Đảng viên K’Hiệu, Akaok palei 2, xã Đinh Trang Thượng, huyện Di Linh (Lâm Đồng) lac sa dalam dom urang tuk halei jeng ba akaok nao dahlau dalam peih ngak dom bruk pakacah di puk palei. Pagap yau bruk salih janih phun pala, 8 thun dahlau, tuk hu mbaok tame tal pato pathram ka bruk pala veik bahrau cà phê, K’Hiệu khang hatai pala bahrau bein cà phê taha meng pajaih cà phê bahrau. Hadei di 3 thun pala bahrau, bein cà phê di sang K’Hiệu hu tagok năng suất, kein laba mboh cambaih laih. Meng nan, mikva dalam palei meng ngak tui. K’Hiệu brei thau, khin ka mikva jia tui, dahlau di abih drei njauk ba akaok nao dahlau, panuac ndom nao gam haong bruk ngak.

Ong K'Hiệu brei thau: “lac urang đảng, urang jakar di puk plei, dahlak kham merat patagok bruk ngak di drei dalam jak ba mikva cakrok patagok kinh tế, mong iek phun cà phê, pandar KHKT tame bruk pala drak, mong iek phun pala. Gam haong nan, drei jak ba mikva jia tame jalan ngak di Đảng, sarak hukum di Karha, jak ba anek taco nao bac da-a saong dom bruk pakacah kayua puk palei ba tabiak”.

Daok ngan haong đảng viên ranaih K’Vinh, daok di palei 5, xã Đinh Trang Thượng, taphia di bruk hu mbaok tame cakrok patagok bruk đoàn di puk palei, sa-ai haong dom urang đảng dalam chi bộ kham merat jak ba mikva patagok bruk ngak mbang pala drak, daong gauk phun pajaih, anek pajaih piah cak rok patagok kinh tế baoh sang, salih gauk harei ngak, alin brei taneh piah ngak jalan mbak nao mai, padang ngak palei pala bahrau… Tui K’Vinh, brei hu bruk sa hatung hatai haong gauk di mikva dalam palei ye kathaot rambah meng samar hu jhul kadhul lakuk, rai diuk meng trei sil. 

Sa-ai K'Vinh brei thau: “lac sa urang đảng drei brei diuk rai tui dom kadha hu ba tabiak dalam điều lệ di đảng. Kham merat duah thau, bac megru  dom sarak di Trung ương, di tỉnh, di huyện piah paglaong akaok saneng gah chính trị. Gam haong nan, brei hu hatai khang khik caga jalan ba di Đảng, sarak hukum di Karja. Abih di nyu lac, drei njauk ba akaok nao dahlau dalam bruk ngak, hadah krah dalam ndom puac daok dang haong mikva dalam palei, manuac urang daok jaik taphia”.

Ngan haong urang đảng K’Ly, Phaok akaok UBND xã Tân Thượng, huyện Di Linh, oh lac tok ngak siam bruk hu jao brei, sa-ai jeng khang hatai duah jalan ngak mbang cak rok patagok kinh tế ngan haong bruk pala măng tây.  K’Ly brei thau, khin salih bahrau hatai saneng jalan ngak mbang di bhap bani njauk brei mboh meng bruk ngak biak biai.

Sa-ai K'Ly brei thau: “Urak ini xã Tân Thượng mek hu chuẩn negar ka padang ngak palei pala bahrau. Piah miat miat lac xã palei pala bahrau, bruk paglaong jien mek tame, patruh eik patrun kathaot lac bruk biak prong. Kayua yau nan ye, piah ka bruk ngak mbang kinh tế di mikva hu cakrok patagok tani tanat, khang kajap, langiu di bruk pala cà phê, xã daok jak ba bhap bani pala pablak, salih mblang taneh taha tapa pala dom janih phun mbang baoh hu yaom kinh tế glaong yau bơ, durian, mắc ca… Taphia di nan, piah ka bhap bani hu jien mek tame yaok harei, dahlak hu ba akaok nao dahlau dalam bruk pala phun măng tây piah ka bhap bani bac megru saong ngak tui. Urak ini phun măng tây hu labik pablei tani tanat, yaom pablei meng 70.000đ tal 100.000đ sa kg, rilo urang pablei salih mai duah blei tal bein min oh ginup piah pablei. Anak tal, dahlak merat pambak prong bruk ngak ini piah ka rilo mikva hu jien mek tame yaok harei, grap tanat rai diuk”.

Urak ini dalam huyện Di Linh hu labaih 4.360 urang đảng, dalam nan hu 868 urang đảng lac urang bangsa takik. Dom urang đảng ini, lac dom urang ba akaok nao dahlau dalam taong abih dom bruk ngak, ngak brei salih bahrau jalan saneng jalan ngak dalam bhap bani urang bangsa takik, rik daong biak siam tame bruk cak rok patagok KT-XH angaok bhum taneh cao nguyên Di Linh./.

  Urang lang: Jasi - 14/2/2022