom trại sinh tuk halei jeng mboh chreih chai, bahrau bahrang, kuhira gam lac dom adei hu mbaok tame blaoh.“Khaol dahlak mboh lac dom adei biak chreih chai tuk pang dom cei anai khan brei thau ka ilamo meng kan dom bangsa saong ndom ka dak rai sajarah, dom adei thei jeng caik hatai cih vak. Mai meng dom bruk sit di abih yau yaok mbang nao, dom mbang taom gaok haong dom cei bon lin, dom cei cảnh sát pacang khuah padam khuah, dom urang daok caik abih rai saong pren ranaih di drei piah rik daong ka puk paga palei negar”.

Rilo urang ngak amaik ngak ame hu anek hu mbaok tame duah thau ndom lac, dom bruk ngak ini hu bac dom kadha biak siam laghaih. Gilac veik hadei di dom bruk ngak, ong mboh anek di drrei hu dom salih bahrau mboh di anak meta, mboh khang hatai jia tame rup drei jang saong ndom biai nao mai haong manuac sia jaik taphia rilo jang.

Bilan hè daok tapa nao, min ngan haong dom uranaih bangsa takik di Đắk Lắk, dom duah thau ka ilamo hu peih tabiak jalan duah thau rilo jang ka dom janih biak gheih mekre, biak chreih chrai di dom bangsa. Tapa nan, pabak ka dom adei hatai ranam ilamo, raong ba hatai jia, piah ka mbang padeih hè hu rilo chreih chai bui sambai saong kein laghaih./.