Mbaok mata sanam jhuk (kayua rối loạn sắc tố) meng tuk bahrau menek tabiak, ngak ka sa-ai Nguyễn Thị Quen (umo 39 thun, palei daok di Đồng Tháp) tuk halei jeng mboh malau dalam rup. Min kayua sang kan kandah, tal tuk khin likei jeng oh ginup mbang, ginup cuk, nan ye hatai oh daok sahneng tal bruk pasiam ruak.

Bruk bui sambai mai haong sa-ai biak tatuak drei tuk sa-ai Quen hu bác sĩ Võ Thái Trung taom gaok saong brei thau lac blar raih brei saoh, oh mek jien. Sa-ai haong anek kumei umo 13 thun samar tagok jalan nao tal Bình Dương.

Hadei di tuk ngak dom xét nghiệm, sa-ai hu bác sĩ Trung saong ê-kíp ba tame blac raih. Bruk blac raih hu jak jeng, mbaok mata di sa-ai urak ini hu salih karei abih. Urak ini, tuk taom gaok menuac sia, sa-ai Quen oh daok pabhang mbaok kayua malau yau dahlau daih:“Drei oh sahneng lac bác sĩ Trung meda blac raih ka drei hu yau ini. Urak ini tabiak jalan oh daok malau, oh daok pabhang mbaok, biak thau dhar phor sang iek ruak. Urak ini tok caong hu bruk ngak tani tanat, kham merat ngak piah raong anek mbang bac”.

Daok sa-ai Pi Năng Thị Xinh, bangsa Raglai, thun ini umo 32 thun, palei daok di Ninh Thuận, hu khối u tamuh di gah likuk takuai meng tuk daok bac tal 6. Sang sahneng lac Xinh tagok hạch saong meda abih eng nan ye oh brei anek nao iek ruak. 4 thun hadei, khối u nyu brah praong saong ngak ka mbaok di Xinh nyu salih karei, biak jhak. Tuk nan Xinh meng hu ba nao iek ruak di Sang iek ruak tỉnh Ninh Thuận, blaoh ba tagaok Sang iek ruak Ung bướu TP.HCM. Min kayua jien taong ruak biak glaong, oh ginup jien nan ye Xinh mai gilac veik sang, diuk haong khối u angaok kaok dak harei dak praong.

10 thun hadei, sang pablei limo ba Xinh tagok sa sang iek ruak di TP.HCM. Di pak ini, bác sĩ ndom lac, khối u ini meyah blac raih brei hu pok jien biak praong min biak jhak ka prein yava. Tui nan, sa mbang tra,  Xinh saong amaik ame mai veik sang kayua oh nduac truh jien. 

Diuk haong khối u praong jang akaok, Xinh biak duh hatai saong pandik harao lo, min adei jeng kham merat bac salah tal bac 9. Biak patuah lac thun 2022, Xinh hu sang iek ruak Đa khoa tỉnh Bình Dương, cambaih di nyu lac bác sĩ Trung brei thau lac meda kaoh klaak hu khối u saong blac raih brei saoh, oh mek jien. Biak uan tabuan, sang Xinh samar ba adei tame sang iek ruak.

Xinh drut drui khan lac, luac tukvak blac raih saong daok ndih cang, adei oh mbang halei maong tame kreih camin, kayua huac lac oh thau yau habar. Tal tuk labik laka meng blac raih hu siam veik abih, adei meng maong tame kreih camin, adei haok ia mata dalam bui  sambai, haniem phul.“Drut drui lo, mboh mbaok di drei jeng dreih yau dom urang karei. Nyu ngak ka drei oh daok huac, oh daok duh hatai. Nao halei, jeng mboh raidiuk biak bui sambai”

Lac menuac dang blac raih ngak brei mekre veik mbaok meta ka biak rilo urang kumei, hu urang payua panuac dhar phor, tadhau ayuh, min ngan saong bác sĩ Trung, bruk haniem phul di abih lac hu mboh urang ruak di drei hu bui sambai, khang hatai jia tame raidiuk. Bác sĩ Võ Thái Trung khan lac, meng hu bruk daong di mBan Yam ndok Sang iek ruak saong dom urang ngak pahla, tuk hu urang kan kandah caong hu daong, ong jeng halan hatian taom gaok. Urang halei blac raih  hu ye pok panuac tagok mBan Yam ndok brei ngak chip. Tui bác sĩ Trung, piah bruk blac raih hu jak jeng, kan di abih lac oh caik veik laka angaok mbaok di dom adei sa-ai kumei:“Bhian di nyu, dom amaik, dom adei sa-ai kumei, dalam tuk blac raih, langiu di siam ruak, bruk caik veik laka lac bruk hu caik hatai sangka rilo abih. Takik hu urang halei khin mboh sanam mboh laka angaok mbaok. Nan ye dalam tuk blac raih, dom bác sĩ caik hatai rilo jang, abih di nyu lac ngak habar ka dom amaik, dom adei sa-ai kumei hu mbaok mata mekre, bui sambai dalam raidiuk”

Oh lac blac raih brei saoh piah pasiam veik mbaok mata ka urang kumei, tukvak tapa, Sang iek ruak Đa khoa tỉnh Bình Dương daok hu daong iek ruak, taong ruak ka biak rilo urang ruak karei karei. Pok jien blac raih, taong ruak brei saoh nyu tagok tui yaok thun, yau ye thun 2022 abih jaik 1 tỷ meteh, thun 2023 lac labaih 2 tỷ meteh.

Bhian njauk kol jhak hatai klao hia ieu lac "quái vật", hadei di tuk hu blac raih pasiam veik, dom adei sa-ai kumei oh patuah njauk ruak kan kandah nan, bui sambai yau hu menek tabiak mbang ka 2. Urang mboh biak haniem phul tuk hu ieu lac kumei siam binai, mboh raidiuk biak hu yaom glaong saong daok peih tabiak dom jalan siam mekre bahrau./.