Dalam nan, bruk pasiam veik kinh tế bhum bangsa takik hadei di jit praong Covid-19 hu rilo urang QH ba tabiak. Kadha vak di urang vak di rayo sap Viet Nam ka bruk “Pasiam veik kinh tế bhum bangsa takik hadei di jit praong”. 

Mbang nyaom meng blaoh di Quốc hội pachreih hu bruk sangka di rahra bhum bangsa takik ngan haong dom bruk pambuak tal raidiuk di bhap bini. Dalam nan, mikva biak caik hatai tal bruk khik ramik yaom dom pandap panda blei tame ka bruk ngak mbang, pablei salih saong lang talaih dom tavak tavaiy dalam sarak, jalan ngak. Tui iek dom mbang ginum biai tapak tapa rayo papar binguk, cử tri dom bangsa di rilo tỉnh bhum ceik sangka tal bruk ngak mbang, pablei salih, paglaong jien mek tame ka bhap bini bhum kan kandah. Cử tri Tạ Minh Nhất, xã Tân Hương, huyện Yên Bình brei thau lac: “Ndom ka bruk cak rok patagok kinh tế ka mikva bangsa, bhum ceik ye tui dahlak biak caong Quốc hội, Rajaei saong dom mintri, dom gah hu sarak cambaih laih ka bruk cak rok patagok dom janih phun mala halui gilai, abih di nyu nan lac dom phun jru, gam daong langyah taneh ngak, ba bruk ngak, paglaong jien mek tame ka bhap bini daok di palei pala, bhum ceik, gam patakik di abih bruk lih mek taneh gilai, jah tak gilai suan  hukum piah mek taneh pala drak”.

Daok bruk njauk pasang iek catang bruk pablei tabiak negar langiu khak drak piah trun naong trak ka bhap bini, cử tri Vũ Duy Dũng daok di tỉnh Điện Biên mboh lac, mayah oh sangka, oh samar ngak pasiam ye meda ba tal bruk lac dom urang nong eng drei ngak tabiak padai brah saong khik kajap an ninh pandap mbang ka rahra, min meda lac dom urang laik tame bruk kan kandah, eik lipa.

       “Urak ini, yaom khak drak tagok biak khang, urang nong pala drak  daok khat lahik, urang klaak puh biak rilo, yaom pandap mbang ka raong glang jeng tagok jang 5 mbang, urang raong glang urak ini daok mek veik hu phun jien atau khat, oh hu laba urang jeng klaak. Khol dahlak biak caong Kanja samar hu dom sarak cak rok patagok pandap tamo piah ngak dalam taneh ia, hu yau nan meng trun hu yaom pandap mbang ka raong glang saong urang raong meng hu laba piah patui veik cak rok patagok”

          Tui dom urang lambaok di Rajaei, njauk biak sangka tal gah ngak nong, lac sa gah hu labik dang praong dalam tukvak taneh ia gaok kan kandah tuk yaom khak drak, yaom pandap mbang ka raong glang saong pandap piah ngak nong gam gam tagok khang. Ong Nguyễn Tạo, kapul urang Quốc hội tỉnh Lâm Đồng hu panuac caong lac: “Caong Rajaei hu sarak samar drah piah tani tanat yaom yaom, pacang bruk tagok yaom di khak drak, pandap ngak nong, xang manyek. Gam tui di nan jeng brei hu dom jalan ngak catang haong bruk xang manyek, jru khik caga phun pala ja. Jhul samar bruk brei masaiy phun jien đầu tư công, abih di nyu nan lac 3 danak dak bruk ngak negar, danak dak palai pala bahrau, danak dak patruh eik patrun kathaot, danak dak peih ngak sarak 88 cak rok patagok kinh tế bhum bangsa takik saong bhum ceik.”

Taphia di nan, tui amuk Hồ Thị Kim Ngân, urang di Kapul Quốc hội tỉnh Bắc Kạn ye njauk salih bahrau jalan sanhaneng cak rok patagok bruk pambuak bhum, parabha brei saong peih jalan lagaih piah cak rok patagok bhum, dalam nan paglaong bruk parabha pakat, paglaong bruk halain hatain saong taduan bruk ngak di drei di puk palei: “Caong Quốc hội, Rajkaei pasang iek, parabha bruk ngak ka Hội đồng bhap bini pakat tỉnh hu tabiak bruk brei salih bruk pandar taneh gilai tamo, taneh pala padai mala 20 ha saong salih bruk pandar glai pacang caga, gilai đặc dụng mala 30 ha piah lagaih dalam bruk peih ngak dom adat buh jien tame”.

Rilo jalan ngak piah lang talaih kan kandah, peih tabiak jalan ka cak rok patagok KTXH hu dom urang Quốc hội ba tabiak di labik ginum biai di QH dom harei tapa. Dom urang QH jang yau dom cử tri bhum kan kandah biak caik hatai caong dom bruk daok tavak tavaiy meda hu lang talaih samar drah, dom jalan ngak khang kadang saong salih bahrau khang meda daong jhul samar bruk pasiam veik, tani tanat bruk ngak mbang, pablei salih, khik kajap an sinh xã hội, ngak hu jayah dom bruk hu ba tabiak piah cak rok patagok KTXH thun ini./.