Bein pa-aok blait praong labaih 35 ha di sang ong Phạm Đại Số, daok di xã tapen negar Bù Gia Mập (huyện Bù Gia Mập) oh daok sap ndem klao chreih chrai tuk paik pa-aok blait yau dom thun dahlau. Puac bilan paik baoh thun 2023, sang ong Số mek hu 55 tấn baoh that. Tui ong Phạm Đại Số, meng hadei di Tết Nguyên đán tal urak ini, sang ong tok mek hu labaih 5 tấn asar that. Urak ini, dom asar daok veik angaok phun tui kuhria abih tih tok hu labaih 10 tấn.

Ong Phạm Đại Số khan lac, thun ini, sang ong hu buh tame labaih 100 triệu đồng jien blei khak, jru khik caga phun pala piah khik caga phun pa-aok blait. Min, langik pandiak bhang dui atah ngak ka bingu pa-aok blait oh ndam baoh. Thun ini, lac sa thun njauk kan kandah trak abih di labik ini”.

Jeng di huyện Bù Gia Mập, sang ong Hoàng Thanh Thao, daok di palei Hai Căn (xã Phú Nghĩa) ngan haong mblang taneh praong labaih 2 ha tal urak ini tok paik hu labaih 200 kg asar pa-aok blait that. Bilan pala tukvak ini thun blaoh, sang ong paik hu labaih 2 tấn dalam 4 tấn abih vụ. Min, thun ini langik oh lagaih nan ye bein pala pa-aok blait takik baoh, tok paik hu asar di mbang tabiak bingu camriep. Urak ini, rilo asal daok thu gam di mangaok phun, nan ye mayah paik njauk mek gai kreim piah ngak magei ka asar jruh trun.

Rilo baoh sang labik 134, di palei Hai Căn, mblang taneh pa-aok blait dom thun jaik di ini kayua njauk kan kandah di langik tasik nan ye asar biak takik. Thun ini, tui panuac khan di dom baoh sang pala, bruk thu bingu daok rahtabiak trak jang. Anak bruk nan, hu dom baoh sang brei salih janih phun pala.

 “Pasak" pa-aok blait Bình Phước oh lac gaok langik pandiak dui atah labaih 3 bilan tapa ngak ka rilo labik pala pa-aok blait njauk khat lahik, takik asar. Rahra tame mbang paik asar camriep oh daok bui sambai kayua yaom blei trun bier abih kuhria dalam dom thun jaik di ini. Yaom blei asar pa-aok blait that bier jang meng 1.000-2.000 đồng/kg dut saong tukvak ini thun 2023.

Tui panuac khan di rilo baoh sang pala pa-aok blait, akaok bilan 2, bahrau tame bilan paik baoh, di dom labik blei yaom labaih 24.000 đồng/kg, jeng dalam tukvak ini thun blaoh, yaom meng 26.000 - 27.000 đồng/kg. Tal bilan 3 ini, yaom blei asar pa-aok blait that meng 25.000 đồng/kg, hu tuk trun yau yaom tuk akaok bilan. Rilo sang hu bein pa-aok blait tabiak bingu suai haduh hatai lac gaok 2 khat lahik haong gauk.

Sang ong Đỗ Văn Cảnh, daok di xã Nghĩa Bình (huyện Bù Đăng) hu mblang taneh pala pa-aok blait praong 5 ha tok paik mbang ka 1, daok mbang tabiak bingu ka 2 pa-aok blait nyu thu abih. Ong Đỗ Văn Cảnh brei thau: bein pa-aok blait di sang ong thun ini kuhria hu labaih 6 tấn. Tukvak ini thun blaoh, asar that paik hu labaih 10 tấn. Dahlak kuhria mboh dahlau oh lac asar takik jang, bo yaom bier jeng ngak kan kandah tal mbang pala  veik di thun anak. Urak ini, sang ong pah urang duan mek asar yaom 300.000 đồng sa urang. Mayah yaom blei yau akaok bilan 3 lac labaih 25.000 đồng/kg, kuhria jien pah manuac ngak, manuac iek bein, khak drak, jru pruh ye sang ong oh daok laba.

Urak ini, rilo labik pala pa-aok blait di Bình Phước daok pandik akaok kayua asar takik meng langik tasik oh lagaih, yaom bier. Dalam tuk nan, yaom pandap ngak nong daok di tanut glaong saong yaom pah menuac ngak jeng tagok glaong ngak ka urang pala pa-aok blait haduh hatai.

Ong Pham Văn Hà, Phaok Yam ndok Pasak jit vu ngak nong huyện Bù Gia Mập brei thau, bilan pala thun ini jaik abih dom sang bein pala pa-aok blait, urang pala sangka cak rok praong siam saong takik halak halieng palai kaik. Min, hadei di Tết Nguyên đán, langik pandiak ngak kan kandah tal bruk tabiak bingu tabiak ndam baoh di pa-aok blait.

Urak ini, urang ngak nong daok paik asal mbang tabiak bingu camriep. Langik oh siam tal dom labik, hu labik ye asar rilo, hu labik asal takik. Jeng tui ong Phan Văn Hà, phun pa-aok blait pambak tame langik tasik lac biak praong. Piah pasiam veik dom khat lahik, mikva njauk tabiak pasang iek bein yaok harei piah hu jalan tui iek, langyah samar drah.

Bình Phước urak ini hu labaih 152.000 ha, meblah jaik mateh dom mblang taneh pala pa-aok blait dalam taneh ia. Dom labik hu mblang taneh pala pa-aok blait rilo di tỉnh lac: Bù Đăng, Bù Gia Mập, Đồng Phú, Phú Riềng…